يازين الحظوظ اللي رمتني على مرماك
عنودٍ تقود الصيد ، واليوم منصاده
لا تستغرب اللهفه على ضحكتك و رضاك
رضاك السحاب وضحكتك صوت رعّاده
تمادى علي أكثر مدام الغلا ولّاك
لك القلب منقاد ولك النفس منقاده
أحبك قبل لا أختار في وصلك و فرقاك
ولا فيه أحد يختار موته و ميلاده
أنا أحق بـ أنسام الهوى من غصون الراك
لو أني ما اميل أن هبت النود بزياده !
معي من بعد هذا الغياب الطويل ادراك
ادراك اللي يدري بـ الخطا كل ماعاده !
افك الستاير وانتظر من ورا الشباك !
متى الليل يجبر خاطري واكسر سهاده
حبيبي من اللبيه ، لا يا عساه فداك
ما عندي لك الا قلب بما نبض جاده
يناديني النسيان و اسمعه ذكراك !
على صوت فيروز وعلى القهوة السادة
يازين الحظوظ اللي رمتني على مرماك
عنود تقود الصيد و اليوم منصاده
لا تستغرب اللهفه على ضحكتك ورضاك
رضاك السحاب وضحكتك صوت رعاده
تماديت في قلب جبره الحنين وجاك !
و معجبني إنه فيك " مسلوب الإراده "
تمادى علي أكثر ، مادام الغلا ولاك !
لك القلب منقاد ولك النفس منقاده
أحبك ، قبل لا أختار في وصلك و فرقاك
ولا فيه احد يختار موته و میلاده
وش الورد و ليال الهوى و الشعر لولاك ؟
يا فرحة ملذات العمر و أجمل أعياده
انا لو دريت اني بحبك قبل لا القاك ؟
ما عشت أتمنى حظ ( ليلى و ولاده )
وانا لو عرفت أسمك قبل طلة محياك !
تبي تشوف حرف اسمك على عنقي قلاده
ُ retweeted
اللهّم كما أمطرت علينا من خيرك أمطر على قبور من رحلوا عنا من سحائب رحمتك واجعل لهم في كل قطره مطر راحه ومغفره يارب❤️.
حنين و ليلةٍ غرا و دمعٍ من عيوني سال
و ذكرى و أمنيات و شوق يسترسل مع أنفاسي
معاناة و مشاعر بعضها من بعضها تنهال
على قلبي و قلبي سلم الشاره لـ هوجاسي
أنا يا عين أبوي إن شحت الدنيا و شان الحال
عزومي راهيه ما تنثني لو ينثني باسي
لك الله ما بقى فـ البال غيرك يا خلي البال
يروحون و يجون إلا أنت ثابت كنك أحساسي
تهادى من دلع و اليا لفيت بـ مشيتك تختال
خذيت اللي تبي قدام حضرة قلبي القاسي
وش اللي غير شوفة ضحكتك يغني عن الفنجال
وش اللي غير صوتك لا سمعته يجلي عماسي
غدت روحي رهينه بين عنق و بين حبة خال
و بين مبيسمٍ لو ذقت منه طحت متواسي
فداك اللي مضى و اللي بقى و اللي بعد لا زال
تراك أنت الوحيد اللي له اذعن قلبي و رأسي
تربع في حشاي و حط لك في قمته منزال
و إذا غيرك يجي و يروح أنت أساسًا أساسي
تجاوزتك يا جرح الكلمة إللي قالها مجروح
تجاوزتك يا كذب الكلمة و يا صدق راعيها
مناضيح المواجع تتضح لك في شفيف البوح
تبـيِّن الوجعه إللي في صميم القلب كانيها
و أنا بين الخطأ و الصح ما قرَّرت وين أروح
أخاف و خوف الأنفس ما يوصَّلها مشاهيها
أجامل لي عبادٍ ما لها في دنيتي مصلوح
أعرف وجيهها و أصواتها و أجهل مباديها
يقولون السحابة في مثانيها البروق تلوح
و أنا أقول السحابة تحمل الماء في مثانيها
عساها تنهشم فوق الضلوع إللي تحتها فوح
تطفِّي نارها ولا تقضقض ما بقى فيها
عروشٍ خاويه ما عاد فيها للسعادة روح
سكنها الحزن و أطفى نورها و أمحل بأراضيها
سقى الله يوم كانت تكتفخ فيها حمامة دوح
ترفرف للزهور إللي منابتها مواطيها
تطير الفجر لا غازل نواظرها شعاع الضُّوح
و ترجع مع مغيب الشمس قلبي بين أياديها
تقاوم خوفها و إليا تحشرج صوتها المملوح
أهدِّي روعها و أمسح يدي على ثناديها
سمحت من السنين إللي خذتها و الخطأ مدموح
ألوم ظروفها؟ ولا أرتجي فرحة لياليها؟
زمجري يا روحي الكثلاء و أنا بشكيك لله
ما ورا صوت إنكسارك وقفةٍ و تجيب ثاري
