گھر کی قیمت ہے ایک کروڑ. آپ کے پاس بیس لاکھ ہیں. اسّی لاکھ اسلامک بینک کے پاس ہیں. آپ دونوں نے مل کر مشارکہ پر گھر خرید لیا. آپ بیس فیصد کے مالک ہیں، اسّی فیصد کا مالک اسلامک بینک ہے. چونکہ اب آپ بینک کی ملکیت کا اسّی فیصد بھی استعمال کر رہے ہیں، لہٰذا آپ بینک کو اس کا کرایہ دیں گے. اب اس میں سُود کہاں ہے ... رکو ذرا، صبر کرو .. کرایہ تو آپ نے دینا ہے لیکن سوال یہ ہے کہ کرایہ ہو گا کتنا؟ اب ایک عام بندہ تو یہی کہے گا کہ بھائی اسی طرح کے گھر کا آس پاس جو کرایہ چل رہا ہے، اسی کے حساب سے ماہانہ کرایہ کا اسّی فیصد کرایہ ہونا چاہیے. مثلاً اگر ماہانہ کرایہ پچاس ہزار ہے تو آپ نے چالیس ہزار دینا ہو گا. ٹھیک ہے نا .. اب اس میں سُود کہاں ہے .. رکو ذرا، تھوڑا اور صبر کرو .. اسلامک بینک بولے گا، میں بتاتا ہوں، میرے کو سب پتہ ہے. کرایہ کتنا ہو گا، اس کے لیے ہم یہ نہیں کریں گے کہ سٹیٹ ایجنٹ سے بات کریں یا گھر کے رقبے کے حساب سے علاقے میں جو رینٹ چل رہا ہے، اس کا اوریج نکال لیں، کرایہ کی کیلکولیشن کے لیے آپ آنکھیں بند کریں، اسلامک بینک کا نمائندہ بسم اللہ پڑھے گا، سلائی سے آنکھوں میں سُرمہ لگائے گا، پھر نکالے گا اپنی ٹوپی میں سے کبوتر اور اس کبوتر کا نام ہے KIBOR یعنی شرح ِسُود. اس کے حساب سے کرایہ کیلکولیٹ ہو گا .. پھر آپ کہیں گے کہ یار یہ کرایہ نکالنے کے لیے شرح ِسُود کیوں استعمال کر رہے ہو؟ مطلب اگر کوئی بھی پیمانہ استعمال کرنا ہے تو تربوز کا ریٹ استعمال کر لو، ہوا میں نمی کا تناسب پیمانہ رکھ لو، یہ شرح ِسُود سے کرایہ نکالو گے تو اتنا ہی بنے گا جتنا سُود بنتا ہے .. پھر آپ کیلکولیٹ کر کے چیک کریں گے تو لگ بھگ اتنا ہی کرایہ بنے گا جتنا عام بینک سُود لیتا ہے .. آپ پُوچھیں گے کہ یار میں سائیکل کرائے پر لیتا ہوں تو وہ شرح ِسُود کو پیمانہ نہیں بناتا، گھر کرایہ پر لیتا ہوں تو بھی مالک مکان شرح ِسُود کو پیمانہ نہیں بناتا، یہ تم کیسا عجیب و غریب کرایہ لے رہے ہو جو شرح ِسُود کی بنیاد پر کیلکولیٹ ہو رہا ہے، پھر اس میں اور سُود میں فرق کیا ہے .. اسلامک بینک کہے گا، سُود حرام ہے .. منقول