Pinned Tweet
"ما بينك وبين الطمأنينة إلا يقينك بأنّ ما لم يُرده الله لن يكون، وأنّ ما أرادهُ لن يمنعه أهلُ اﻷرض"
القلوب يريبها طول الجفا والليل دوبه
يتهادى عطره الحسّاس وأحظى بإهتمامه
كل وجهٍ قد طويت اوراق ماضيه بصعوبه
تحمل الانسام بالغ شوقه ووافر سلامه
وين ابهرب والثواني واقفه شبه مغصوبه
عدني يا ليل شرهاتك واعديك الملامة
الضمير الحي ما تسكن من اللهفة حروبه
تربكه حتى نسانيس الهواء مدري علامه
من ترك لي صورةٍ فالبال ماهيب محجوبة
يتشجر في زوايا القلب وده واحترامه
يدري إني كل ما تاخذني الخطوات صوبه
مستعد أرضي غرور الغرة اللي فوق شامه
يا رهيف الحس كيف أصد والصدة عقوبة
وانت يغري عودك بميلة ويغري بإستقامة
لا تسيل الدمعة العذبة واسيل من العذوبة
الدموع تكبّل العشاق وتزيدك وسامة
أهيفٍ لو تبتسم تسلب من الرجال ثوبه
ابتسم واقول لك لله در الابتسامه
من تخيّر دربك المهجور عن باقي دروبه
لاقيٍ بعيونك الثنتين مضياف وكرامه
لا تلومه لو تشوف الصمت ذنبٍ من ذنوبه
وش يقول اللي يشوف إحساسه اكبر من كلامه
واحدٍ مهما تضيق بعينه الارض الرحوبه
ما يبين في عيون الناس ضعفه وانهزامه
يا سارقة نظرة الاعجاب من كل صوب
انا ما احب الطريق اللي عليه ازدحام
يا ما تجاهلت لاجل انجا بقلب طروب
لي فتره اصد به ويردني للغرام
خذنا من الحب ما يكفي ونبغا نتوب
وفي كل حاجه ما أخذنا غير ذروة سنام
نعرف نصيد الجوازي بالحيل والسلوب
وتردنا الشيمه اللي ما يجيها الملام
حنا نعرف الكلام اللي يخطف القلوب
ونعرف حتى الكلام اللي يجر الكلام
بعد الثلاثين لو نسرق لسان الكذوب
ما تعبر كذبة التمويه زلة كرام
يا صغر قلبي ليا ذعذع نسيم الهبوب
ويا كبر عقلي ليا جات الامور الجسام
كبرت عمري على شان اتفادى الذنوب
وصراحه ان عمري العقلي ثمانين عام
لو قلتو الغطرسه باب الجهل والرسوب
قلت الجهل لا جهل قدرك صغير المقام
صحيح ماني على بعض الكلام مغصوب
لاكن توضيح من باب اكتمال المهام
فعلا تجاهلت واجد لين شفت الدروب
جميعها في اتجاه الخلف لا للأمام
تباً لمن يحسب ان الصمت خطة هروب
وشكراً لمن يعرف ان الصمت رفعت مقام
قنعت بأن التغابي فالعلاقات نوب
يمشي الوضع لو ماهو على مايرام
واللي يشوف التجاهل عيب من العيوب
طبيعي انه يشوف المستحبه حرام
على العموم القصيده جات وقت الغروب
وموضوعها كان داخل دائرة الاتهام
كتبتها وامطرت بالشعر دهم النصوب
اللي مطرها شرايد فكر ماهو غمام
كان البدايه سؤال وكان صدري رحوب
وصارت تجارب وسيرة شاعر بشكل عام
الصبح يتنفسك والليل عقبك يروق
وتخضع لك احلامك الصعبه بدون وسطا
تخوى عليك الهبايب والمطر والبروق
حتى السحايب عشانك ودها بالوطا
تمردي بالتغنج وألعبي بالطروق
اللي بها الغطرسه والعنفوان اخلطا
انتي من اللي عليه قلوب الامه تتوق
منتي من اللي ليا روّح مراح القطا
في كل صباح يستيقظ غزال في أفريقيا ، يجب عليه أن يجري أسرع من الأسد ، وإلا سيموت. وفي كل صباح يستيقظ أسد ، يجب عليه أن يركض أسرع من الغزال ، وإلا فإنه سيموت من الجوع.
