Tamer

أرجعوا للي كتبته عن الشناوي من كام يوم، وإنتوا تفهموا قصة الشناوي كويس. وللمرة التانية، السؤال: إنتوا عايزين إيه من محمد الشناوي؟ في كأس العالم، الشناوي انضم للمنتخب، وكان اللي بيلعب أساسي واحد من ولادنا برضه، هو مصطفى شوبير، اللي كنا فخورين بيه. وكان الشناوي داعم لمصطفى شوبير، ومفيش تصريح واحد أو موقف سلبي حصل منه. ماتش إيران، رغم الموقف وأحداثه، الشناوي في الماتش اللي بعده قدام أستراليا كان هو اللي بيسخن مصطفى شوبير خلال الإحماء، وكان هو اللي واقف على الخط بيديله تعليمات في ركلات الترجيح. الشناوي كان بيحلم يلعب ولو دقيقة واحدة في كأس العالم، عشان يبقى الحارس الوحيد في تاريخ مصر اللي شارك فعليًا في بطولتين كأس عالم، ورغم إن ده محصلش، ما نزلش حتى ستوري ولا حرف يقول فيه إنه زعلان. بغض النظر عن الشناوي اتستبعد للإصابة أو لسبب فني، محدش اعترض على اختيارات كابتن حسام حسن. ده حق أصيل له. إنما معلش يا كابتن حسام… الشناوي إمتى كان منتهي؟؟ الشناوي الموسم اللي فات، 2026، مع الأهلي كان لاعب 19 ماتش، ومصطفى شوبير لعب 20 ماتش. يعني إنت أخدت الاتنين حراس اللي بيشاركوا مع الأهلي. وقبلها، موسم 2025، الشناوي كان لاعب مع الأهلي 36 ماتش. يا كابتن حسام، إنت مجاملتش الشناوي. الشناوي راح المنتخب عشان خبراته وتاريخه مع المنتخب. إنت أخدت من الأهلي 2 حراس، الاتنين اترشحوا لجائزة أحسن لاعب داخل القارة، مش بس أحسن حارس. وبدليل إن الشناوي، في الموسم اللي إنت بتقول عليه، هو اللي لعب معاك كأس الأمم أساسي، ولعب 5 ماتشات من 6 في البطولة. وقبل كأس العالم، كنت محتار هتبدأ بمين، وأديت كل حارس من ولادنا، الشناوي ومصطفى، شوط في مباراة روسيا. ولعب مصطفى وتألق، وإنت عارف إن معاك على الدكة حارس يشيل في أي وقت، بخبرات واسم الشناوي. فاللي اتقال النهاردة ده عيب… وعيب أوي والله. اختياراتك حقك، إنما اللي اتقال منك ده مش حقيقة، ومش واقع، لا بالأرقام ولا بالأحداث اللي حصلت. يا كابتن حسام، إنت كان مفترض تكبّر حارس كبّرك في كل المواقف دي، وكان قد المسؤولية وتعامل كقائد. فمستحيل تكون دي طريقة رد الجميل… مستحيل.