Ekiriwo kati Omukubiriza w’Olukiiko lwa Buganda, Oweek Patrick Luwaga Mugumbule ne Minisita w’Olukiiko, Kabineeti n'ensonga ez'enjawulo mu Woofiisi ya Katikkiro, Oweek Noah Kiyimba, batuuse mu Ssaza Buweekula, gyebagenze okusisinkana olukiiko lwa Luweekula, n'Abaami ba Kabaka ku mitendera egy’enjawulo okubabangula ku nkubiriza y'enkiiko z'obwakabaka entuufu. Abakiise mu lukiiko lwa Buganda okuli; Oweek Harriet Nampala Kiwanuka, ne Oweek Kasajja Gyaviira, weebali mu lukungaana luno olutudde ku mbuga y'e Ssaza. Enteekateeka emaze emyaka 2 nga etambuzibwa mu Masaza.

Situla Omutindo: Ssi Kyabugunjufu okumansa kasasiro buli wosanze. Ebifo Kasasiro w’olina okumuteeka webiri. Leka ffenna tweyagalire mu bifo ebiyonjo nga tukendeeza ku kumansa kasasiro.

Katikkiro @cpmayiga akubirizza Abasika okuteekawo obukulembeze obulungi mu nju ze babeera basikidde nga batuukiriza obuvunaanyizibwa obubasuubirwamu okukuumira enju mu ssanyu n'ekitiibwa kyayo n'okulamula buli nsonga mu bwenkanya n'obwesimbu. Katikkiro obubaka buno abwolekeza butereevu eri Omuk. Fabian Kasi Ssenkulu wa Centenary bank ng'ono y'asumikiddwa okusikira kitaawe omugenzi Joseph Kabenge. Obubaka bwa Katikkiro busomeddwa Omumyuka we Owookubiri Owek. Robert Waggwa Nsibirwa mu lumbe olubadde e Mirembe mu Buddu. Mu bubaka buno era akubirizza abantu okukola omukolo gw'olumbe nga gujjirayo ddala ennono zonna ezirina okugobererwa kubanga mukolo mukulu nnyo mu buwangwa bwa Buganda.

Tottenham- Bungereza Abavubuka ba Buganda e Bungereza babanguddwa ku kweyambisa emikisa egibeetoolodde. Abavubuka ba Kabaka abakola emirimo egy'enjawulo mu Bungereza bakubaganyizza ebirowoozo ku mulamwa: Obuganda ku mawanga: - Engeri y'okweyambisa obukugu n'obumanyirivu okuleeta enkulaakulana mu bavubuka. Bawanganye amagezi ku ngeri y'okweyambisa buli mukisa omuntu ogumujjira okutuuka ku kiruubirirwakye nebaggumiza nti omuntu okutuuka ku buwanguzi teyetaaga kuba na nkizo yonna wabula okukozesa obulungi emikisa egimwetoolodde. Bakiggumizza nti kikulu nnyo abantu okusoosowaza ebiruubirirwa byabwe okubisukkulumya ku byebakugukamu mu masomero n'amatendekero era babikozesenga bulungi. Bakkaatirizza nti obuwanguzi obwannamaddala buva ku muntu kukola kyayagala mu buvumu okusinga okutambulira mu nkwawa z'abalala. Abavubuka era bawanganye amagezi okwefaako ku mbeera z'obulamu bwabwe nga bafuba okumanya bwebayimiridde. Bagamba nti omuvubuka yenna omutwe gwe ye "capital" asookerwako era bwagukozesa mu buyiiya, asobola okukungula ebya naggwano mu kyonna kyaba akuguseemu. Oweek. Israel Kazibwe alambise Abavubuka nti obwetowaaze n'empisa ez'omubantu bya nkizo mu kufuna enkulaakulana eyannamaddala. Mu kusooka, oweek. Rashid Lukwago omukiise mu lukiiko lwa Buganda yabakulembeddemu okukubaganya ebirowoozo ku kweyambisa ebitone by'abavubuka mu kunyweza obumu. Ensisinkano ebadde mu Memorial hall e Tottenham.

Bungereza Minista w'ensonga za Buganda ebweru, Oweek. Joseph Kawuki, @JosephKawuki_ agguddewo omwoleso gwa Bannayuganda ku Eklezia ya St. Mary's Croydon mu London. Minisita asoose kwetaba mu kitambiro kya Mmisa mu Eklezia eno okuwonga enteekateeka z'obwakabaka e bunaayira mu mikono gyomutonzi n'okuwa Ssaabasajja Kabaka obulamu obulungi. Olunaku luno lubeera lwa kukulizaako obuwangwa bw'ensi zonna mu kigo kino era wabaawo n'omwoleso ogubaamu eby'obuwangwa by'ensi zonna era Minisita Kawuki y'agguddewo omudaala gwa Bannayuganda.