آج پاکستان کی بدقسمت سیاسی تاریخ میں ایک اور سیاہ باب کا اضافہ ھوا۔ پاکستان کی واحد منتخب حکومت کو ایک غیر منتخب وفاقی حکومت نے گورنر راج لگا کر تحلیل کر دیا۔ خیبر پختونخواہ کی حکومت جیسی بھی تھی مگر عوام کی ۲/۳ اکثریتی ووٹ سے وجود میں آئ تھی، اُس کو ھٹانے کا اختیار صرف اور صرف خیبر پختونخواہ کے عوام کے پاس تھا۔ یہ عمل جمہوری اقدار اور آئین کی روح کی مکمل نفی ہے اور پاکستان کی موجودہ معاشی، سیاسی اور سکیورٹی صورتحال میں ملک کے لیے مزید خطرات پیدا کرے گا۔ یہ قدم اس لیے بھی افسوسناک اور شرمناک ھے کہ جمہوریت کا یہ قتل ملک کی دو بڑی سیاسی جماعتوں پاکستان مسلم لیگ (ن) اور پاکستان پیپلز پارٹی کے ھاتھوں ھوا جو جمہوری روایات کی دعویدار رھی ھیں۔ سیاسی اور انتظامی مسائل کا حل آئینی، پارلیمانی اور جمہوری طریقۂ کار کے ذریعے تلاش کیا جانا چاہیے تھا۔ اگر وفاقی حکومت کے پاس خیبر پختونخواہ میں ایمرجنسی کے نفاذ کے حق میں ٹھوس وجوہات اور شواہد موجود تھے تو اُسے چاہیے تھا کہ وہ اپنا مؤقف پاکستانی عوام کے سامنے پیش کرتی، پارلیمان میں تفصیلی بحث کرواتی اور عوامی تائید حاصل کرتی۔ اقتدار کے زعم میں عوام کی راے اور اُن کے بنیادی حق کی نفی کرنا پاکستان کے جمہوری نظام اور آئینی بالادستی کی تلخ تاریخ میں ایک اور بدنما داغ ثابت ھو گا۔ آج جمہوری اقدار اور حب الوطنی کا تقاضا ھے کہ اقتدار کی ھوس سے ھٹ کرملک کے مسائل حل کرنے اور ملک کو محاذ آرائی سے بچانے کے لیے سیاسی تدبر، آئینی بالادستی، پارلیمانی مشاورت اور قومی اتفاقِ رائے قائم کیا جاے-