جب قائداعظم نے پاکستان کا پہلا وزیراعظم بننے کے بجاے گورنر جنرل بننے کا انتخاب کیا تو کسی اخبارنویس نے ان سے سوال کیا کہ جس گورنمنٹ آف انڈیا ایکٹ کے تحت دونوں ڈومینین ریاستیں وجود میں آ رہی ہیں ان میں انتظامی اختیارات وزیراعظم کے پاس ہوں گے اور گورنر جنرل برطانیہ کے نمائندے کے طور پر صرف نمائشی عہدہ ہو گا، تو پھر انھوں نے یہ انتخاب کیوں کیا۔ ان کا جواب تھا: پاکستان میں انتظامی اختیارات گورنر جنرل کے پاس ہوں گے۔ اور ایسا ہی ہوا۔ نہ صرف صوبہ سرحد اور سندھ کی صوبائی حکومتوں کو برطرف کرنے، قلات، لسبیلہ اود دوسری ریاستوں کو برٹش بلوچستان کا حصہ بنانے، اور کشمیر کی آزادی کے لیے قبائلی جہادی بھیجنے کے فیصلے گورنر جنرل نے کیے بلکہ مرکزی کابینہ کے تمام اجلاسوں کی صدارت بھی کی اور ان اجلاسوں میں وزیراعظم کو دوسرے وزیروں کے ساتھ پہلو میں بیٹھنا پڑا۔ تمام اختیارات اس وقت تک گورنر جنرل کے عہدے میں مرکوز رہے جب تک انھیں دارالحکومت سے ہٹا کر خرابی صحت کی بنا پر زیارت نہ بھجوا دیا گیا۔ جب خدا خدا کر کے انھوں نے رحلت فرمائی تو وزیراعظم لیاقت علی خاں نے چار دن اتدار کے مزے لوٹنے کا ارادہ کیا اور مشرقی بنگال کے خواجہ ناظم الدین کو گورنر جنرل بنا دیا۔ اس کے بعد سہارنپور سے آئے ہوے مولانا شبیر احمد عثمانی کی بنائی ہوئی قراردادِ مقاصد کی منظوری، پبلک سیفٹی ایکٹ کے نفاذ، جنرل اکبر خاں (مجاہد کشمیر) کی سویلین حکومت کو ٹھکانے لگا کر فیض، سجاد ظہیر وغیرہ کی مدد سے فوجی انقلاب برپا کرنے کی سازش پکڑنے، کمیونسٹ پارٹی پر پابندی لگانے وغیرہ کے تمام فیصلے وزیراعظم نے کیے۔ کابینہ کے اجلاسوں کی صدارت کی حسرت بھی غالباً جی بھر کر پوری کی۔ لیکن فلکِ ستمگر کا کرنا کیا ہوا، اپنی بدقسمتی (اور اپنے مخالفوں کی خوش قسمتی) سے وہ کمپنی باغ کے ایک جلسے میں گولی کا نشانہ بن کر دنیا سے پردہ کر گئے۔ اس کے بعد جو سیاسی تبدیلیاں ہوئیں ان کے نتیجے میں اصل اقتدار ملک غلام محمد، چودھری محمد علی گروپ کے ہاتھ میں آ گیا اور ملک غلام محمد نے گورنر جنرل کا عہدہ سنبھال کر اس میں دوبارہ اقتدار کی روح پھونک دی۔ خواجہ ناظم الدین نے اپنی دانست میں چالاکی سے کام لیتے ہوے خود کو گورنر جنرل ہاؤس سے پرائم منسٹر ہاؤس میں منتقل کر لیا اور سوچا کہ شاید اب ان کا راج ہو گا۔ یہ ان کی خام خیالی تھی۔ تین برس بعد جب ملک غلام محمد نے ان کو کھڑے کھڑے ڈسمس کر دیا تو وہ حیران رہ گئے۔ بعد میں کسی نے ان سے پوچھا کہ بھارت نے تو اپنا آئین بنا کر واضح کر دیا ہے کہ جمہوریہ کے تحت اختیارات کی تقسیم کس طرح ہو گی، پاکستان میں یہ تقسیم کس طرح ہے؟ ان کا جواب تھا: جب میں گورنر جنرل تھا تو اختیارات وزیراعظم کے پاس تھے، اور جب وزیراعظم بنا تو گورنر جنرل کے پاس چلے گئے۔ فاعتبروا یا اولی الابصار۔ اکستان کے تیسرے گورنر جنرل ملک غلام محمد کی ثنا، ان کے پرائیویٹ سیکرٹری محمد بشیر (م۔ ب۔) خالد کی کتاب "ایوان صدر میں سولہ سال" سے۔

جنرل کیانی بہت سادہ زندگی گزارتے تھے، صرف دو ٹوتھ برش تھے، ایک سارا گھرانا استعمال کرتا تھا اور دوسرا صرف مہمانوں کے لیے مخصوص تھا۔۔