Saif Ur Rehman

دبئی میں مقیم ایک پاکستانی رائیڈر کی ویڈیو سوشل میڈیا پر وائرل ہو رہی ہے، جس میں اس نے ان لوگوں کو مؤثر جواب دیا ہے جو اسے برسوں سے کرائے پر رہنے اور جائیداد نہ بنانے پر تنقید کا نشانہ بناتے ہیں۔ رائیڈر نے بتایا کہ وہ گزشتہ 8 سال سے اپنی فیملی کے ساتھ دبئی میں رہ رہا ہے اور اس عرصے کے دوران تقریباً ڈیڑھ لاکھ درہم صرف گھر کے کرائے کی مد میں ادا کر چکا ہے۔ اس کا کہنا ہے کہ لوگ اکثر کہتے ہیں کہ اگر وہ یہ رقم بچا لیتا تو آج اس کے پاس پلاٹ، گھر یا جائیداد ہوتی، مگر وہ ان باتوں سے بالکل پریشان نہیں ہوتا۔ رائیڈر کے مطابق "مجھے پلاٹ نہیں چاہیے، مجھے اپنی بیوی اور بچے اپنے پاس چاہئیں۔" اس نے کہا کہ اللہ تعالیٰ نے اسے ایسا حوصلہ اور دل کا سکون عطا کیا ہے کہ وہ خوشی سے اپنی فیملی پر خرچ کرتا ہے، نہ اسے پیسے ضائع ہونے کا افسوس ہے اور نہ ہی لوگوں کے طعنے اس پر اثر انداز ہوتے ہیں۔ اس نے مزید کہا کہ بہت سے لوگ ساری زندگی پیسہ جوڑ کر بڑے بڑے گھر، پلاٹ اور محلات بنا لیتے ہیں، لیکن بعض کو ان میں رہنے کا موقع بھی نصیب نہیں ہوتا۔ اس کے برعکس وہ روزانہ محنت کرتا ہے، شام کو اپنے گھر واپس جاتا ہے، اپنے بچوں کے ساتھ بیٹھ کر کھانا کھاتا ہے اور اسی زندگی کو اپنی سب سے بڑی کامیابی سمجھتا ہے۔ رائیڈر کا کہنا تھا کہ سوشل میڈیا پر لوگ کمنٹس میں لکھتے ہیں کہ اس نے کچھ نہیں بنایا اور سارا پیسہ کرائے میں ضائع کر دیا، مگر اس کے نزدیک اصل دولت ذہنی سکون، اہلِ خانہ کی قربت اور اللہ کی رضا ہے، نہ کہ صرف جائیدادیں جمع کرنا۔ رائیڈر کی یہ گفتگو سوشل میڈیا پر تیزی سے وائرل ہو رہی ہے، جہاں ہزاروں صارفین اسے قناعت، شکرگزاری اور خاندانی زندگی کو ترجیح دینے کا خوبصورت پیغام قرار دے رہے ہیں۔