𝖺𝗃𝗆𝗂

t.me/ll9aw حياكم 🤍

لا عاد تنشد ويش وسط الحنايا صدر الشقاوي بـ التشوّق مشقّا شوّقت قلبي من جميع النحايا النبض والاحساس . . واللي تبقّا حتى الريايا ما بقى بي . . ريايا حطيتها لك فرش وامش وتوقّا اخاف من شوقي تحوشك شظايا ماهو بـ شوق وبس شوقي ترقّا ورّدتني لـ اخطر حياض المنايا واثرك على الميراد للموت سقّا الله حسيبك . . يا خبيث النوايا تضحك لي . . ونيّاة قلبك تتقّا ترسل لي سهوم المنايا هدايا ! وعادك من اهداءات روحي تلقّا ما زلت تسأل ويش وسط الحنايا لكن ما زلت اقول . . طبّ وتنقّا (:

اعترض لي زول غرو خيال من خيال رجحّ كفوف المشاعر وقفابيّ ذليل خاضع لـ اعجاز خلق فصل فيه الجدال باهت من شدة الوصف و عيوني إتخيل جادل ماهي بـ كامل واقرب للكمال ماخذه من كُل طرقا تعلت كل جيل فتنة ربي عطاها مع الزين . . الدلال وهيبة حضور الاكابر وسيف ابن الطويل في محياها مناخ . . حوى كل الجمال شمس صبح في قفى غيم وبروق ومخيل وفي نظرها ما يسمّى بـ ساحات القتال يوم هازة والمحتني بـ مريوش كحيل ظلّ به حمر الجـنايا وخدينن زلال كنها ورد ربيعي . . على طرّاف سيل وثغرها بـه غبة الموت لـ زحول الرجال وعيشة الخُلد الهنيّه وطعم السلسبيل وعنق ريم فوق . . متن عليه من المثال ما كسى الكعبه سواده وفي هيئة جديل من وحوش البر تاخذ شوي من الغزال فوق ماهي كنّها مهرة الشيخ الاصيل لا وقفة كنها شناح . . غلاها ما يطال ولا جلسة كنّها توايق ورى شي طويل ويوم تقبّل قلت للجوع فيها بـ العدال ! ويوم تقفي قلت نعمة الله فيها ما تكيل (:

كن رمش عيونها سيف يشيله حاكم ما خلق في وسط قلبه رحمه وماويّه عنقها تضفي عليه بشعرها المتراكم ولولها المنضود دونه جمرتين حيّه يا عواذل حـبّنا . . غنّوا على ليلاكم ! شحّت الدنيا عليّ و جادت بـ حوريّه (:

تدلعي وامشي على روس الاقدام قولي لهم يـ الفاتنـه . . من فتنتي لو ما القصايد عن تفاصيلك صيام علمتهم يا احلى الصبايا من انتي ؟ انتي الغلا . . وانتي الهوى وكل الاحلام وانتي اللي في عرش الجمال استكنتي كل العذارى بـ طلّـتك صارو اوهام كنّك على كل البشر . . قد فتنتي (:

قد بغيت اترك هوى الغيد يا شايم واتوب واعترض لي خشف ريم . . على اول شبته زينه الطاغي . . يداوي ويجرح له قلوب وما يصايد بـ الهوى شّف . . ناس حبته القمر والشمس والليل معّ برق النصوب تجتـمع . . ما بين وجهه . . وطلة لبته (:

يا هل المشفى دكاترك خساير فنشوهم في . . حضور البابليّه المريض . . اللي تزوره له سفاير هي علاج اللي مواجعهم خفيّه وسعوّ عن دربها يا هل الضماير لحد ياخذ له الذنوب . . وخطيّه خصرها يوم يتغريف بـ الظفاير ذيل شقر تصطفق به شوشليّه يا عيون موحش . . للجول غاير علموه الصيد في صلب هجريّه

ربيب الفـلا بدّ المـلا . . غالي واغليه ومن كان غيره . . ما طرالي على بالي اعـزّه . . واقدّر من يعزه . . ومن يغـليه واداري هله وارخص على شانه الغالي وانا لا زعلت اترك هوى خاطري وارضيه وهو ما يحاول يكسب . . رضاه بـ زعالي خليل خيال . . مغيزل العين ما يخطيه ليا اخطيت من زوله خياله . . يورالي !

بـ البيان وبـ الخفا مذهب قلبي ذهاب قالوا العذّال ليتك . . تعالج قلت لا ): علّتي ودواي في شوف حوري الشباب إن رحمني طبت وإن ما رحم هذا البلا ! كان جا مني خطا فـ انت عاتبني عتاب ارحم اللي بان منه الخلل بين الملا ): دعوة المظلوم . . يا نور عيني تستجاب خاف من الله وارحم اللي في حبك ابتلا !

