ملزم فرار مگر کیسے؟ ملتان میں بچے کو گاڑی تلے کچل کر موت کے گھاٹ اُتارنے والے ملزم توقیر کے مارے جانے کی خبر تو سب سے پڑھ لی، زیادہ تر ’پاکستانی دماغ‘ نے اس کو ’پراسیس‘ کرنے کے بجائے تالیاں بجائیں کہ ’فوری انصاف ہو گیا۔‘ اب پہلا سوال: ملزم فرار کیسے ہو گیا تھا؟ اور ملتان سے بہاولپور بائی پاس کیسے پہنچ گیا؟ اس فرار کی کوئی فوٹیج؟ ایک جگہ سے دوسرے تک پہنچنے کی کوئی ٹریول ہسٹری؟ جس پولیس والے/والوں سے فرار ہوا، اُن کا کوئی نام، پتا، رینک؟ اُن کے خلاف کوئی محکمانہ کارروائی؟ دوسرا سوال: کیا جس جج نے ملزم کا پولیس کو پانچ روزہ جسمانی ریمانڈ دیا تھا، وہ اگلی پیشی پر یہ سوال پوچھے گا؟ کیا جواب سے مطمئن نہ ہونے پر وہ کوئی کارروائی کرے گا؟ پاکستان کے قانون کے مطابق ہر ’ماورائے عدالت‘ پولیس مقابلے کی جوڈیشل مجسٹریٹ کی سربراہی میں انکوائری کی جاتی ہے، کیا اس مقابلے کی ہوگی؟ کیا وہ جوڈیشل مجسٹریٹ یہ سوال پوچھے گا؟ کیا اس انکوائری کی رپورٹ سامنے لائی جائے گی؟ آخری سوال: لاہور میں دو غیرملکی خواتین کے ر۔یپ کے کیس میں گرفتار رضا ڈار اب تک فرار کیوں نہیں ہوا؟ اُس کو ہر بار بھرپور پروٹوکول کے ساتھ ماسک لگا کر عدالت کیوں لایا جاتا ہے؟ چکوال میں آسٹریلوی شہری بچی کو مارنے والے سی سی ڈی کے اہلکار کے خلاف قانون کے مطابق مقدمہ کیوں چلایا جا رہا ہے؟ اُس کو فرار کرا کے اس طرح کا ’مقابلہ‘ منعقد کیوں نہیں کرایا جاتا؟ مجھے ان سوالوں کے جواب بھی معلوم ہیں، کیا آپ کو اب بھی سمجھ نہیں آئی کہ ’ملزم فرار کیسے ہوا؟‘