مولانا! آپ کو حالات سمجھنے ہوں گے کہ اب “حملہ آور وں” کو چائے پلا کر واپس نہیں بھیجا جاتا چاہے مقابلے پر آٹھ گنا بڑا دشمن ہندوستان ہی کیوں نہ ہو، ایران یا افغانستان جیسے “برادر” ہی کیوں نہ ہوں اور آپ تیزی کے ساتھ حملہ آوروں کی صف میں جا رہے ہیں۔ مولانا ! گالی اور گولی کی سیاست کا اب کوئی مستقبل نہیں ہے۔ یہ بھول جائیں کہ اب کوئی شیخ مجیب بن سکتا ہے اور آپ میں یہ صلاحیت موجود نہیں ہے۔ ایسا نہ ہو کہ مولانا مفتی محمود مدظلہ کا اثاثہ بھی ڈبوئیں اور بہت ساری جے یو آئیز اور جے یو پیز میں سے ایک بن جائیں۔ مولانا یاد رکھیں، آپ کے سینکڑوں بندے دہشت گردوں نے مارے ہیں فوج نے نہیں۔ آپ کو ہمیشہ بے عزت پی ٹی آئی نے کیا ہے مسلم لیگ یا پیپلز پارٹی نے نہیں۔ آپ کو جماعت کو پی ٹی آئی نے ہرایا ہے پی ڈی ایم کی جماعتوں نے نہیں۔ دوست کون ہے دشمن کون اس کا ٹھنڈے دل و دماغ سے جائزہ لیں۔ کھانے میں دیر سویر ہو ہی جاتی ہے، ٹھنڈا کر کے کھانے کی کوشش کریں ایسا نہ ہو کہ منہ جل جائے۔ مقتدرہ اگر آپ نہیں لڑنا چاہتی تو اس موقعے اور روئیے کو خوش نصیبی سمجھیں۔ شہدا کے بارے، ڈیورنڈ لائن کے بارے، دہشت گردی کے بارے اپنے موقف پر نظرثانی کریں۔ غلطی ہو جاتی ہے، اللہ نے نماز میں بھی سجدہ سہو رکھا ہے۔ دشمن کی زبان مت بولیں۔ اس پوسٹ میں درست کہا گیا کہ آپ ہر دور کے میچ فکسنگ کے ہی پلئیر ہیں اور جو کھیل آتا ہے اسی کی کوشش کریں۔ یہ ایک مخلصانہ مشورہ ہے۔ کارکنوں کو وہاں مت لے جائیں جہاں لبیک والے یا پی ٹی آئی والے لے گئے۔ جی ہاں ! مولانا کے لئے ابھی تک مسلم لیگ نون اور پیپلز پارٹی کی صفوں میں نرم گوشہ موجود ہے۔ انہیں 73 کے آئین کے تناظر میں حالات سمجھنے ہوں گے اور اپنی طاقت کا دوبارہ جائزہ لینا ہو گا کہ اگر وہ ملکی سیاست میں الطاف حسین، سعد رضوی، منور حسن یا عمران خان بننا چاہتے ہیں تو یہ ان کی اپنی چوائس ہو گی یہ ہمارا مشورہ نہیں ہے۔ آپ انگلیاں کروانے کے ایکسپرٹ ہو سکتے ہیں مگر مخالف باونسرز کے ایکسپرٹ ہیں۔ جگتیں لگانے کے لئے دانت سلامت رہنا ضروری ہے۔ بہت ہی خلوص سے ہم نے اپنی تشویش آپ کے بارے ظاہر کر دی ہے۔ جس دیوار کے سائے میں آپ ہمیشہ قیلولہ کرتے پائے گئے اسے گرانے کا خواب مت دیکھیے کہ ایسا سوچنے والوں کے کئی نام اوپر درج کر دئیے۔ جوابی خط میں ہم آپ کی خیریت نیک مطلوب “چاہتے” ہیں۔ نجم ولی خان