David Chacha

Mwenyekiti wa Ngome ya Vijana wa ACT Wazalendo, Abdul Nondo, amehoji mamlaka iliyomtuma Waziri wa Habari, Utamaduni, Sanaa na Michezo, Paul Makonda, kufanya ziara ya siku nne mkoani Mwanza kukagua miradi ya Serikali na kusikiliza kero za wananchi nje ya majukumu ya wizara anayoiongoza. Nondo amesema ziara hiyo imeibua maswali kuhusu mipaka ya majukumu ya mawaziri, akitolea mfano wa Makonda kuzungumzia mradi wa kivuko na kutoa maagizo kwa Mkuu wa Mkoa wa Mwanza kuwa, iwapo kivuko hicho hakitazinduliwa ifikapo mwisho wa mwezi huu, achukue jukumu la kukipeleka kwa wananchi. Makonda pia alisema atawasiliana na Waziri wa Ujenzi ili aende kuzindua kivuko hicho. Akitoa maoni yake kuhusu ziara hiyo, Nondo amesema Sheria ya The Ministers (Discharge) of Ministerial Functions, Sura ya 299, pamoja na Hati ya Mgawanyo wa Majukumu ya Mawaziri, GN Na. 686 ya mwaka 2025, zinaweka mipaka ya majukumu kati ya mawaziri na wizara, jambo linaloibua swali kuhusu msingi wa mamlaka yanayotumiwa katika ziara hiyo. Nondo ametaja uwezekano wa maelezo matatu, akisema huenda Makonda ametumwa na Rais au Waziri Mkuu, amepewa jukumu maalumu la kubaini changamoto za Mwanza na kuwasilisha taarifa kwa mamlaka husika, au mawaziri wamegawiwa mikoa ya kusimamia utekelezaji wa miradi ya Serikali na kusikiliza kero za wananchi. Hata hivyo, amesema jambo muhimu ni Serikali kutoa taarifa rasmi kuhusu sababu za Makonda kufanya ziara hiyo na mamlaka inayomruhusu kushughulikia miradi iliyo nje ya wizara yake. Kwa mujibu wa Nondo, uwazi huo utasaidia kuondoa maswali na taharuki miongoni mwa wananchi kuhusu majukumu ya viongozi wa Serikali. Amesema ufafanuzi huo pia utasaidia kujadili uwajibikaji na kanuni ya uhalali wa kisheria (Principle of Legality), ikiwamo mamlaka ya waziri anapobaini changamoto katika eneo ambalo haliko moja kwa moja chini ya wizara yake. Nondo amesisitiza kuwa wananchi wanapaswa kufahamu nani aliyemtuma Makonda Mwanza na msingi wa kisheria wa jukumu hilo.