وأنا جالس اتقهوى، ببالي هواجيس عن فلم Digger. لمّا طلعت من الفلم تذكرت عبارة كانت تنقال على لسان الكثير " هذا الفلم مو للكل، هذا الفلم ما راح يعجب الكل" هذه العبارة تكسر منطق البشر ، أي منتج ترفيهي مستحيل يعجب 100% من الناس. ولكن في الزمن الحالي، لمّا نسمع من أحد الممثلين عن أحد أفلام المنصات "أنها تتضطر تعيد شرح القصة عدة المرات، عشان الناس صايره تركيزها سيء" هنا معناها الأفلام اللي بتكون شوية ثقيلة أو قصتها قوية، بالغالب راح يعاني. (ثقيلة لا يعني صعبة المشاهدة) فلم Digger اللي خرب عليه وشوي طفى الحماس عندي بسبب حقين الحنكة وكم من نقاد الأفلام اللي كلامهم رمزيات ومو مفهوم. جلسوا يقولون عن فلم فيه رمزية معينة، وأنا داخل اشوف الفلم كنت شايل هم أنه بيطلع فلم سيء، لكن اللي صدمني. الفلم جميل جدًا وممتع، وهذا درس أنك تحفر حفرة وترمي كلام النقاد وبالتحديد الكتّاب اللي يكتب كلام غير مفهوم ويقاله شعر. طيب ارجع للفلم ونكمل نحفر بشغف مثل، توم كروز وطاقم التمثيل عندهم قدرات تخوف بالتمثيل وتجسيد الشخصيات، والحوارات والتفاعل بينهم كوميدي ومجنون، وكمان مبني على واقعية هزلية. الفلم ما يخفي عليك شيء، كله واضح قدامك. أنت جالس تشوف تركيز على شخصية وعلى أخلاقياتها وكيف فعلا تلقاها في عالمنا الواقعي. في أداء كوميدي ممتاز من البطل John Goodman ورجعني لكوميديا فلم The Big Lebowski خلني أكمل تحفير على موضوع الكتابة وبالتحديد على سالفة النصف الأول والثاني كلهم كويسين ومنطقي مرة اللي صار في النصف الثاني. هذا اللي أقدر أقوله. ولكن "هذاك الكلام" كان يوصف الفلم بالنصف الثاني طاح الفلم، كيف طاح؟ "الله أعلم" من البداية للنهاية فلم متماسك وللي كتبوا الحوارات تحية لهم على الجنون الجميل اللي شفناها. والجميل شخصيات بارزة و واضحه، وهذا اللي ممتع بالفلم. كل اللي أقدر أقوله: فلم ممتاز وممتع بكتابة وحوارات رائعة 8/10