أشرحي للوقت نزوات الخليل أن غاب خلَّه
من قبل لا تكشف اللهفة ضياعي و إنكساري
الأماكن موحشة و الريح روحٍ دون ملَّه
كلما خفَّت جروحي .. زفَّت طعون الطواري
في زمان الذكريات الظلم بـ عيون الأهلَّه
سارقٍ من عين صبري دمعةٍ تشرح قراري
خالقي رحماك من واشٍ نوى فراق الأخلَّه
و فزز الماء في عيون المستريح و سال طاري
الخليل إللي عقب صدق الغلا و أسمي خِصلَّه
ما لقيت لـ طعنة فراقه مكانٍ وسط زاري
خالقي رحماك من قبل الجوى تزجي عللَّه
بين قسوات الطريق و بين دمعات إنتظاري
ما بقى من ذكرياته غير عهدٍ لو أخلَّه
خانت دروبي و خلتني على أرصفة إحتضاري
ليت في كفِّـ ي من عتاد الهوَى سيفٍ أسلَّه
لين ما تسقط سيادة حبَّها ذات الصواري
سابقي كم لي و أنا أعقد في مواثيقك و أفلَّه؟
ما هدا روعك ولا أرتاح بـ مساريك السواري
تغترب بين القوافل و ترتجي وجهٍ تجلَّه
لين ما تشرق على جروحك من شموس العزاري
تطلب شفاهك حنان يطمن جروح الأخلَّه
كل ما راود خفوقك كيف يجفى و أنت شاري؟
يا فؤادي لا تسأل كيف الهوَى صابك بـ خلَّه
و أنت تدري بأنك إللي فـ المحبَّـة كنت ضاري
من يحنَّ الروح غيري لو يخون الجذع ظلَّه؟
و من يداري دمعتك لا بان للقسوة مواري؟
أنت داري صاحبك لو طال حكيك ما يملَّه
و أنت داري هالجفا ما كان في يوم إختياري
إتكل و العمر باقي و الزمن ماراح كلَّه
لا تقاسي مر وقتك و أنت عادك وسط داري
فاتنك لو جاد صدره غيثٍ مسمى و بلَّه
ماتطهره المزون ولا ترجِّع لي وقاري
لي زمن و الوجه فاقد له ملامح مسفهلَّه
يشحذ أيامه تبسَّامٍ من جيوب إفتقاري
زاجيات الدمع لو للعمر رحلة مضمحلَّه
ما سلب روحي من يديني وداع ولا عباري
ما بكيتك من قصر كفِّـي ولا حزني جبلَّه
العليم الله و صدري من ثلاث سنين عاري
أغضف الليل البهيم و طار حلمي في رجاء الله
دعوةٍ تشرح معاناتي و غصَّات المساري
يا مُذهلة لو غايتك أبعد من شعور إنذهال
الناس تسأل كيف قمرا تكتب إحساس البدر؟
سبحان من جمَّع مزايا الخلق في أكمل مثال
أعجوبةٍ فـ الحسن و المنطوق و أعجوبة فكر
يا نجمةٍ جارت على الصبح و تجلَّت بـ إختيال
قولي لـ نُور الشمس لا يقهر عصافير الفجر!
زال الضيا و مشراق وجهك غير قابل للزوال
ثابت مثل دهشة قصيدة كِتبت لآخر شطر
يا نجمةٍ شعشع سناها و أبلجت منها الليالِ
جودي لـ سمَّار الليالي من تعاليل السمر
لدِّي النظر يا أم العيون إللي نهايتها إحتلال
ملامحك لا شافها المخطي يبادر بـ العُذر
أنتي اليقين الراسخ إللي ما يشوبه إحتمال
و أنتي الثواب إللي تجلَّى لي بعد شدَّة صبر
من حقق الله حلمه و نالك رغم أنف المُحال
يستاهل يعيش الحياة و بداخله نشوة نصر
يا مُترفة كل الكلام إللي على البال إرتجال
ما ضاعت علومي و لكن يوم شفتك؟ أنهمر
في ذمَّتك أنتي قصيدة صافحت كفَّ الخيال؟
ولّا قصيدة صادقة خُلقت على هيئة بشر؟
منطوقك العذب المعتَّق فيه من وجهك خصال
كأن القصيد مقاسمك نصف العذوبة و السحر
وجهك غواية للهُدى مدري هداية للضلال
محتار فيك إنسان ما قد حار بين أمر و أمر
بان الصباح اللي يرد الروح في صدر الحياه
عقب الظلام اللي لوى يدها و عرقل سيرها
تبللت منه الصدور اللي ضربها صفو ماه
و العاشق اللي لا هفت شمسه شكى تأثيرها
الليل لا شاف المحب يشد شد الإنتباه
لين يعكس وجهة مغاتيره و وجه بعيرها
ما ردني لـ لهفه الاولى ولـ اللحظه سواه
اللحظه اللي كانها غلطه ما ابي تبريرها
لا زلت يـ أول شارعٍ يجمع محب بمن نساه
أغلى علي من العباد أستاذها و أميرها