لا يهم من أنت - غزال أم أسد ؛ عندما تشرق الشمس ، عليك أن تركض.
- توماس فريدمان
مليح الوجه نواض الثنايا مترف الأطراف
حظيظ اللي رمته حظوظه الغبرا على جالك
تمناك العزيز اللي يشوفك فارق الاسلاف
وجيت إتوج الحب العتيق بسؤدد خصالك
يا غياث العطاشى جف ريقي والضلوع هياف
متى تصدق مراويحك على من يرجي خيالك
تهادي من تحت ومض السحاب بخطوتين خفاف
على هونك وكن الأرض تضمى صوت خلخالك
تبختر وانت لو تضرب برمشك جرهدي القاف
تفتق لك منابيت القصيد وتزهر إقبالك
وصلتك بعد ما ذقت العنا واتعبني الميقاف
عساي أهني عقب طال الهجير بـ وارف ظلالك
حبيبي ما بعد عينك وطن للعاشقين ضفاف
ولا بعد الصبر فرحة بتغنيني عن قبالك
على كثر الوجيه العابره ما يشبهك اوصاف
وكن الله من كثر الترف مختصك لـ حالك
قضيت العمر غاوي في محاسن وجهك الشفاف
انا لو ما تجرع كل ليلة شوفته هالك
وانا كم لي اضد من الجموع و لا عرفت اخاف
سوى من ليلة ما امر يالمجمول في بالك
وإن تخيرتك دروب أعرف مشاويرك في بالي
أنت صوت يجذب السيار ويحدّ الدليلة
أتذكر وقفتي دونك ومزحي وارتجالي
وأتسامى لين أدفّ الضلع لـ عيونك وأشيله
معك يا طيب السنين، وفيك يا حلو الليالي
شاعرك وش يقتله غير المعنق، والجديلة
الإجابة تحتضر لا سيل إحساسك سؤالي
والدروب مجربة إلا دروبك مستحيلة
من مغبات الحياة أشدّ رَكْبي وارتحالي
وأتجمع لك صحاري وأتفرق بك قبيلة
هات لي كل الكلام وهاك شكي، واحتمالي
وانتظرني بين هتان السحاب وبين سيله
يا معاريف الدّيار إن شفت نفسك من خلالي
من خلالك كنت أشوف البرق في عِرْض المخيلة
وش مضى لك يا ملاذ الشعر وإلا وش مضى لي
الحقايق غايبة والغصن غربني مقيله
وين أروح إن غيبتني شمسك وجفت ظلالي
الظمأ عاري وصوتك حق وعيونك خميلة
اقطع الريبة يا أبو وجه وراه أسوق حالي
والله إني مرخص نفسي وروحي في سبيله
ما يهم العمر لا منه وقف لـ عيون غالي
كيف عاد أسوق لك عمري سحاب ولا تخيله
ما تسوّلت المدى من ضحكتك لا طاب فالي
غايتي لك ما يبررها طريق ولا وسيلة
ردني لـ أيامك الصلفات لا زاد انعزالي
آه يا ذلّ السؤال إن صار ما فـ اليد حيلة
المرارة في حياتي موغلة ولا أنت حالي
وكل شيء منك عن كثره يكفيني قليله
خابر هذا الحزن سيّال ما له فيك تالي
رغم هذا كلما ضجت حياتي التجي له
لا تحاول تشرح أسباب الرحيل ولا تبالي
صدت العشاق مثل الفارس اللي زل خيله
ليش أميل لضحكتك وأكسر لطارفك اعتدالي
وأتمنّى خنجرك وأبدأ نهارك وأنتهي له
الصباحات اتودد طلتك وإلَّا الليالي
كلما جف الظلام استنجدت ليلك جديلة
ما لمحتك في البيان ولا بحثتك في الأمالي
أنت فصل يُعجز الكاتب ولو يدفع حصيلة
