#HABARI Jeshi la Polisi Mkoa wa Arusha limesema watuhumiwa wawili wanaodaiwa kujihusisha na matukio ya mauaji na uporaji wa pikipiki wamefariki dunia baada ya kujeruhiwa katika mapambano na askari wa polisi eneo la Kijenge, jijini Arusha. Watuhumiwa hao ni Yusuph Hamis, maarufu kama Yuzo, na Dickson Livingstone, anayefahamika kwa jina la Ndesaa. Kwa mujibu wa polisi, tukio hilo lilitokea Oktoba 21, 2026, majira ya saa 3:30 usiku, ambapo watuhumiwa hao walifariki dunia walipokuwa wakipatiwa matibabu hospitalini. Akizungumza Oktoba 22, 2026, Kamanda wa Polisi Mkoa wa Arusha, SACP Justine Masejo, amesema watuhumiwa hao walijeruhiwa wakati wa mapambano na askari, huku wakidaiwa kujaribu kuzuia kukamatwa kwa kutumia silaha. Polisi wamesema watuhumiwa hao walikutwa na bastola, panga pamoja na pikipiki mpya isiyokuwa na namba za usajili. Kwa mujibu wa Kamanda Masejo, Yuzo alikuwa akituhumiwa kuongoza genge la uhalifu linalohusishwa na matukio mbalimbali, yakiwemo mauaji ya madereva wawili wa bodaboda, Erasto Losujaki, aliyekutwa amefariki dunia eneo la Olkaria, Arumeru, Aprili 28, 2026, na Adiel Thomas Spitari, aliyeuawa katika Kijiji cha Likamba, Wilaya ya Arumeru, Septemba 15, 2026. Katika matukio hayo, pikipiki za marehemu ziliripotiwa kuporwa. Aidha, polisi wamesema watuhumiwa hao waliwahi kufikishwa mahakamani na kuhukumiwa kwa makosa mbalimbali ya jinai, yakiwemo unyang’anyi wa kutumia silaha na kuvunja nyumba na kuiba. Jeshi la Polisi limesema linaendelea na uchunguzi ili kuwabaini watu wengine wanaodaiwa kushirikiana na watuhumiwa hao, pamoja na kufuatilia pikipiki na mali nyingine zinazodaiwa kuporwa. #EastAfricaTV