من الآفات اللي صرت أشوفها منتشرة في العمل: ناس مستعدة تحلل وتسولف عن الشغل لساعات، لكن ما تمسكه بيدها ولا دقيقة متأكد إن كل واحد مر عليه شخص في العمل مرتب، ويبدو عليه الذكاء، وانطباعك الأول عنه إن عنده سالفة وين المشكلة؟ 
أول ما أحد يعطيه مهمة لازم يسويها، تكتشف الوجه الثاني لهذا الشخص: مستعد يناقشك لين بكرة في الشغلة اللي كلفته فيها، ومستحيل يبدأ فيها في نظري الموضوع أبعد من إنه يكون كسل، وهذي بعض التفسيرات: 1. حماية الصور الشخص اللي ما يجرب يقدر يضحك على نفسه ويقول: «لو بغيت، سويتها» 
بينما في الحقيقة، عمل الشيء ممكن يؤدي للخطأ، والخطأ عند بعض الناس عيب و يخرب صورته قدام الآخرين في 1998، سوّت عالمة النفس كارول دويك تجربة على أطفال: أعطتهم اختبار بسيط، وبعد ما خلصوا قالت لنص الأطفال: «أكيد إنك ذكي»
والنص الثاني: «أكيد إنك اجتهدت» بعدها خيرتهم: تبي مسائل سهلة تنجح فيها أكيد؟ ولا مسائل صعبة تتعلم منها؟ قرابة 70% من اللي انمدحوا على ذكائهم اختاروا السهلة 
بينما أقل من 10% من اللي انمدحوا على اجتهادهم سووا نفس الشي ليش؟ 
لأن الطفل اللي انقال له «أنت ذكي»، صار عنده لقب يخاف يخسره والمسألة الصعبة ممكن تكشف إنه مو ذكي مثل ما قالوا وهذا بالضبط يفسر ليش الشخص اللي يبان عليه الذكاء، هو بالذات اللي يتهرب من التجربة والنتيجة؟
شخص يحبس نفسه في منطقة السواليف 2. الكلام يعطي شعور الإنجاز ليش مستعد يناقشك لين بكرة؟ لأن النقاش نفسه يعطيه إحساس إنه اشتغل
دراسة من جامعة نيويورك في 2009 وجدت إن الناس اللي يعلنون أهدافهم قدام غيرهم، يبذلون جهد أقل لتحقيقها، لأن الكلام أعطاهم جزء من الرضا مقدمًا يعني كل ما تكلمت أكثر عن الشغلة، خف دافعك تسويها 3. المكانة والاستحقاق شباب كثير يحسون إن مكانتهم تستحق أكثر من بعض الأعمال، ولذلك يتجنبونها بطرق إبداعية: الانتقاد، والتحليل المبالغ فيه للمطلوب، بدل إنجازه 
في 1899 كتب الاقتصادي ثورستين فيبلن إن الطبقات العليا تثبت مكانتها بالابتعاد عن العمل المنتج نفسه 
بعد أكثر من 120 سنة، الفكرة ما ماتت، بس تغير شكلها: صار مسك الشغلة باليد علامة إنك ما وصلت بعد (مانت كفو/كشخة/ ناجح) مع إن أفضل الناس اللي شفتهم، مهما كبروا، ما زالوا ما يستنقصون من أهمية إنجاز الأعمال مهما صغرت مثال: أبو محمد @A_M_Dosari بنى منتجات ايراداتها بالمليارات لكن مازال يبني بنفسه منتجات دخلها ما يتجاوز عشرين ألف بنفس الحماس و الإخلاص ================ في الختام، اللي يعمل يخطي و اللي يخطي يتعلم و الناس يحترمونه، و العكس بالعكس