وبعد كل هالتقدير والحب والاجلال تغيّر وهقواته . . عليّه . . مغيـرته ! تكاثر علي الله يجازيه . . كيف الحال وانا يوم اسوق العمر له ما تكاثرته ): لبسته ثياب الغطرسه لين جاء يختال و كبر في عيونه يوم . . الاوهام غررته واذا السالفه ضحك ومهازل ولعب عيال خبطت الغصن لين ابرق الريش طيرته خلصنا وقفلنا الصناديق . . بـ الاقفال ومن جور حكمه . . كامل القلب حررته

سقى الله يوم كنت أجيك في ثوب من الاحساس ضرير كل ما نطحّـته يدينك . . رجع شوفه !

يا حبيبي ليش تتركني . . امخلا تركت اللي صاح في ربعه وخلي كان مقصد صدتك . . مني تغلا والله أنّـا شابعين من التغلي ! وكان مقصدها على اعصابي تسلا فأننا لله من . . بعض التسلي كل يوم وانت . . بـ الفرقى تبـلا والبـلا . . ما يجلبه غير التبلي ):

بكيتك بـ العيون اللي سرق منها الحنين نعاس وخلاها رهينة . . لـ السهر و الليل و طيوفه بسيطات الدموع إلا دموع القاسي الحساس حصان قبل ما تنزل دموعه ينمزع جوفه ): دموعه من غلاها . . ما تركها للثرى تنداس تساقط من شموخ ولا تطيح إلا على كفوفه سقى الله يوم كنت أجيك في ثوب من الاحساس ضرير كل ما نطحّـته يدينك . . رجع شوفه !

لا زلت اقول الحي بـ يصادف الحي رغم اني اواجه . . معاك الف عدّه قيدين في رجلي وقيدين فـ يدي وبيني وبين الوصل عشرين شدّه وش اللي مجلّس طيوفك حوالي وانا مسافر . . روحـه بدون ردّه تبعـتني لندن . . وبيـروت ودبي ورحلة رياض كويت وكويت جدّه ان كان مرخصني من العام لا شي يقدر يحكم الهارب . . من المودّه !

عيطموس بين جمرة ثغره . . وتفاحتينه خنّـة ازهار الربيع . . وليلة يوضي قمرها جيتها وانا الشجاع اللي يقول الموت وينه ونطحتني بـ العيون السود وارهقني حورها ماهقيت السيف الاملح ينثلم من ياسمينه لين عنّت خيل فتنتها . . علي والله نصرها

فارع تلغي قبول الناس . . يوم تقبّل تستفز الغيم ويضم الثرى بـ اشناقه تسهج دروب المشاعر بـ الغيا وتذبّل كل عرق ما عليه من الطعون إللحاقه الخواطر ترتجـيها . . والغرام مدبّـل وفي عذوبتها تموت الجمره الحرّاقه (:

تكلمت مشاعري عنك . . وفضّـلت السكات لان الذكاء في غير ما تقنع به العاقل . . غبا ! والا وصوفك كايدات ومعجزات . . ومتعبات تبغى لها ساحر من الكوفه وهدهد من سبا (:

أنتصرتي . . والهزيمه كايده يـ ام اللثامه ألهميني كلمتين جداد . . وأرميلك عتادي لا طريتي كن طاري لـ العرب قصر اليمامه وإن زعلتي . . تحزنين الليل يا ريشة عبادي جل من سخّر لك الليله . . وكل ليله علامه كيف اسولف لـ الجمر و الثلج عن كبوة جوادي ! ليه أكابر ؟ والليالي برد . . والدفوه سلامه وأنتي اللي ما وقفتي بينهم وقفة حـيادي عاشقك قلّت مواعيده . . وزاد من اهتمامه لا الصدف تشفي غليل ولا حياة لمن تُنادي ):

وش ذا الخفوق العطيب اللي على ناره وش ذا الجفا اللي ماهو منك ولا مني مشتاق لك يا اقرب من الثوب لزراره شوق ابو نوره . . لكني ماعرف اغني ): ادري ماني بـ إختيار . . سهل تختاره ظني لو افتش غلاي بـ يختلف ظني ! وادري لو اموت لك واعيش لك تاره بـ عيش واموت ما انت بـ داري عني ):

من يقنع الشوق بـ أشغالك وبـ ظروفك أقنعت قلبي . . وعيّـا يقـتنع . . قلبي دقايق ما أسمعك فيها . . ولا أشـوفك يا ويـن بـ أروح من تفكيري السلبي ؟

خلني اعلمك بـ الحاصل قبل ليلتين في مقام من وجيه . . العرب مزدحم مر طاريك والله . . يكرم السامعين كن ما في قواميس الكلام . . ونعم ما اقدر اقول وش قال اغلب الحاضرين انـا نادم على سمعتك . . أشـدّ الندم يا حسافه على . . التيجان والنجمتين والشوارب والاسم اللي في اخر الاسم !