SHAKIL HAIDER

آلِ سعود نے اپنی مرضی کا اسلام گھڑا، اور ہم نے اسے دین سمجھ لیا جب بھی سعودی حکومت پر بات ہوتی ہے، ہمارے ہاں لوگ اس طرح تڑپ اٹھتے ہیں جیسے دین پر حملہ ہو گیا ہو۔ تو دو چیزوں کو الگ کر لیتے ہیں۔ اسلام تقریباً چودہ سو سال پرانا دین ہے۔ آلِ سعود کا مکہ پر قبضہ تیرہ اکتوبر 1924 کو ہوا اور مدینہ اگلے برس، یعنی آج سے ٹھیک ایک سو دو سال پہلے۔ اس سے پہلے مکہ کا انتظام صدیوں تک شرفائے مکہ کے پاس رہا، جن کا سلسلہ دسویں صدی تک جاتا ہے۔ یعنی اسلامی تاریخ کے تقریباً نوے فیصد عرصے میں مکہ اس خاندان کے بغیر تھا۔ یہ خاندان آیا کہاں سے؟ 1744 میں درعیہ کے مقام پر محمد بن سعود اور محمد بن عبدالوہاب کے درمیان معاہدہ ہوا۔ ایک کے پاس تلوار تھی، دوسرے کے پاس منبر۔ طے یہ پایا کہ حکومت سعود کی ہو گی اور مذہبی تشریح دوسرے کی۔ یہ ایک سیاسی سودا تھا۔ پھر 1979 آیا۔ ایک ہی سال میں تین جھٹکے۔ ایران میں انقلاب، خود مکہ میں حرم پر مسلح قبضہ، اور افغانستان پر سوویت حملہ۔ سعودی حکومت نے ساکھ بچانے کے لیے تیل کی دولت مذہبی برآمد پر لگا دی۔ اس خرچ کا کوئی سرکاری حساب نہیں، کیونکہ سعودی عرب نے اعداد و شمار کبھی شائع نہیں کیے۔ مگر محقق جیمز ڈورسی کے مطابق اندازہ یہ ہے کہ 1973 کے تیل بحران کے بعد کی دہائیوں میں دنیا بھر کے مذہبی اور ثقافتی اداروں پر پچھتر سے سو ارب ڈالر خرچ ہوئے۔ رابطہ عالم اسلامی 1962 میں بنی اور ہر اس خطے میں دفتر کھولا جہاں مسلمان آباد تھے۔ 1975 سے 2000 کے درمیان سعودی سرکاری فنڈ سے دنیا بھر میں پندرہ سو سے زائد مساجد بنیں، اور ساتھ مدارس، جامعات، وظائف اور میڈیا۔ سب سے بڑا میدان پاکستان تھا۔ 1947 میں یہاں ایک سو نواسی مدارس تھے۔ 1971 میں تقریباً نو سو۔ 1988 میں، ضیا کے دور کے اختتام پر، آٹھ ہزار سے زائد رجسٹرڈ اور تقریباً پچیس ہزار غیر رجسٹرڈ۔ اور 2023 کی مردم شماری میں چھتیس ہزار تین سو اکتیس۔ یہ خود بخود نہیں ہوا۔ اسی کی دہائی میں سعودی عرب نے ایران کے اثر کو روکنے کے لیے مخصوص مسلک کے مدارس پر بھاری رقم خرچ کی۔ دو ملکوں کی لڑائی کا میدان ہمارے محلے بنا دیے گئے۔ 2008 کے ایک امریکی سفارتی مراسلے میں خبردار کیا گیا کہ سعودی مدد سے چلنے والے مدارس ان علاقوں میں بھی شدت پسندی پھیلا رہے ہیں جو پہلے معتدل تھے۔ پنجاب پولیس نے نیو یارک ٹائمز کو بتایا کہ صوبے کے دو تہائی سے زائد خود کش حملہ آور مدارس سے پڑھے تھے۔ اور اعتراف خود اسی خاندان نے کیا۔ 2018 میں محمد بن سلمان نے کہا کہ وہابیت کی اشاعت سرد جنگ کے دوران مغربی اتحادیوں کی خواہش پر کی گئی تھی۔ اگر وہ عقیدہ تھا، تو کسی اتحادی کی خواہش پر کیوں پھیلایا گیا؟ اور اگر آج وہی خاندان کنسرٹ، سینما اور ریزارٹ بنا رہا ہے، تو کیا بدلا؟ دین نہیں، پالیسی۔ جو چیز ضرورت کے ساتھ بدل جائے، وہ عقیدہ نہیں، حکمت عملی ہوتی ہے۔ اصل بات ہم نے دین، حرمین اور ایک حکمران خاندان کو ایک ہی چیز سمجھ لیا ہے۔ حرمین دنیا بھر کے مسلمانوں کے ہیں، حکومت ایک خاندان کی ہے۔ اسی لیے جب وہ حکومت دو غیر ملکیوں کی گردن اتار دے اور جرم تک نہ بتائے، تو اس پر سوال کرنا دین پر سوال نہیں، ایک ریاست پر سوال ہے۔ اور آخری بات اپنے بارے میں۔ یہ پیسہ کسی نے زبردستی نہیں تھمایا تھا۔ ضیا الحق اور اس کے جرنیلوں نے یہ سودا خوشی سے کیا، دوسروں کی جنگ اپنی زمین پر لڑنے کے لیے۔ سعودی عرب نے پیسہ دیا، امریکہ نے فرمائش کی، اور لاشیں ہماری تھیں۔ آج وہ دونوں آگے بڑھ چکے ہیں۔ ہم اب بھی وہیں کھڑے ہیں، اپنے مسلکوں میں بٹے ہوئے، اور ہر بم دھماکے کے بعد پوچھتے ہیں کہ یہ سب شروع کہاں سے ہوا تھا۔ حوالہ: معید پیرزادہ کی تحقیق، جیمز ڈورسی، ژیل کیپل، ڈیوڈ کمنز، نیو یارک ٹائمز تحریر: محمد فرخ Muhammad Farrukh #Democracy #Pakistan #Politics