આજરોજ ખેડા જિલ્લાના નડિયાદ તાલુકાના નરસંડા ગામે આવેલ ‘ગિરી ફાર્મ’ ની મુલાકાત લેવાનો અવસર મળ્યો. ખેડૂતશ્રી ઉમેશગિરી શૈલેશગીરી ગોસ્વામી દ્વારા સંચાલિત આ મોડલ ફાર્મે પ્રાકૃતિક કૃષિ ક્ષેત્રે એક ઉત્તમ ઉદાહરણ પૂરું પાડ્યું છે. આશરે ૪૦ વિઘા વિસ્તારમાં ધાન્ય, શાકભાજી, મિલેટ અને હળદર જેવી વિવિધ પાકોની ખેતી સાથે તેમણે ૧૬ દેશી ગાયોના આશ્રયથી કુદરતી પદ્ધતિએ જીવામૃત, ઘન જીવામૃત, બ્રહ્માસ્ત્ર અને નિમાસ્ત્રનું મોટા પાયે ઉત્પાદન શરૂ કર્યું છે. ફાર્મમાં દાળ મિલ, ઓઈલ એક્સ્ટ્રેક્ટર અને ડીહાઈડ્રેશન મશીન દ્વારા વેલ્યુ એડીશનનું ઉત્તમ કાર્ય કરવામાં આવે છે. સુષ્ટિ સંસ્થા તથા આત્મા પ્રોજેક્ટ દ્વારા ઉભી કરવામાં આવેલી માર્કેટ વ્યવસ્થા મારફતે પોતાના ઉત્પાદનોનું વેચાણ કરી તેઓ સારી આવક મેળવી રહ્યા છે. રાજ્ય સરકારે વર્ષ ૨૦૨૨-૨૩ માટે ‘સ્ટેટ લેવલ બેસ્ટ આત્મા ફાર્મર એવોર્ડ’થી આ ફાર્મને સન્માનિત કર્યું છે, જે ખરેખર ગર્વની બાબત છે. આવી પ્રેરણાદાયી પહેલો ખેડૂતોને પ્રાકૃતિક કૃષિ તરફ પ્રોત્સાહિત કરે છે અને આત્મનિર્ભર કૃષિ તરફ રાજ્યના પ્રયત્નોને વધુ બળ આપે છે.