Raja Shabaz

آج اسلام آباد میں علی بابا کلاؤڈ اور الخدمت فاؤنڈیشن کے زیرِ اہتمام پاکستان کے سب سے بڑے اے آئی ہیکاتھون کے گرینڈ فائنل میں شرکت کے دوران اپنے شعبے، یعنی صحافت، کی ترجیحات، اسکلز اور بدلتی دنیا سے عدم مطابقت کا شدت سے احساس ہوا۔ دنیا تیزی سے ٹیکنالوجی کی جانب بڑھ رہی ہے۔ جدید ٹیکنالوجی کے ذریعے بھاری زرمبادلہ کما رہی ہے۔ ترقی یافتہ معاشروں میں میڈیا ٹیکنالوجی اور جدت کو روزمرہ رپورٹنگ کا حصہ بنا کر عوام کو آگاہ اور باشعور کر رہا ہے۔ حکومتوں اور انتظامی اداروں پر دباؤ ڈالا جا رہا ہے کہ وہ اپنی ترجیحات درست کریں، نئی نسل کے لیے مواقع پیدا کریں اور نوجوانوں کی صلاحیتوں کو مثبت اور تخلیقی سرگرمیوں میں استعمال کرنے کی راہ ہموار کریں، تاکہ جرائم کے اڈوں کے بجائے ٹیکنالوجی اور تخلیقیت کے مراکز آباد ہوں۔ پاکستان کی حکومت اور بیوروکریسی سے کیا شکوہ، افسوس تو یہ ہے کہ صحافت سے وابستہ ہمارے بہت سے دوست بھی اس نوعیت کی سرگرمیوں کی اہمیت اور افادیت کا ادراک نہیں کر پا رہے۔ ایسے ایونٹس اول تو کوریج کے قابل ہی نہیں لگتے، بوجوہ آ بھی جائیں تو یوں شریک ہوتے ہیں گویا کسی نے زبردستی پکڑ کر بٹھا دیا ہو۔ آج کی تقریب میں موجود بعض صحافی ساتھی موضوع سے اس قدر لاتعلق اور ناواقف دکھائی دیے کہ یوں محسوس ہوا جیسے کسی پرائمری جماعت کے طالب علم کو کالج کے لیکچر میں بٹھا دیا گیا ہو۔ یہ صورتِ حال محض معلومات کی کمی کا مسئلہ نہیں، بلکہ ہماری پیشہ ورانہ ترجیحات پر ایک سنجیدہ سوالیہ نشان ہے۔ ٹیکنالوجی سے لاتعلقی اور بدلتی دنیا سے بے خبری نہ صرف میڈیا پروفیشنلز کی اہمیت اور افادیت کو کم کر رہی ہے، بلکہ ان کی ذاتی اور پیشہ ورانہ ترقی کی راہیں بھی محدود کر رہی ہے۔ صحافت کا کام صرف سیاسی بیانات، پریس کانفرنسوں اور روزمرہ تنازعات کی رپورٹنگ نہیں۔ معاشرے کو مستقبل کے امکانات سے روشناس کرانا، نئی نسل کی صلاحیتوں کو اجاگر کرنا اور قومی ترجیحات کی درست سمت متعین کرنے میں کردار ادا کرنا بھی ہماری ذمہ داری ہے۔ سوال یہ ہے کہ جب صحافی خود بدلتی دنیا کو سمجھنے اور سیکھنے کے لیے تیار نہیں ہوں گے تو معاشرے کو مستقبل کے لیے کیسے تیار کریں گے؟