🔴 شفت من شوية فيديو للكابتن مدحت شلبي وهو بيعتذر للكابتن محمود الخطيب، وبصرف النظر عن إن الاعتذار ده جه بناءً على نصيحة، في ظل اقتراب المسار القانوني من الوصول لنتيجة ممكن تكون ضده، فالمشهد ده فكّرني بمواقف سابقة لشخصيات كتير، من بينهم الكابتن مصطفى يونس، انتهى بيهم الأمر للاعتذار للكابتن الخطيب بعد ما وصل الأمر للمسار القانوني. ⚖️ والحقيقة إن المشهد ده بيخليني أفكر في حجم الصبر اللي الراجل الاسطورة الخطيب تحلّى بيه، رغم إنه كان يقدر يرد بشكل مباشر، لكنه اختار ياخد حقه بالقانون، من غير ما يدخل في مهاترات أو ينزل لمستوى أي إساءة اتعرض ليها. 🤝 وجهة نظر.. التسامح جميل، والعفو من شيم الكبار، لكن صاحب الحق هو الوحيد اللي من حقه يقرر إذا كان هيعفو ويتسامح، ولا هيتمسك بحقه.. ومحدش من حقه يفرض عليه قرار أو يزايد عليه في أخلاقه، أيًّا كان اختياره. ❤️ الكابتن محمود الخطيب بيتاجر مع ربنا، مش مع البشر، ودي نقطة مهمة جدًا.. لأنه في النهاية مش مستني شهادة من حد على أخلاقه، ولا محتاج يثبت لأي حد إنه كبير بتسامحه أو بمواقفه. 🤲 لكن اللي أتمناه فعلًا إن الناس تفهم إن الصبر مش ضعف، وإن السكوت عن الإساءة مش عجز، وإن احترام الناس ومكانتهم مش اختيار بنفتكره بس لما نلاقي نفسنا قدام المساءلة القانونية. ⚖️ الراجل ده صبر كتير جدًا على ناس كتير في الوسط الرياضي المعفن ده، واتعرض لإساءات وتجريح كتير، وفي النهاية كل شخص مسؤول عن كلامه وتصرفاته، والاعتذار مهما كانت قيمته ما يسلبش صاحب الحق حقه في إنه يقرر بنفسه إيه الأنسب ليه. ❤️🔴 الكابتن محمود الخطيب بالنسبة لي مش مجرد أسطورة كروية ولا أعظم اللي لمسوا الكورة في تاريخنا.. ده نموذج يُحتذى به، ومثال يُقتدى بيه رياضيًا وإنسانيًا وأخلاقيًا قبل أي حاجة تانية. شخصية الواحد يقدر يتعلم منها كتير، مش بس في الرياضة، لكن في الحياة نفسها.. في الصبر، وفي ضبط النفس، وفي احترام القانون، وفي إزاي تحافظ على قيمتك ومبادئك مهما كان حجم الإساءة اللي بتتعرض ليها، من غير ما تفقد احترامك لنفسك أو تنزل لمستوى غيرك. 👏 يمكن دي من أهم الحاجات اللي اتعلمتها من الكابتن محمود الخطيب، إن قيمة الإنسان مش في قدرته على الرد، لكن في طريقة تعامله مع المواقف الصعبة، وإن المبادئ الحقيقية بتظهر وقت الاختبار، مش وقت الكلام عنها. كل الاحترام والتقدير للكابتن محمود الخطيب.. قيمة كبيرة في تاريخ الرياضة المصرية، ونموذج نفتخر بيه ونتعلم منه، وهتفضل مكانته أكبر من أي إساءة، وتاريخه أكبر من أي محاولة للنيل منه. ❤️🤲🔴🦅