Danait70 ⏳ወይዘሪት መቐለ 📚

እቲ ቀንዲ ሽግር ህዝቢ ኤርትራ እንታይ እዩ? እዚ ሕቶ ብጥንቃቐ ክንሓቶ ኣለና። ምኽንያቱ፡ ሓደ ሕማም ንምፍዋስ ምልክቱ ጥራይ ምሕካም እንተኾይኑ፡ እቲ ሓቀኛ ጠንቂ ከይተኣለየ ሕማሙ ክቕጽል ይኽእል። ህዝቢ ኤርትራ ንዓመታት ዝተፈላለዩ ሳዕቤናት ክገጥም ጸኒሑ። ስደት፣ ምፍልላይ ስድራቤት፣ ድኽነት፣ ዘይምርግጋእ፣ ዕድላት መንእሰያት ምጥፋእ፣ ፍርሒን ዘይምትእምማንን ካብቶም ዝርአዩ ሳዕቤናት እዮም። እዞም ሳዕቤናት ግን ባዕሎም ጠንቂ ኣይኮኑን። ጠንቂ እቲ ኣብ ውሽጢ ዓዲ ዘሎ ዘይ ሓላፍነታዊ መራሒ እዮም። ስለዚ፡ ጠንቂ ከይተወገደ ንሳዕቤን ጥራይ ምጉይያ ንግዜኡ እፎይታ ክህብ ይኽእል፣ ግን ዘላቒ ፍታሕ ኣይከውንን። ንኣብነት፡ ሰባት ስለምንታይ ካብ ሃገሮም ይወጹ ኢልና ከይሓተትና፡ ስደት ጥራይ ክንድርበየሉ እንተፈቲንና፡ ሓደ ሳዕ ንምልክት ኢና ንቃለስ ዘለና፤ እቲ ጠንቂ ግን ኣብ ቦታኡ ይተርፍ። እቲ ቀንዲ ስራሕ እምበኣር፡ ጠንቂ ንምልላይ፣ ሓቀኛ ምኽንያታት ንምትንታን፣ ከምኡውን ነቲ ሽግር ካብ መሰረቱ ንምፍታሕ እዩ። ፍትሒ፣ ሕጊ፣ ሰብኣዊ መሰላት፣ ተሳትፎ ህዝቢ፣ ሓላፍነታዊ ምሕደራን ሓቀኛ ተሓታትነትን ኣብ ማእከል ናይ ዝኾነ ዘላቒ ፍታሕ ክህሉ ኣለዎ። ለውጢ ማለት ስም ምቕያር ጥራይ ኣይኮነን። ለውጢ ማለት ነቲ ሽግር ዘፍረየ ኣሰራርሓ ምቕያር እዩ። ሰባት ካብ ሓደ ቦታ ናብ ካልእ ቦታ ምትካእ ጥራይ እንተኾይኑ፡ እቲ ኣሰራርሓ ከይተቐየረ እቲ ችግር ክድገም ይኽእል። ስለዚ ሓቀኛ ለውጢ ኣብ ትካላት፣ ኣብ ሕጊ፣ ኣብ ምሕደራን ኣብ ርክብ መንጎ ህዝብን ስልጣንን ዝመጽእ መሰረታዊ ለውጢ ክኸውን ኣለዎ። ህዝቢ ኤርትራ ክደልዮ ዘለዎ ፍታሕ ንሓደ ሳዕቤን ጥራይ ዝፈውስ ኣይኮነን። ኩሉ ሳዕቤናት ዝፈጠረ መሰረታዊ ጠንቂ ክልለን ክፍታሕን ኣለዎ። እዚ እዩ ዘላቒ ፍታሕ። ስለዚ ሕቶና ክኸውን ዘለዎ፦ “እዚ ሽግር ከመይ ንምሕዋይ?” ጥራይ ዘይኮነስ፣ “እዚ ሽግር ካበይ መጺኡ፣ እንታይ እዩ ዘፍርዮ፣ ከመይከ ካብ መሰረቱ ንኣልዮ?” ዝብል ክኸውን ኣለዎ። ጠንቂ ከይተወገደ ናብ ሳዕቤን ምጉይያ ፍታሕ ኣይኮነን። ሓቀኛ ፍታሕ ካብ ምልላይ ጠንቂ ይጅምር።