كتاكيتو بنى

المصالحة لا تعني مساواة الدولة بالميليشيا شيخ الأزهر له كل الاحترام والمكانة… لكن السياسة مش مكان البيانات حسنة النية... الدعوة للجنة مصالحة عاجلة.. ووقف الحرب بين الأشقاء أكيد نيتها طيبة… لكن في التوقيت ده مش مقبولة خالص.. كنت أقدر أفهمها في بداية الأزمة.. مش بعد سنين من انقلاب الحوثيين على الشرعية في اليمن.. وضرب مطارات ومنشآت سعودية وسقوط مدنيين.. وتهديد أمن السعودية والمنطقة.. وتهديد الملاحة في البحر الأحمر اللي دفع الاقتصاد المصري تمنه كمان.. بخسائر هائلة تقدر بحوالي ١٨ مليار دولار من إيرادات قناة السويس خلال ٣ سنين.. وفي رأي الأخطر هو الاستشهاد بالآية: وإن طائفتان من المؤمنين اقتتلوا فأصلحوا بينهما... اللي كتب البيان... بقصد أو من غير قصد... ساوى بين دولة ومؤسساتها وبين ميليشيا مسلحة مارقة خارج الدولة... وحول المسألة إلى ..طائفتين من المؤمنين اقتتلوا.. وده منطق مرفوض وخطير. لأن كده أي فصيل مسلح.. طالما مسلم مؤمن موحد بالله.. يبقى طرفا مساويا للدولة لأنه هو كمان ..من المؤمنين! ده كلام خطر قبل ما يكون مرفوض.. لأنه بيزرع في عقل الشباب إن الإيمان ممكن يدي الميليشيا شرعية تساوي شرعية الدولة.... دي كدا مش مصالحة يا شيخنا.. دي هدم لأصل فكرة الدولة.... الإيمان لا يمنح الميليشيا شرعية الدولة… ولا يساوي بين السلاح الشرعي والسلاح الخارج عليها. سؤال أبعد من الحوثيين: فين كان الكلام ده من عقود التدخل والضغط الإيراني على دول الخليج؟ وفين كان أمام تجربة حزب الله؟ المشكلة مش في مذهب ولا دين… المشكلة لما السلاح يبقى خارج الدولة... ثم يتحول مع الوقت لأداة نفوذ سياسي وإقليمي أقوى من مؤسساتها. وشفنا كلفة النموذج ده في لبنان... وبأشكال مختلفة في ليبيا والسودان واليمن. المصالحة الحقيقية مش إننا نساوي بين كل الأطراف ونقول...أشقاء... لو فيه لجنة... البداية تكون بتحديد مين اعتدى... ومين حمل السلاح خارج الدولة... ومين مطلوب منه يوقفه. المصالحة تبقى منطقية فعلا لما الحوثي يقول بوضوح.... تخلينا عن فرض حكم اليمن بالسلاح... وعن استهداف السعودية... وعن استخدام باب المندب والملاحة كورقة ضغط.... وقبلنا إن السلاح والقرار السيادي يرجعوا للدولة. ساعتها نتكلم عن مصالحة... إنما مصالحة تخليه يحتفظ بالسلاح والمشروع ونفوذه على باب المندب؟ دي مش مصالحة... دي تحسين لشروط الجولة اللي بعدها. السلام لا يعني مساواة الدولة بالميليشيا… لأن أول ما تعمل كده... إنت مش بتحقن الدماء؛ إنت بتدي السلاح شرعية...