Mapema leo mkoani Mwanza, nilipogawa vizimba vya kufugia samaki na boti za kisasa kwa baadhi ya Watanzania wenzetu hasa vijana wanaojishughulisha na uvuvi katika Ziwa Victoria, ambapo pia nilipata wasaa wa kuzungumza na wananchi. Nimeagiza Wizara ya Mifugo na Uvuvi kuhakikisha inaendelea kutekeleza kwa kasi programu za mafunzo na utoaji wa vifaa vya kisasa kwa makundi mengi zaidi, kama mbinu mojawapo ya kuondoa uvuvi haramu, unaotishia uhai wa sekta hii ambayo ni nguzo ya uchumi kwa mamilioni ya Watanzania.

Leo nchi yetu inaadhimisha siku adhimu kuwakumbuka mashujaa wetu. Hii ni miamba na majabali ya kihistoria ambayo kwa kujitoa kwao kwa hali na mali kumetufanya sisi kuwa huru, kuishi huru, kuwa na Taifa letu, nyumbani kwetu, na kuwa hapa tulipo kama nchi. Tunajenga mnara mrefu zaidi barani Afrika katika Jiji la Dodoma kama sehemu ya kuendelea kuwaenzi mashujaa wetu. Mnara huu ni alama nyingine ya uhuru wetu, shukrani yetu na kujitambua kwetu wapi tumetoka, wapi tupo na wapi tunakwenda. Nawaelekeza Ofisi ya Waziri Mkuu, Wizara ya Fedha na wote wanaohusika na ujenzi huu wa kihistoria kuhakikisha unakamilika kwa wakati na kwa viwango. Siku hii pia ni siku ya tafakari. Tafakari ya kuendelea kuyaishi waliyoyaamini na kuyasimamia mashujaa wetu kwa kutunza amani, umoja, utulivu, mshikamano na kufanya kazi kwa bidii kwa Taifa letu. Katika siku hii muhimu, tuendelee pia kukumbuka na kuzingatia kuwa Tanzania ni moja, itabaki kuwa moja na kamwe haitagawanyika. Tusikubali na hatutaruhusu mtu yeyote au kikundi chochote kutugawa kwa kisingizio chochote kile. Mwenyezi Mungu Ibariki Afrika. Mwenyezi Mungu Ibariki Tanzania.