GZ

كنت اسمع ان المؤدلجين ومنظريهم يخافون التفكير أكثر من أي شي آخر، وكنت اقرأ هالشي في روايات زي 1984 و Animal Farm وشفنا هالشي في افلام ومسلسلات كثيرة زي سايلو وغيره .. لكن، كنت اعتقد ان هالشي نادر الحدوث في الواقع بعد ما اشتهر حسابي وخضت تجارب كبيرة مع بعض الفئات في مجتمعنا والمجتمعات العربية المجاورة، اكتشفت ان اكثر هالامور اللي برواية 1984 حقيقية ونعيشها كل يوم في مجتمعاتنا وبالذات عند الفئات الدوغمائية عند هذي الفئات تجد أن جريمة التفكير أسوء من كل الموبقات .. تلقاهم يتعاطفون مع الداشر اللي يطلع وهو سكران، متعاطي، يتحرش بالنساء امام الكاميرا، يقول كلام مسيء للدين والحكام، يسرق، يرتكب كل الموبقات، ما يهم زي مشهور طلع مؤخرا لاجئ في بريطانيا كل هذا مغفور له وبالعكس راح تلقى من يطبل له، ليه؟ لانه ما يفكر .. كل هالامور يسويها لانه في حالة سكر او لانه خربانه وما شابه، لكنه ما سوى الجريمة الكبرى وهو انه يكون له عقل يفكر فيه ويحلل ومن ثم يكون له راي مستقل يخالف رأي الدوغمائيين، ومن ثم تغفر له ذنوبه ولو كانت مثل زبد البحر يمكن تكون انسان طاهر، نظيف، نيتك لو وزعت على الأرض لامتلأت نورًا ومحبة، ويمكن تكون ما ارتكبت ولا 1% من سوايا هذا الشخص، لكنك تفكر .. وبهذي الحالة، لو كنت تفكر لدرجة انك مستقل في رأيك وتمحص كل شيء ولا تقبل مسلمات، بل انك قد ترفض بشكل منطقي وبتسلسل واضح بعض المسلمات السائدة سواء كانت دينية او ثقافية او اجتماعية، هنا يا ويلك ويلاه .. لو انك ساب الله والدولة وتصور وانت سكران وتتعاطى مخدرات ومحشش زي خوينا، اهون بكثير من انك توصل هالمرحلة من الاستقلالية بالتفكير لان في مجتمعاتنا لا جريمة تفوق جريمة التفكير .. لا عجب ان الناس بالواقع يتشابهون، او يتصنعون انهم يتشابهون، لكن ما ان تدخل الى السوشل ميديا الا تشوف شخصياتهم الحقيقية وتنوعهم ولا عجب ان كل الفئات في مجتمعاتنا متطرفة .. المتدين، الملحد، الذكوري، النسوية، اليميني، اليساري، كلهم متطرفين وكل واحد وده يسجن الثاني بل لو وده لأقام عليه حد القتل .. لانهم كلهم مكبوتين ما يقدرون يفكرون بالواقع .. تمنعهم العادات ويمنعهم الفكر السائد والادلجة والدوغمائية، يحسون انهم يمشون بين الغام يوم يتكلمون ولهذا تلقاهم بالسوشل ميديا كل واحد منهبل ومتطرف جدا لرأيه تلقاهم يوم واحد يعبر بحسن نية زيي دايم .. يجيك قروب متطرف يشحن عليك حملات تشويه سمعة يطعن بمصداقيتك عشان محد يسمع رأيك، ويجونك متطرفين يماسرون عليك اغتيال الشخصية وتسميم البئر حتى يراك الكل بريبة، بس لانك ما رست جريمة التفكير ولهذا تشوف ان فيه شخصيات مشهورة حتى من النساء، يكرهونهم ويحاربونهم حرب الويل لانهم تكلموا ضد مسلمات معينة، لكن تجد مشهورات ثانيات محتواهم كله ايحاءات ويعتبر مخالف مثلا رقص وتعري وغيره لكن محد قد هشتقهم ههههههه سو اللي تبي المهم ما تفكر ولا يكون لك راي