اس ویڈیو کلپ کو سننے کے بعد میرا سب سے سوال ہے کہ مرد اگر خاک ہے تو یہ سوچ کہاں سے اتری ہے؟ اگر مرد کو "خاک برابر" ہی سمجھنا ہے، تو یہ باتیں کرنے والی خود کون سی عرش سے اتری ہوئی مخلوق ہیں؟ یہ بھی تو اسی مرد کے وجود اور نطفے سے پیدا ہونے والی مخلوق ہیں آج کل ڈیجیٹل میڈیا اور خصوصاً پوڈکاسٹس کی دنیا کو دیکھا جائے تو یوں لگتا ہے جیسے معاشرتی اصلاح کا پردہ اوڑھ کر خاندانی نظام اور باہمی رشتوں کی جڑوں پر کلہاڑی چلائی جا رہی ہے. گزشتہ دنوں عدنان فیصل کے پوڈکاسٹ کا ایک کلپ نظر سے گزرا جس کا عنوان تھا "سرے مرد خاک برابر". شو میں بیٹھ کر جس ہلکے پھلکے انداز میں مردوں کے وجود، ان کی محنت اور ان کے کردار کی تضحیک کی گئی, اس نے مجھے یہ تحریر لکھنے پر مجبور کر دیا۔ ​جب میں اس طرح کی گفتگو سنتا ہوں تو دل میں چند تلخ لیکن انتہائی سنجیدہ سوالات جنم لیتے ہیں: کیا مرد کوئی کھلونہ یا مشین ہے جس کے کوئی جذبات، احسانات یا قربانیاں نہیں؟ کیا اس معاشرے میں تمام تر برداشت اور معصومیت صرف ایک صنف کا حصہ ہے اور مرد سراپا ظالم یا بے حس ہے؟ اور سب سے بڑھ کر یہ کہ اگر مرد کو "خاک برابر" ہی سمجھنا ہے، تو یہ باتیں کرنے والی خود کون سی عرش سے اتری ہوئی مخلوق ہیں؟ یہ بھی تو اسی مرد کے وجود اور نطفے سے پیدا ہونے والی مخلوق ہیں! ​ہمارے میڈیا اور نام نہاد دیسی لبرل حلقوں میں یہ یکطرفہ بیانیہ بڑی چالاکی سے بیچنے کی کوشش کی جاتی ہے کہ صرف عورت ہی سارا بوجھ اٹھاتی ہے اور وہی قربانی دیتی ہے. میں عورت کے احترام اور اس کی قربانیوں کا منکر نہیں، لیکن کیا مرد کی قربانیوں کو یوں لمحوں میں نفی کر دینا انصاف ہے؟ صبح کے دھندلکے سے لے کر رات کے اندھیرے تک، کڑی دھوپ، گرمی اور سخت حالات میں اپنے بچوں کی روٹی اور ان کی مسکراہٹ کی خاطر پسینہ بہانے والا مرد کیا انسان نہیں؟ گھر کے باہر سو طرح کے لوگوں کی تلخ باتیں، دفتری یا کاروباری دباؤ، اور معاشرتی رویوں کو خاموشی سے جھیل کر جب وہ گھر لوٹتا ہے، تو کیا اس کی اس برداشت کا کوئی وجود نہیں؟ ​افسوس کی بات یہ ہے کہ دن بھر کی تھکن اور باہر کا ذہنی دباؤ سمیٹ کر جب ایک مرد گھر آتا ہے اور کوئی چھوٹی سی بات بھی کر دے، تو آگے سے احترام اور ہمدردی کے بجائے طعنوں اور دس باتوں کا طوفان کھڑا کر دیا جاتا ہے۔ پھر بھی وہی مرد چپ چاپ سب سہہ کر اگلے دن دوبارہ اسی جدوجہد میں نکل پڑتا ہے۔ کیا یہ برداشت نہیں؟ ​پوڈکاسٹس کے ان مائیکروفونز کے سامنے بیٹھ کر آج کی نوجوان نسل سے مخاطب ہونا اور ان کے ذہنوں میں ایک دوسرے کے خلاف زہر گھولنا کون سی تربیت ہے؟ کیا لبرل ازم یہی ہے کہ اپنے ہی گھر، اپنے ہی باپ، بھائی اور شوہر کے وجود کی تضحیک کی جائے؟ سستی شہرت، کلکس اور ویوز کی اس اندھی دوڑ میں ہمارے میڈیا پلیٹ فارمز نے معاشرے کو جوڑنے کے بجائے توڑنے کا ٹھیکا لے رکھا ہے. اس قسم کی یکطرفہ، غیر متوازن اور منفی گفتگو سے کوئی اصلاح نہیں ہو رہی، بلکہ نوجوان لڑکے اور لڑکیوں کے درمیان خلیج، نفرت اور غلط فہمیاں بڑھ رہی ہیں. ​کوئی بھی گھرانہ یا رشتہ کسی ایک کی برتری یا کسی دوسرے کی تضحیک سے نہیں چلتا. خاندانی نظام ایک گاڑی کے دو پہیوں کی مانند ہے جہاں مرد اور عورت کا اپنا اپنا مقام، اپنی ذمہ داریاں اور اپنی قربانیاں ہیں. ہمیں اپنے شوز، اپنے میڈیا اور اپنی سوچ میں توازن پیدا کرنے کی شدید ضرورت ہے. مرد کو حقیر یا "خاک" سمجھنے کے بجائے اس کی ان کٹھن کوششوں کا اعتراف کیجیے جو وہ روزانہ خاموشی سے اپنوں کی خاطر کرتا ہے۔ سستی شہرت کے لیے رشتوں کا تماشہ بنانا بند ہونا چاہیے۔ #GenderDynamics #CriticalThinking