مَ ..

أحب العلاقة اللي ما فيها أحد يحسب الحنية ضعف. هو يدللها، وهي تدلله. هو يمدحها، وهي تمدحه. هو يحتويها إذا غارت أو زعلت، وهي تحتويه إذا ضاق صدره. ما بينهم حساب مين يحب أكثر؟ لأن الاثنين يعرفون إن الحب مو منافسة. الحب إنك تعطي الشخص اللي تحبه دفء يشبه الدفء اللي يعطيك إياه . مَ ..

كل اللي أبيه إني أكون بحضنك واستسلم وأترك نفسي لك، مو استسلام شخص تعِب من الحياة، استسلام شخص لقي حنانه. أبي أذوب من الحنية اللي بيدينك ومن دفء حضنك. ودي تضميني بقوة كأنك تعوضين كل المسافة اللي بيننا. أبي شعور إني أذوب في قربك وأنسى كل شيء حولي.
تتشابك يدينا ونطول بالحضن من غير ما نحس بالوقت،
أبي حضن ما أضطر فيه أكون قوي، ولا أخفي لهفتي عليك، بس أحبك بقربي، وأغمض عيوني وأستسلم لهالشعور من دون تفكير، وبدون خوف وبدون حزن ولا اني اظطر أشرح لك وش فيني، بس انا وقلبك وانفاسك وحضنك اللي يخليني أتمنى لو الوقت يوقف . مَ ..

صباح الخير لك لأنك كنت نعمة في حياة شخص ما عرف يحافظ عليها. كنت تعطيه حبك بعفوية وحنيتك بدون ما يطلبها، وتخاف على خاطره وتحاول ما يمر عليه يوم وهو محتاجك بس هو اعمى عيونه عنك واختار يخسرك . مَ ..

اخر الليل ما ينقصه إلا حضن، شخص يضمك من غير ما تشرح له أسباب تعبك، يشدك لحضنه ويطبطب على قلبك قبل شعرك، ويقول لك إن كل شيء بيهون ويهمس لك لين تغفى عيونك يحضنه وانت مطمن. بس بدل الحضن تلقى نفسك بين هواجيسك، تتقلب على مخدتك وتنتظر النوم يرحمك . مَ ..

الشخص اللي يبكي بسبب حبه لك ترى مو حساس، انت ما تدري ايش بداخله ووش يحس فيه. ووش الشيء اللي اجبره يبكي وهو كان يقدر يحبس دموعه، و ما تدري كم مرة سكت وكم مرة بلع غصته وقال ما عليه، وكم مرة كان بخاطره كلام واختار ما يقوله عشان ما يزعلك. وما تدري كيف كان يعطيك من قلبه ويهتم فيك، وكيف كان شعوره بالحب تجاهك صادق لدرجة إنه ما يعرف يقول لك لا. لما تطلب عيونه ما بخل عليك فيها، وإذا احتجت صوته أو حضنه أو قربه تلقاه متلهف لك، لأنه لما حبك ما حسب حساب إنه ممكن يندم أو ينخذل منك. و تجي انت بكل برود تخذله؟ ليش تقابل كل هالحب والحنية بالخذلان؟ ويمكن توصل لمرحلة انك تخونه وهو ما قصر معاك وكان يعطيك كل اللي يقدر عليه. ليش تخليه يندم إنه ما قال لك "لا" وإنه أعطاك فوق طاقته، وتخليه يندم لدرجة حتى اللحظات الحلوة اللي كنت تعطيه صار يشك فيها انها كذب. ولما تقول له كلام حب وتخليه يحبك بكل هالصدق؟ هو ما كان يبي منك غير إنك تحافظ عليه وتحبه مثل ما حبك . مَ ..

