சென்னை கொடுங்கையூரில் விஷவாயு தாக்கி உயிரிழந்த இரு தொழிலாளர்களின் குடும்பங்களுக்கு ரூ.60 லட்சம் இழப்பீடு! தொடர் போராட்டத்தை நடத்தி இழப்பீட்டைப் பெற்றுத் தந்தது தமிழ்நாடு தீண்டாமை ஒழிப்பு முன்னணி! முதல்வரின் பெரம்பூர் சட்டமன்ற தொகுதிக்கு உட்பட்ட கொடுங்கையூர் தென்றல் நகர் 3-வது தெருவில், நேற்றைய தினம் (12.10.2026) சுமார் 20 அடி ஆழமுள்ள மழைநீர் சேமிப்புத் தொட்டியில் மின் மோட்டாரைப் பழுதுபார்க்கும் பணியில் ஈடுபட்டிருந்தபோது விஷவாயு தாக்கி இரு தொழிலாளர்கள் உயிரிழப்பு. ராணிப்பேட்டை மாவட்டம், ஆற்காடு பெரிய அசேன்புரத்தைச் சேர்ந்த அஸ்தம் பாஷா (38), சென்னை மேற்கு தாம்பரம் அம்பேத்கர் தெருவைச் சேர்ந்த நவீன்குமார் (34) ஆகிய இருவரும் உயிரிழந்தனர். மழைநீர் சேமிப்புத் தொட்டியில் சுற்றுப்புறக் கால்வாய்களிலிருந்து கழிவுநீர் கலந்து தேங்கியிருந்ததால் விஷவாயு உருவாகி இந்த உயிரிழப்புகள் ஏற்படக் காரணம் என வலியுறுத்தி இவ்வழக்கை மனிதக் கழிவுகளை மனிதர்களே அகற்றுவதைத் தடை செய்தல் மற்றும் அவர்களின் மறுவாழ்வுச் சட்டம், 2013-ன் கீழ் பதிவு செய்து உயிரிழந்த தொழிலாளர்களின் குடும்பத்தினருக்கு உச்சநீதிமன்றத் தீர்ப்பின் அடிப்படையில் தலா ரூ.30 லட்சம் இழப்பீடு வழங்க வேண்டும் என்றும் தமிழ்நாடு தீண்டாமை ஒழிப்பு முன்னணி வலியுறுத்தியது. பாதிக்கப்பட்ட குடும்பத்தினருடன் இணைந்து தமிழ்நாடு தீண்டாமை ஒழிப்பு முன்னணியின் வடசென்னை மாவட்டத் தோழர்கள் தொடர்ந்து போராட்டத்திலும் சட்டப் போராட்டத்திலும் ஈடுபட்டனர். இதன் விளைவாக, 13.10.2026 அன்று உயிரிழந்த இரு தொழிலாளர்களின் குடும்பத்தினருக்கும் தலா ரூ.30 லட்சம் வீதம் மொத்தம் ரூ.60 லட்சத்திற்கான காசோலை பெற்றுத் தரப்பட்டது. இந்தப் போராட்டத்தில் மார்க்சிஸ்ட் கம்யூனிஸ்ட் கட்சியின் பகுதி செயலாளர் ஏ.விஜயகுமார், தமிழ்நாடு தீண்டாமை ஒழிப்பு முன்னணியின் வடசென்னை மாவட்டத் தலைவர் வி.ஜானகிராமன், மாவட்டச் செயலாளர் எம்.ராஜ்குமார், மாவட்டக்குழு உறுப்பினர்கள் டேவிட், ஜீவா, முனுசாமி, பகுதி குழு உறுப்பினர் முரளி மற்றும் தோழர்கள் வெற்றி ராஜன், பரதன், புஷ்பராஜ் ஆகியோர் பங்கேற்றனர். #TNUEF #CPIM #Chennai