Mamlaka ya Mapato Tanzania (TRA) imesema imebaini uwepo wa udanganyifu juu ya taarifa za forodha kwenye G-Wagon ya msanii Omary Nyembo (Ommy Dimpoz). Taarifa iliyotolewa na TRA leo Septemba 28, 2026, imesema operesheni ya ufuatiliaji wa ukwepaji kodi za magari nchi nzima ilifanikiwa kulifikia gari aina ya Mercedes-Benz G-Wagon lililokutwa katika eneo la Palm Beach Casino jijini Dar es Salaam Septemba 26, 2026 ambalo lilikutwa likiwa limeegeshwa bila namba za usajili, na uchunguzi wa awali wa taarifa zake ulionesha tofauti kubwa kati ya taarifa zilizowasilishwa wakati wa taratibu za forodha na hali halisi ya gari hilo. Imeeleza zaidi kuwa Namba ya utambulisho wa gari(VIN) ilibainishwa kuwa WDB4632762X322756, huku taarifa zilizowasilishwa wakati wa taratibu za forodha zikionesha gari hilo kuwa Mercedes-Benz G-Class G350, yenye mwaka wa kutengenezwa 2020. Hata hivyo, TRA imeeleza baada ya kufanya uhakiki wa kisayansi na kutumia Forensic, taarifa za gari hilo zilionyesha kuwa modeli yake halisi ilikuwa Mercedes-Benz AMG G63, yenye mwaka wa kutengenezwa 2018, gari ambalo thamani yake ni kubwa kuliko ile iliyowasilishwa katika nyaraka za awali. Kwa mujibu wa mamlaka hiyo, tofauti hiyo inaashiria uwezekano wa kuwepo kwa udanganyifu uliolenga kupunguza uthamini wa forodha na hivyo kupunguza kiwango cha kodi kilichopaswa kulipwa na baada uchunguzi wa tukio hilo pamoja na gari hilo mamlaka imesema imebaini kuwa limesajiliwa kwa jina la Omary Faraji Nyembo, anayefahamika kama Ommy Dimpoz. Haya yanatokea siku chache baada ya kusambaa kwa video mtandaoni ikimuonyesha Mbunge wa Jimbo la Kigoma Mjini Clayton Revicatus Chipando @babalevotz akizozana na Afisa wa TRA juu ya kukamatwa kwa gari hilo ambapo video hiyo ilijenga mjadala juu ya mipaka na mamlaka ya mbunge katika kujaribu kumzuia afisa huyo kutekeleza majukumu yake. Hata hivyo jana Septemba 27, 2026 Ommy Dimpoz aliomba radhi juu ya tukio hilo akisema kuwa yeye hakuwazuia maafisa hao. Na baadae Baba Levo pia alionekana kuandika ujumbe wa kuomba radhi mtandaoni.