فيلم #مسألة_حياة_او_موت المركز الثامن وبايع 23 الف تذكره وهو ( عرض واحد في اليوم تقريباً عند اغلب السينمات ) اجل لو عنده عدد عروض اكثر في اوقات مناسبه كان فرصته في الربح اكبر ( لان فيه معطيات وليس كل فيلم محلي فيه معطيات ) لا تقولي السينما عرض وطلب ! كل دول العالم عندها قانون يحمي فيلمها المحلي في بلدها بعدد عروض معينه ، لان هذا فيه عوائد مباشرة على الصناعه المحليه وزياده ثقه المستثمر للافلام بالفرصة بالتالي فرص اعمال اكثر ونضج اكثر مع الوقت عام 2025 أُنتج 11 فيلم سعودي فقط من مجموع 538 فيلم من كل دول العالم عُرضت في نفس السنة ، يعني بمعدل كل شهر تقريبا فيه فيلم سعودي موجود في السينما بمعنى ثاني تونا نقول يا هادي 😅 مجموع ايرادات الافلام السعودية لحالها فقط 122 مليون ريال + لو لاحظنا عندنا الفيلم السعودي ترتفع ايراداته تصاعديا بعد الاسبوعين الاولى بسبب ( word of mouth ) كلام الناس بينهم وبين بعضهم ، كسب الثقه يكون تدريجي ، الجمهور مو مجبور يدفع ابداً على شي مو مقتنع فيه وهذا حقه ، لكن الواجب تسهيل الفيلم على الجمهور عشان يقول خلني اجرب .. وبعدها يقول كلمته الفيلم عبارة عن مشروع تجاري مثل المطعم المحلي اللي فاتح جنب مطاعم عالميه ، اذا صكصكت عليه وحرمته من المواقف وصعبت الوصول له وما حميته وحميت فرصته بيطلع من السوق بسرعه بينما هو محتاج ( وقت وفرصه )