Leo, Septemba 22,2026 nimetoa taarifa kwa umma kuhusu tukio lililosababisha vifo na majeruhi katika Jumuiya ya Hifadhi ya Wanyamapori Ipole, mkoani Tabora, pamoja na vifo vya wanyamapori katika Eneo la Hifadhi ya Ngorongoro, mkoani Arusha. Tukio la Tabora lilitokea Septemba 18, 2026, katika eneo la Jumuiya ya Hifadhi ya Wanyamapori Ipole, wilayani Sikonge, wakati watumishi wa uhifadhi walipokuwa wakitekeleza majukumu yao ya kulinda maliasili na rasilimali za Taifa. Tukio hilo lilisababisha vifo vya watu sita na wengine watano kujeruhiwa. Jeshi la Polisi, kwa kushirikiana na vyombo vingine vya ulinzi na usalama, linaendelea kufanya uchunguzi wa kina ili kubaini chanzo, mazingira na wahusika wa tukio hilo. Hadi sasa, watu 34 wanashikiliwa kwa ajili ya kusaidia uchunguzi. Kuhusu tukio la Ngorongoro, lililotokea pia Septemba 18, 2026, vifo vya simba 11 na fisi wawili vimethibitishwa. Uchunguzi wa awali umebaini kuwapo kwa majeraha katika mizoga ya baadhi ya wanyamapori hao. Uchunguzi wa kitaalamu unaendelea ili kubaini chanzo kamili cha vifo hivyo na kuwezesha hatua stahiki kuchukuliwa kwa mujibu wa sheria. Ninawahakikishia wananchi na wadau wote wa uhifadhi kuwa Serikali itaendelea kusimamia uchunguzi wa matukio haya kwa umakini, weledi na kwa kuzingatia sheria za nchi. Tutaendelea kuimarisha usalama na mazingira ya utendaji kazi kwa watumishi wanaotekeleza majukumu ya kulinda maliasili na rasilimali za Taifa. Vilevile, tutaongeza juhudi za kuzuia migogoro na kujenga mahusiano endelevu kati ya mamlaka za uhifadhi na jamii zinazozunguka maeneo yaliyohifadhiwa. Serikali inatambua na kuthamini nafasi muhimu ya wananchi katika usimamizi endelevu wa maliasili. Kwa msingi huo, tutaendelea kuweka mkazo katika mawasiliano, ushirikishwaji wa jamii na utatuzi wa changamoto kwa njia za amani, mazungumzo na kwa mujibu wa sheria. Ninatoa wito kwa wananchi kuendelea kuwa watulivu, kutoa ushirikiano kwa vyombo vinavyoendesha uchunguzi na kuepuka kusambaza taarifa ambazo hazijathibitishwa wakati taratibu rasmi za uchunguzi zikiendelea. @SuluhuSamia @mwigulunchemba1 @visitngorongoro @ccm_tanzania – at Dar es Salaam, Tanzania