Faizullah Jan

نیشنل ڈیموکریٹک موومنٹ کے سینیر رہنما افراسیاب خٹک کا پختونخوا کی صورتحال پر رفعت اللہ اورکزئ کے ساتھ خصوصی پوڈکاسٹ youtu.be/tUq6i4y1g5E?si=a-qO…

پختونخوا میں 11 اکتوبر 2026 کو ایمرجنسی کے نفاذ پر نیشنل ڈیموکریٹک موومنٹ کا بیان وفاقی حکومت کی جانب سے 11 اکتوبر 2026 کو پختونخوا میں ایمرجنسی کا نفاذ—جس کے نتیجے میں صوبائی حکومت کا خاتمہ، گورنر راج کا نفاذ اور وفاق کی جانب سے صوبے کے بارہ اضلاع کی غیر قانونی علیحدگی عمل میں آئی—ملک میں وفاقی جمہوریت اور پختونخوا کے عوام کے بنیادی حقوق پر ایک کھلم کھلا حملہ ہے۔ ملک میں پنجاب کے غلبے والے نظام کے اس اقدام نے پختونخوا کو بیسویں صدی کے اوائل کے نوآبادیاتی دور میں واپس دھکیل دیا ہے، جب اس وقت کے برطانوی وائسرائے لارڈ کرزن نے نام نہاد 'گریٹ گیم' کے تحت اضلاع کے درمیان نوآبادیاتی لکیریں کھینچ کر صوبے کے عوام کو تقسیم کر دیا تھا۔ صوبے سے 12 اضلاع کی علیحدگی کے حوالے سے وزیر داخلہ کا انکار بے معنی اور کھوکھلا معلوم ہوتا ہے، کیونکہ اسلام آباد نے پختونخوا کے ان 12 اضلاع میں 'ایریا ڈیولپمنٹ سیکریٹریٹ' کے نام سے ایک بالکل مختلف انتظامی نظام متعارف کرانے کا فیصلہ کیا ہے جو سابقہ فاٹا میں نافذ 'ایف سی آر' سے ملتا جلتا ہے۔ درحقیقت یہ اقدام صوبے کے قیمتی معدنی وسائل پر قبضے اور افغانستان و وسطی ایشیا میں نئی مہم جوئی کے لیے 'نو گو ایریا' اور 'بلیک ہول' کی بحالی کی خاطر سابقہ وفاقی زیرِ انتظام قبائلی علاقے (فاٹا) کو وسیع تر شکل میں دوبارہ زندہ کرنے کی جانب پہلا قدم ہے۔ سوال یہ ہے کہ آئینی ترمیم کے ذریعے ہونے والے فاٹا کے انضمام کو کسی انتظامی حکم (ایگزیکٹو آرڈر) کے ذریعے کیسے کالعدم قرار دیا جا سکتا ہے؟ یہ عمل درحقیقت آئین کے ایک حصے کو معطل کرنے کے مترادف ہے۔ ستم ظریفی یہ ہے کہ یہ اقدام پختونخوا میں سابقہ فاٹا کے انضمام کو ختم کرنے کے حوالے سے ٹی ٹی پی کے مطالبے کو جزوی طور پر تسلیم کرنے کے مترادف ہے۔ این ڈی ایم صوبائی حکومت کی نااہلی اور صوبے کے عوام کو گڈ گورننس، سماجی و اقتصادی ترقی اور بنیادی حقوق کی فراہمی میں اس کی ناکامیوں پر مسلسل تنقید کرتی رہی ہے۔ ہم نے خاص طور پر پی ٹی آئی حکومت کی جانب سے سکیورٹی اسٹیٹ کے ایما پر اگست 2019 سے صوبے پر 'ایکشن ان ایڈ آف سول پاور ریگولیشن' (جسے پشاور ہائی کورٹ نے آئین سے متصادم قرار دیا تھا) کے غیر قانونی نفاذ پر کڑی تنقید کی ہے۔ مذکورہ ضابطے نے پختونخوا کو ایک 'پاکستانی گوانتانامو بے' میں تبدیل کر دیا ہے، جسے ہر قسم کے آئینی اور قانونی نظام سے باہر دھکیل دیا گیا ہے۔ جہاں تک صوبے میں دہشت گردی کے دوبارہ سر اٹھانے کا تعلق ہے، تو یہ "فرنٹ لائن اسٹیٹ" کی ناکام سکیورٹی پالیسیوں، بالخصوص اس کی خودکشی پر مبنی افغان پالیسی کا نتیجہ ہے۔ پختونخوا کے عوام اس خود کشی پر مبنی پالیسی کے تہرے اثر یعنی بڑے پیمانے پر موت ، تباہی اور نقل مکانی جیسے سنگین مسائل کا شکار رہے ہیں۔ دہشت گردی کے سنگین مسئلے سے نمٹنے کے لیے سکیورٹی اسٹیٹ کو پختونخوا میں گورنر راج نافذ کرنے کے بجائے اپنی ناکام سکیورٹی پالیسی کو تبدیل کرنا ہوگا۔ حکمران سیاسی جماعتیں پختونخوا کے عوام کو ان کے بنیادی حقوق سے محروم رکھنے کی ذمہ داری سے خود کو بری الذمہ قرار نہیں دے سکتیں۔ نیشنل ڈیموکریٹک موومنٹ صوبے میں ایمرجنسی کے نفاذ، گورنر راج کے اطلاق اور بارہ اضلاع کو پختونخوا کے قانون سازی اور انتظامی دائرہ اختیار سے الگ کرنے کے اقدام کو مسترد کرتی ہے۔ ہم جمہوریت اور انسانی حقوق کی حمایت کرنے والی تمام سیاسی جماعتوں سے اپیل کرتے ہیں کہ وہ جمہوریت اور انسانی حقوق پر غاصبوں اور جمہوریت مخالف قوتوں کے اس حملے کے خلاف مزاحمت کے لیے متحد ہوں۔

آج نیشنل ڈیموکریٹک موومنٹ کے مرکزی صدر محسن داوڑ، پختونخوا کی صوبائی صدر بشریٰ گوہر اور بیرسٹر سعود جاوید داوڑ نے سپریم کورٹ کے وکیل محمد یوسف اورکزئی کے ذریعے خیبر پختونخوا میں ایمرجنسی کے نفاذ اور گورنر راج کے نفاذ کی آئینی حیثیت کو پشاور ہائی کورٹ میں چیلنج کیا ہے۔ اس درخواست کا مقصد آئین، جمہوری اصولوں اور عوام کے مینڈیٹ کی پاسداری کو یقینی بنانا ہے۔