و لا زلت يـ أوّل من ملك قلبي و دوّج في حماه
الفارق اللي غلطتك ما بان لي تقصيرها
تقول هاه و عندي إن لبيه تشبه وزن هاه
الهاه منك كان جتني .. كثر الله خيرها
لا تحسبني معك ضايع لو عكست الاتجاه
الضايع اللي قدمه دروبك و يسلك غيرها
أنت الغناه لمن فقد فالعمر لذات الغناه
و القصه اللي كل يوم يشدني تكريرها
من ليلة البارح و أنا صمت محراب
بعد الخلود و قبل فجر المدينة
على طرف كأني دمع مُذنب و تاب
ناطر متى ترميني جفون عينه
أقرا الليالي كأني أقرا لي كتاب
حتى تجيني في خبرها جهينة
الله يزول أسباب و يهيِّأ أسباب
و من يستعن به جلَّ شانه يعينه
و إليا كتب للعبد رزقه و لو شاب
ما أحدٍ بـ حايل بين رزقه و بينه
رحَّال في بالي و وقَّفت مرتاب
فـ أطلال ما بين العشم و الضغينة
و مرَّت عليِّ وجيه لأحباب و أصحاب
ولا غايب إلا ما تسائلت .. وينه؟
هم عادوا أهلي؟ ولا هم عادوا أغراب؟
أو كل سنَّ و يستحي من سنينه؟
يا مستفزَّ الحزن في صدور الأحباب
ما للحزن غير الصدور الحزينة
لك بدر ما يظلم و لك ليل ما شاب
و لك برد ما يرضى بـ قسوته لِـينه
تشكَّلت من غيمة و من غصن عنَّاب
في طينةٍ ما هي بـ حيِّ الله الطينة
عدَا عيونك كانت طيوف من غاب
ذِكرى نسيمٍ هزَّ باب السكينة
من شفت فيها موج و رياح و أتعاب
رميت نفسي من عتبـة السفينة!
الموت في غبَّة حور طرفك أسباب
عن عيشةٍ ما هي في أيدٍ أمينة
وش لون ترميني على سيف الأهداب؟
و إللي ما يفنى حُر ينجى رهينة
صمتٍ ما يبغي عن متاهاتك رحاب
أتفه معاذيرك بـ عينه .. سمينة
عندي على كل إحتمالاتي عتاب
كل إحتمال في حينه و غير حينه
الشمس لو تاخذ من المشرق غياب؟
مُحال تاخذ لهفتي ياسمينة
قريب ليت الحلم يفتح لك الباب
بعيد ليت الدرب يندى جبينه
مثل النهر تتخلَّل إيدي و تنساب
و تقلَّ بي و تصبَّ فـ أبعد مدينة
عجلة خطاويك يا سنَّ الصبا و العمر نهَّاب
يسرقك من عارض الأيام و أطراف الليالي
على أثر جرَّتك كم ودَّا الزمن غالي و كم جاب
تسقى ربوعك من الخبت النفيه إليا المفالي
عوَّدت من طرقتي خاوي عزوم ولا لي أسباب
نكفت و إللي وراي البارحة عوَّد قبالي
رحت أقطع الشكَّ بالعلم اليقين و جيت مُرتاب
ولا فيه شيٍ من الوسواس الأبتر ما طرا لي
أرخيت للبال من حبل الرجاء و أدنيت جلباب
و شرَّفت مرقب و شمس عصير تاخذ ظلالي
واقف ولا بيني و بين الوجيه الرُحل حجاب
تمرَّ نظرات خلق الله و تعبر من خلالي
حبيبي و العمر مرَّة و الهوَى و الولف غلَّاب
و الناس واجد و يفداك المطرِّف و الموالي
عقبك و أنا منتحي ولا لي ربوع و ما لي أقراب
إن كان ما جدَّ علم من الهوَى؟ ماني بـ سالي
طويت من جملة سنيني دروب و صفحة كتاب
لا عاد تنشد عن إللي راح لي و إللي بقى لي
ما باقي إلا أنت يا سيِّد بهاء تلعات الأرقاب
لا تستفز الظنون المرجهنَّـه و أنت غالي
ما أحتلت يوم أتتقى عن عيونك شلف و حِراب
يا جعل ما للعيون إللي تفجَّ الصدر والي
نتقابل أغراب و نحبَّ و نذوب و نرجع أغراب!
و تسلى مع الوقت بين الناس و أعوَّد لحالي
و بكرة ليا دبَّرت عوج السنين و عارضي شاب
و أخذت أراجع قديم الذكريات و جيت في بالي
بأعرَّض الصدر ذعذاع الهواء في راس مرقاب
و أسبـل الدمعة إللي في الخفاء عزَّي لحالي
مكتوب ما لي على المكتوب رايٍ ولا لي عتاب
على المقادير و إللي راح؟ تقفاه التوالي
ولا أنت ما لي سواك أهل و وطن و ربوع و أحباب
لكن يعزِّيني من الهمَّ طيفك لا ضوى لي
بأعيش في فكرةٍ جاذب ونسها خاطرٍ طاب
و أذكرك و أضرب تهاتيه الخلا و أشعب رِحالي

