*****

أمن الدولة الهولندي لسه ماشي من عندي. هولندا رفعت الكود الأمني بتاع الإرهاب بتاعها "حالة الطوارئ" بسبب خوفهم من أي ردود فعل أو هجمات إرهابية في هولندا بسبب موقف حكومة هولندا الرسمي في دعمهم الإبادة الجماعية اللي بتحصل في غزة. وبناءً عليه بدأو يزورو ناس في بيوتهم من اللي هما داعمين لفلسطين أو ناشطين بخصوص القضية الفلسطينية، وجم زاروني من شوية وححكيلكم على اللي حصل. جرس الباب خبط ومراتي حطت الحجاب على راسها راحت تفتح الباب، أنا كنت شايل مالك عشان كان عيان ويا عيني عايز اللي يفضل شايله. أنا سامع المحادثة من الصالة وواحد بيسأل : السيد أنس حبيب موجود؟ مراتي: أيوا هنا، حضراتكم مين؟ -هما: إحنا البوليس وكنا عايزين نتكلم معاه. (كانو بوليس بهدوم مدني وورونا الهويات بتاعتهم) مراتي : اتفضلوا بس يا ريت تقلعوا الجزمة قبل ما تدخلوا. (قلعوا الجزمة ودخلوا وأنا قاعد على الكنبة وشايل مالك) رحبت بيهم واتفضلوا اقعدوا وبعدها قعدوا يسألوني بخصوص الإستيكرات اللي أنا واخويا كنا لزقناها قبل كده بخصوص فلسطين وخلونا في القسم يوم يحققوا معانا ترخيم كده. قالولي إحنا بس كنا عايزين نتكلم معاك ونعرف فكرك عامل إزاي لأننا عايزين نعرف إذا كان عندك أفكار ممكن تكون متشددة ولا حاجة، قولتله آه تمام.. ما أنا لو إسمي مارك وعيني زرقاء مكنتش جيت تسأل طبعًا ولا أنا عشان عيني سوداء وإسمي أنس ومن مصر فلازم طبعًا تيجي تسأل وتشمشم. قالي لا لا إحنا مش عنصريين والإجراء ده بيتم مع أي حد بغض النظر عن عرقه ولا دينه. (طبعًا طبعًا) كنت عايز أقوله وهو مين اللي اتسبب في حرب عالمية قتلت أكتر من 50 مليون إنسان ومين اللي رمى القنبلة النووية على هيروشيما وناجازاكي وقتل 200 ألف مدني ومين اللي استعمر جنوب أفريقيا واستعبد شعبها بس قولت مش مهم كفاية عليه التهتهة بتاعة الرد الأول. المهم جابولي شوية تويتات كنت كاتبهم وبيسألني عنهم وسألني عن سبب دعمي لفلسطين وليه لزقت ستيكرز وهل أنا تابع لجماعات ولا منظمات ولا بعمل ده من نفسي بس. قولتله وهو عشان أقول اوقفوا الحرب وإن إسرائيل بتقتل الأطفال وإنهم دولة إرهابية لازم أكون تابع لمنظمة؟ .. أنا شايل إبني العيان وقلبي بيتقطع عليه ما بالك لو تم قصفه ومات بسبب دولة إرهابية قررت ده؟ ساعتها تتخيل رد فعلي حيكون عامل إزاي وإحساسي حيبقى عامل إزاي؟ قالي طبعًأ اللي بيحصل هناك ده شئ محدش يوافق عليه وشئ صعب وبتاع (شوية والدمعة كانت حتنزل من عيني). قعدوا 20 دقيقة يسألوني بخصوص إكس، والمحتوى اللي بعمله على اليوتيوب أنا واخويا طارق وبعدها في الآخر سألته طيب دلوقتي وبعدين يعني إيه اللي حيحصل كده؟ قالي مفيش حاجة إحنا بس كنا عايزين نسمع منك ونفهم دماغك وبتاع (رسميًا اتعملي ملف في أمن الدولة الهولندي LOL) وبعدها مشيوا. طبعًا إنت ممكن تقارن ده بالوضع في مصر طبعًأ وإزاي ظابط أمن الدولة بقوات ممكن يجو يطربقو البيت على دماغ صاحبه وينتهكو حرمته ويسرقوه ويلبس لصاحبه تهمة قتل السادات في الآخر عادي جدًا. لكن الوضع اللي أنا حكيته واللي حصل معايا ده المفروض يكون الطبيعي في أي مكان فيه قانون ورقابة بتطبق. هولندا مش جنة الله في الأرض ولا هما شعوب منزلة من السماء لكن الفارق الوحيد إنهم بيلتزموا بالقانون لأن في رقابة ومسائلة وبيخافوا منها عشان كده أغلب الناس بتلتزم بالقانون من الظابط والقاضي لغاية عامل النظافة. شوف كل اللي أنا حكيته ده لكن أنا سألت محامي بخصوص اللي حصل ده وقالي إن في قضية بتتعمل حاليًا ضد الحكومة ضد الإجراءات بتاعت قانون الطوارئ ديه اللي تخلي أمن الدولة الهولندي يجي يشمشم ويتكلم مع الناس ويحطهم تحت الميكروسكوب لأنهم داعمين للقضية الفلسطينية. آه آه.. ده غير قانوني ومش من حقهم يعملوا كده ويجوا البيت ويسألوا الأسئلة ديه، إنت كبوليس شاكك في حد إنه إرهابي أو ارتكب جريمة يبقى بتحقق فيها وبعد كده النيابة بتقرر إذا فعلًأ البوليس من حقه يعمل كده.

حاجة أخيرة مهمة حابب أقولها بخصوص تريند المسيحي المصري. المسيحي المصري الرافض للظلم أحب إلي وأقرب ليا من ١٠٠ مسلم بيأيد الظالم ولو مش بيسيب فرض و حج بيت الله وحافظ للقرآن عن ظهر قلب.