منيف الجراش

ياخوي السعد لاهنت سر السفاري الديار طلبت يوم اقبل الليل اهلها تدري اني خوي طِيب وقصيد ومساري وانت عندك من اطباع النشامى دبلها لاتحسس ترى دمعي ماهوب اختياري جمرة لانس الجفن الحراره نثلها احرقتني تفاكيري ولانيب داري هوني ارتب الافكار والا اعبلها والله اني من اشواقي وحر انتظاري اتخيل خيالات ماحد يحتملها كني اللي يدف امه لباب الطواري مادرى هي بتلقا طيبها والا اجلها ياوجودي على شوفة ربوعي وداري شوفه الجله تشبه شوفة اللي نزلها ديرة للوفا والعز فيها مواري من سكنها شهر ماعاد دور بدلها جعل غر السحاب اللي سوات الخباري يتلملم على روحه متى ما وصلها لاتشابك وجا كنه مجمع كباري ينتثر ويغسل جيرانها ويغسلها اشهد ان المحبه كلبوها عزاري انشد اللي يبي يلهى ولاهوب يلهى لاذكرت الخجول اللي هواها انتحاري راغ قلبي من احداث الحياه وسحلها لاعني حبها لوع الرياح الصحاري في ديارا لاجاها القيض حرك جبلها بس ماتنفع الاشواق والقلب ضاري بالفراق ويعرف الصامله من خجلها ليت قلبي جديد وليت مخي تجاري كان يوم املت بي خير ماخاب املها نفسي اللي تراودني على كل طاري باتوكل على رب السما واعقلها كم لي اسوم واكاسر ولانيب شاري لين زعلت وانا ما ادور الا زعلها الحياه اصغر من احلامي ومن قراري واقصر من المسافه بيني وبين اهلها