كنت تبي أكتوبر يجيب لك الشخص اللي اشتقت له. وتوقعت فيه لحظة ان الشخص اللي كنت معاه وافترقتم؟ يفكر بنفس تفكيرك ويجمعك اكتوبر بالشخص اللي تبيه. بس اكتوبر كان احن عليك من توقعاتك وكشف لك حقيقة شخص كنت تعذره حتى وانت اللي تأذيت منه. وعلمك انك كنت تحاول تحافظ على علاقة، الطرف الثاني ما كان يحافظ حتى على خاطرك. و تجاوزت حدودك مع اللي تحبه وبلعت زعلك وبكيت، وكلها عشان شخص في النهاية خلاك وراح لغيرك. يمكن ما أخذت منه اللي انتظرته، بس أخذت الحقيقة اللي كانت تنقصك عشان تعرف طريقك وتعيش حياتك مع اللي يستحقك . مَ ..

أحب العلاقة اللي ما يضطر فيها أحد يخاف من الثاني. إذا شفت حبي لك واهتمامي ومبادرتي من البداية؟ لا تخليني أحس إنك تنتظر مني غلطة عشان تبعد، ولا تفسر كل لحظة أهدأ فيها إني تغيرت عليك، أنا اخترتك وأنا عارف وش أبي منك. وأبيك تحبني بقلب يطمني مثل ما أحبك، ولا تخلي تجاربك القديمة تسرق منا راحتنا. ولا ابي نعيش حبنا وكأن فيه موعد محدد ننخذل فيه. خلنا نكون لبعض أمان وحب متبادل. أحبك وما تشوف مني الا مشاعر حقيقية وحنيه وتحبني وما أشوف منك الا الامان والدلال . مَ ..

أحب لما ألقى اللي أحبه يبادلني حبي بحب أكبر. لما تكون الحنية فيها رايحة وراجعة. أحن عليه وألقاه أحن مني على قلبي. أدلعه ويبادلني الدلال وما يبخل باهتمامه وسؤاله. اخاف عليه من التعب ويخاف على قلبي من الزعل. أقول له أحبك واسمعها منه من غير ما أطلب. اشتاق له والقاه يسبقني بالشوق ويبادر. ما أضطر اشرح له إني احتاج اهتمامه. لأنه من نفسه يحب يعطيك كل اللي يقدر عليه. وتعيشون شعور إن كل واحد فيكم محظوظ بالثاني . مَ ..

ودي بليلة ما أفكر ولا اهوجس فيها بشيء. أحط راسي على صدر شخص أحبه وأسمع دقات قلبه لين يهدأ كل اللي فيني. لا اتكلم ولا أشرح وش فيني بس يضمني كأنه فاهم كل شيء وأحس بيده تضمني أكثر. على الأقل لين يطلع الصباح . مَ ..

إذا عندك شخص يحبك بقلب نظيف؟ وتشوف حبه في حنيته وخوفه عليك وفي عيونه اللي ما تخفي مشاعرها؟ حافظ عليه. ترى هالشخص ما يحتاج يلعب أو يتصنع عشان يثبت لك إنه يبيك، لأن أفعاله تسبق كلامه. حتى لما تقصر معاه تشوفه متمسك فيك ويحاولك. ويعطيك فرص حتى في الأيام اللي يمكن أنت تقسى فيها عليه. انت يمكن ما تعرف قيمة هالإنسان إلا بعد ما يتعب ويوقف محاولاته. فإذا ما قدرت تبادله نفس الشعور؟ خليك إنسان وصارحه، ولا تستغل حبه بمزاجك وتستهلكه مرة تبيه ومرة لا. ولا تخليه متعلق بشعور من طرف واحد. فخليك انسان وصارحه وكثر الله خيرك . مَ ..

