चाहना र औकात बीचको खिचातानी… मनले चाहेका कुरा सधैँ भाग्यले कहाँ दिन्छ र, केही सपना आँखा मै सुहाउँछन्, हात सम्म आइपुग्दैनन्। चाहना हरेक पटक जित्न खोज्छ, औकात हरेक पटक सम्झाउन आउँछ, “सबै कुरा चाहेर मात्रै कहाँ पाइन्छ र ?” सायद, यिनै अधुरा चाहना र बाध्यता बीच मुस्कुराउँदै बाँच्नुको नाम नै जिन्दगी रहेछ। #म_अनि_मेरो_भावना ~रज्जित ✍

कतिपय आँसु आँखा सम्म आइपुग्दैनन्, मनको कुनै कुनामा चुपचाप बगिरहन्छन्। ओठमा मुस्कान सजाएर हिँड्नेहरू पनि, भित्रभित्रै हजारौँ पटक भत्किरहेका हुन्छन्। सबैले अनुहारको हाँसो देख्छन्, तर त्यो हाँसो पछाडि लुकेको थकान कसले पढ्छ र ? सबैले सोध्छन्, “तिमी ठीक छौ नि ?” तर कोही यति नजिक आउँदैन, कि मन खोलेर भन्न सकियोस्, “छैन, म ठीक छैन … बस, मेरो पीडा बुझिदिने कोही छैन।” अचम्म त यो छ, आँसु बगाउँदा मानिसहरू दुःख देख्छन्, तर आँसु लुकाउँदा सबैले बलियो ठान्छन्। कसलाई थाहा हुन्छ र, कहिलेकाहीँ नरोएको होइन, आफ्नै पीडाको साक्षी बनेर आफैँलाई सम्हाल्न सिकेको हुन्छ मान्छे। सायद अदृश्य आँसु भनेकै यही हो, जुन आँखा बाट झर्दैन, तर हरेक रात सिरानी भिजाउँछ, जसको आवाज सुनिँदैन, तर मौनता भित्र एउटा सिङ्गो संसार रुवाउँछ। अनि बिहान फेरि उही मुस्कान ओढेर मान्छेहरूको भीडमा हराउँछ मान्छे, किनकि यो संसारले आँसु देखे पछि कारण खोज्छ, तर मुस्कान देखे पछि पीडा लुकाउन कति साहस चाहियो होला भनेर कहिल्यै सोच्दैन। #म_अनि_मेरो_भावना ~रज्जित ✍

माधुर्य आफ्नोपनमा भेटिन्छ, आफ्नोपन न्यानो स्पर्शमा भेटिन्छ, र सुख ... त्यही अनुभूतिमा भेटिन्छ, जहाँ मनले, मनकै मान्छे भेट्छ। #म_अनि_मेरो_भावना ~रज्जित ✍

जसले उज्यालो पाए, उसैले आफ्नो अँध्यारो गुमाए। रात केवल रात थिएन, त्यहीँ सपनाले आकार लियो, त्यहीँ मौनताले स्वर पायो, त्यहीँ एक्लोपनले आफ्नै संगत गर्न सिकायो। उज्यालो भयो, लुकेका घाउहरू देखिए, आँखाभित्र थन्किएका वर्षाहरू अचानक लेखिए। उसले जून पायो, तर आकाशको एकान्त छुट्यो, फूल हातमा रह्यो, तर काँडाले दिएको स्पर्श छुट्यो। कसैको हात समातेर ऊ उज्यालो तिर त लम्क्यो, तर बाटोको कुनै मोडमा आफ्नै छाया सँग भेट्न भ्याएन। सायद जीवनको विडम्बना यही हो, हामी प्रकाश खोज्दै हिँड्छौँ, तर कहिलेकाहीँ त्यही प्रकाशको मूल्यमा आफ्नो एउटा रात बेचिदिन्छौँ। किनकि केही अँध्यारा निभाउनका लागि होइनन्, तिनैको काखमा मनले आफूलाई सुन्छ, सपनाले जरा हाल्छ, र मान्छेले आफ्नो वास्तविक अनुहार चिन्छ। #म_अनि_मेरो_भावना ~रज्जित ✍