الله يرحم شهداء غزة بانهيار المنزل ويشافي الجرحى ويصبّر قلوب الناس اللي ما ضل وجع ولا شكل من أشكال الموت إلا وعاشوه وجربوه. بس في وجع وقهر صامت بياكل في قلوب الناس وما حدا جايب سيرته! و في معلومة صدمتني عرفتها من أصدقاء الي هل تعلم إنك لو مواطن من غزة وشقيت وتعبت سنين وأخدت قرض وتسهيلات بنكية عشان تشتري شقة تستر فيها عيلتك والشقة هاي انمسحت عن وجه الأرض وصارت ركام مع الحرب… إنك ملزم قانونياً تكمل سداد القرض لآخر شيكل؟! البيت راح، والعيلة اتشتتت أو استشهدت، وجنى العمر تبخر، بس خصم البنك شغال وما بيوقف! عارفين إنه البنك مؤسسة ربحية،بس السؤال الكبير اللي لازم ينصرخ فيه بوجه الكل: وين سلطة النقد الفلسطينية؟! وين الحماية المالية في حالات الكوارث والإبادة؟ كيف مواطن خسر كل إشي ومطلوب منه يدفع ثمن بيت ما لحق حتى يتهنى فيه وهو اليوم إما نازح بخيمة أو عم يدفن شهداءه؟ الموضوع مش بس تأجيل أقساط بتراكم فوائد، الموضوع بده قرارات شجاعة، تفعيل لصناديق طوارئ، وإلزام لشركات التأمين وسلطة النقد إنها تتحمل مسؤولياتها الوطنية والأخلاقية. ما بصير نترك ابن غزة بين فكي الموت من جهة، والالتزامات البنكية من جهة تانية!