كنت تقدر تكون حنون وتبادله بالحب والاهتمام، وكنت تقدر تحتوي حزنه وتعبه ودموعه، وتكون له الأمان اللي كان يدور عليه فيك. وكنت تقدر تعتذر وتطلب منه يسامحك، وكنت تقدر تحاول ترجع ثقته، وتثبت له إنك فعلًا تغيرت.
كان عندك ألف طريقة تحافظ فيها على شخص يحبك بقلب نظيف، بس اخترت أسهل شيء عليك إنك تتركه بزعله ووجعه بسببك ويخسر فيك أمانه.
فلا تحسب إنك بتلقى نفس الحنية عند كل شخص، ولا تحسب انك بتلقى قلب يحبك بنفس الصدق ويعطيك اللي تبي مثل ما كان يعطيك.
ترى بيمر عليك يوم وتتذكر كل شيء كان يسويه لك من قلبه، وبتفهم إنك ما خسرت شخص يحبك وبس. خسرت شخص كان يعطيك شعور ما بتلقاه بشخص ثاني . مَ ..

ودي أحضن كل شخص خذله إنسان كان يحسبه أمانه. للي تعود يكتم دموعه ويقول إنه بخير، وهو من داخله يتمنى فيه احد يسأله بصدق وش فيه. أحضنه وأخليه يقول كل الكلام اللي عجز يقوله، وكل القهر اللي يحسه بقلبه. أبي أقول له إنك ما كنت غلطان لأنك حبيت بصدق، ولا لانك وثقت بشخص كنت تشوفه غير عن الكل. الغلط مو في قلبك الحنون ولا في دموعك اللي نزلت من القهر، واللي صار ما ينقص من قيمتك، ومشاعرك الحقيقية مو عيب. وإنه مو لازم يشرح لي ليه موجوع ولا يبرر لي ليش صار يخاف يثق بأحد. أبي أحسسه إن مو كل قرب وراه خذلان ومو مضطر يكون قوي طول الوقت. ودموعك لما تنزل اعتبرها هم وانزاح وابيه يحس إنه مو لحاله. ولايحسب إن ضعفه بيغير نظرتي له. وانت تستاهل حنية ما تخليك تخاف من قلبك كل ما حبيت . مَ ..

فيه شخص إذا تغير شعوره تجاهك؟ يختار يختفي ولا يفكر بالشخص اللي للحين ينتظر منه تفسير. يمشي فجأة بدون تفسير ولا حتى كلمة تخليك تفهم وش تغير وما تدري وش صار، ويمكن تحاسب نفسك على أشياء تحسب انه زعل منها او سويت شيء غلط. بس الأناني يآخذ منك اللي يبغاه ويفكر بنفسه. وهو كان يقدر يصارحك بدال ما يخليك تفكر ليش ووش فيه وتحتار. لدرجة ما تدري تنتظرة ولا تكمل تعيش حياتك . مَ ..

مشاعر الإنسان مو لعبة تلعب فيها على كيفك، مرة تقربه منك وتحسسه إنه أغلى شخص عندك. ومرة تبعده وتعامله كأنه ما يعني لك شيء. يوم تغرقه حب وحنية ومرات تخليه يحتار فيك: تحبه باقي ولا متغير ولا زعلان منه وتخليه يفكر! تقربه منك إذا مالقيت احد وإذا اشتقت، وتبعد إذا اكتفيت ومالك خلق. وتتركه طول الوقت يحاول يفهم وش يرضيك. تراه إنسان عنده قلب مو زر تضغطه متى ما احتجت حبه وحنيته وتطفيه متى ما طفشت منه وشبعت. ترى هو مو مسؤول عن تناقض مشاعرك، ولا المفروض انه كل يوم يفسر تصرفاتك ويحسب حساب لمزاجك. يا تصير انسان وتحبه بوضوح ؟ يا لا تعشمه فيك ولا تستغل مشاعره وخليه يشوف حياته بعيد عن تناقضاتك . مَ ..

صباح الخير لك لأنك كنت الشخص الصح مع الشخص الغلط. أعطيته من قلبك حب وحنية وأمان ما قصرت فيها. بس هو كان معمي عيونه. و الأيام بتتكفل انها تعلمه قيمتك ووش خسر . مَ ..