انا قعدت ١٥ سنة بلف على الدكاتره عشان أحاول أخلف.. لفيت العالم روحت إيطاليا وامريكا وسويسرا وفرنسا ودول تانية كتير ده أنا حتى حاولت أعمل اطفال انابيب بس للأسف حتى دي منفعتش والدكاترة في الآخر نصحوني أني انسى موضوع الحمل خالص وفكرت أتبنى طفل مع أني كان نفسي في حته مني وقالولي في أمريكا هنشيل لك الرحم عشان ميحصلش حمل كاذب وده فعلا مرض حقيقي ومش سهل ومع ذلك رفضت وبعدها رجعت على مصر وسلمت أمري لله وقولت لنفسي خلاص ده قدر ربنا ومكتوب و ربنا مش كاتبلي أني أبقى أم و أخلف لحد ما يوم حسيت بمغص جامد أوي و تعبت بس ساعتها كبرت دماغي مهتمتش.. ولما لقيت الوجع زاد روحت المستشفى وبعد ما الدكاتره كشفوا عليا لقيتهم في حالت ذهول وعلامات التعجب على وشهم وطلبوا مني تحاليل أنا كل اللي جه في دماغي ساعتها انهم لقو حاجة وحشه لقدر الله بس بعد شويه لقيت الدكتور جاي بيقولي مبروك أنتي حامل طبعاً أنا مصدقتش نفسي من الفرحه ومكنتش مصدقه وداني لقيت الدكتور بيكررهالي أيوه زي ما سمعتي أنتي حامل جاتلي حالة فرح هستيري لقيت الدكتور بيقولي جمله عمري ما هنساها ابدا.. قالي أنتي علمتيني مقولش لواحدة أنها مش هتخلف.. وفعلا إذا اراد الله شيء قال له كن فيكون لا تيأسوا من رحمة الله 🤍 ( مها أبو عوف )