فلاح بن مانع

(هاتف العمله) راحتي وعنايتي في يدك ياجزل الوهايب دلّني قدام لاتغويني النفس الكتومه تكتب الأقدار وتصرف ذعاذيع الهبايب كل شيً تعرفه قدّام لانعرف علومه والا أنا لو أقدر احرك مراويح السحايب كان خليت المزون من الرياض اليا تنومه للصعاب من الظروف وللكبار من النوايب احتزم بالمعرفه وضلوعي العوج محزومه مااتخلاّ عن بنود المعرفه سلم وحرايب المبادي فالمحبه والمبادي فالخصومه لو تغيب الشمس عن مطلاعها مانيب غايب عن مواقيف البلاد اللي عن الظيم محشومه الظروف ترد مثبور العزوم اعن الرقايب مير ماتقدر ترد الذيب الأشهب عن سلومه والسيوف الفارقه تطلع من بطون المصايب والشجاع اللي يبا الامجاد ماتقصر عزومه ماتدرّق عن وجيه الخيل ووجيه اللهايب لو تنصّاه الفشق ماجاه يومً غير يومه احترامي للسلوم وللقبور وللنصايب واحترامي للنضام يخلي النفس معصومه اعرف ان اللي وقف في موقفه مقدي وصايب فالدفاع اعن الوطن وعن القياده لاتلومه الوطن يفداه مال وروس وارواح وركايب ينتصر بعناية الرحمن والروم مهزومه. قبلة الدين الحنيف وثامن السبع العجايب مع هل العوجا وغايات المعادين مهدومه كل ما هدا لهيب النار زدناها شبايب لين خلينا وجيه اهل الدنانير مخطومه المثايل زينها همّة ولد وسلوم شايب والقصيد المعتبر مافي سماه الا نجومه واعرف ان المرتزق خايب ومن يعطيه خايب لا يدافع عن وطن ولايدافع عن حكومه لو يعذرب ديرة التوحيد ملعون الصلايب والله انّه ما يشم ترابها ولايهومه من ورا الجوال ياكثر القصايد والطلايب والحقيقه لو يواجه له مره تاخذ هدومه انت مثل الحر الاشقر مير بعيون الحبايب وفي عيون اللي يعرفون الحرار الشقر بومه كثر ماقابلتنا عشرين مرّه وانت هايب كثر ماشفناك تغشاك اللطافه والنعومه انتبه ياهاتف العمله يحطونك سبايب البحر لو يحذفونك فيه ماتقدر تعومه لاتقلد كل من شاف المذله والغلايب استرح في ديرتك ياخبل والحرب محسومه معركة تغلب وبكر يقودها جيش وكتايب وانت لابكري ولا انت بتغلبي ناخذ علومه والله إنّا نحقر الشعّار لاصارو جلايب تشتريهم فالقسا وتبيعهم وقت العزومه

محاربين اهل المبادي كل عام يبغون طيحتهم وهم دايم وقوف اللي تهمّه وقفته خلف الامام عند الله الخلاق عارف ومعروف واللي حياته لاصلاه ولاصيام لاتحتزم به لو تحزم بالهنوف نطوّع طبوع الاصايل باللجام ونتوج بيوت القصايد بالحروف اليا تراجعنا رجعنا عن ملام واليا تقدمنا تقدمنا الصفوف