قل للضعيف اللي يلمّح ورانا قدّامنا ما تنفعك هالأساليب عيبك تلمّح وجيناك بهجانا واللي معه حجّة يواجه بلا ريب حنا لنا فعلٍ يشرّف لسانا وانت التفاخر ما ستر فيك هالعيب ما نبحث عيوبك ولا هو هوانا لسانك يكفّي عن جميع العذاريب لو كان قدرك يرتفع من هجانا كان السفيه أعزّ قدرٍ من الطيب يا كبر صوتك يا العفنا بقفانا وقدّامنا تبلع لسانك وتغيب زايد نجلّه وله قدرٍ معانا لا تستر بذكره قلة التهذيب حنا هل السيف نفخر بحمانا أهل الوفا والعزّ وأهل المواجيب نترفّع عن اللي ما بلغ مستوانا خلّوه، ما يستاهل الردّ والتعقيب -نـهار 🇸🇦

يا رخمة ما ترفعك كثرة الهذران فعل الرجال أهل المواقف يشهدونه تلمز ديار العزّ وتلفّ بالدوران وتحسب مرادك خافيٍ ما يفهمونه همزٍ ولمزٍ ثم تنكر بكل الأحيان هذا أسلوبك والوجهاء يستنكرونه عندك كلام؟ اطلع وقله لنا ببيان خلّ التخبّي والكلام اللي يلوّونه البس عباتك دام طبعك هو الكتمان واترك مجال الفخر للي يستحقّونه نحشم الخوّة ونقدّر مواقف الإخوان ونوقف مع الخوّي لو ربعه يخلّونه حنا هل الطولات من ماضي الأزمان تاريخنا لو تنكره غيرك يعرفونه ناطى على خشم المعادي بكل ميدان وعزّ الوطن بدمّنا وبأرواحنا نصونه -نـهـار 🇸🇦