والحياة إن غرّبت صوتي.. وخلتني لحالي
أدري إنها ما تكون بـ حضرتك إلا جميلة
قديم الهوى قبل أعتذر للهوى وازلّ
خذ الحقّ قبل يضيع مستقبِله وأجرَه
أعرْفِك وأتوْه ف كلّ حاجة معك وأدلّ
وأعرف الصباح العذب من نَسنسة فجره
يا مِلَح الشعور الصبّ والجادل المبتل
إليَا ضعت في غيهبْه واحتلت مِن عطره
لا ترتاب لك خوْفي قصيْدة وصوتي ظِلّ
أنا أخاف قبل أحبّ وأخاف قبل أكرَه
وش الوِدّ لا صارَت حقوق المحبَّة غِلّ
وش السرّ لا مرَّت عيون البشر عَبْره
أداريك وأركض بَين ما دقّ فيك وجَلّ
وأنا العالم اللّٰه عارف إحساسي وصبره
تزل الدروب وكلّ حاجة بعض من كِلّ
مشاوِير وأحلام وظمأ هَاجِس وفكرة
أشوفك وَطِن قبل ارتحالي وأشوفك حِلّ
طلبتك وش أصدق من شعوري ومن عذره
عساني إليَا ملّت ظروفي معك ما أملّ
من المبسم اللي يسرِق اليوم من بكرَه
أنا يا بعد من خان عَهْد السنين وزلّ
إلى اليوم واقف تحت شبّاكك أنتظره
تردَّدت وانسلّت دموعي معك وانسلّ
كلامٍ حَبس عذر المسافات في صدره
خذ اللي تبي مما حوَته اليدين وخلّ
أنا مثل من يرهن لأجل حاجته عمره
أمانة يا أبو وجه يشوف المفارق حَلّ
إذا ما قدرْت تردّ ضحكتك لا تشرَه
حجة العقل الرزين اكبر من اللي نستطيعه
كل ما جيته بلهفة شوق بالمضمون جاني
يحتدي طيش الشباب اللي على زمة ربيعه
واقتدي في كل راي يقول والهى في زماني
ان ذكرت اللي يا دوب امن الدلال يذب ريعه
صار ما للعقل راي وصار راي القلب جاني
كل ما عرض يروح العقل والمنطق وديعه
يملك زمام الامور ووين ما وده خذاني
زهرة القلب المحب اللي لو يشوف الفجيعه
ما نساه ولا نسى وصله لو اشوفه نساني
انت ياللي تستبد الوصل وتحب القطيعه
وانت يا مرخص مقام اللي مقامه ما يداني
واللّه انك سرٍ فقلبي ليا من جيت اذيعه
كن ما فيني شعور وكن ما عندي معاني
سلطةٍ لا من مشيت تنزل اللي فالطليعه
فتنة تملك احساس الشخص في عدة ثواني
من طبيعة وجهك اللي يحقر رسوم الطبيعه
كل دوله ترغب السياح من دونك تعاني
كل ضيعه في نظر غيري ترا ماهيب ضيعه
دامها عندك عسى محدَ من العالم لقاني
فدوتك ما فات واللي جاي واليوم وتّبيعه
وفدوتك ما يذخره قلبي وما ينطق لساني
مستعد ارخص صبا عمري على شانك وابيعه
وش لزوم العمر دام العمر عندك عمر ثاني
يا شذى زهرٍ سقاه الماء من أوراق الخمايل
طلةٍ ما جاتني من شوق ماني مرتجيها
كل ما هبّت علي الغاديات من النفايل
عاودتني لحظةٍ ما فادت الأعذار فيها
ميل يا غصنٍ يغذيه الترف لامن تمايل
ليلةٍ فيها لقاك أبيع عمري وأشتريها
النهار يغيب لا فلّيت للريح ، الجدايل
السماء وش ذنبها ظلما جديلك يكتسيها
يا إبتسام النور فوق العشب من عقب المسايل
بعدك الأيام غوّايه ولا عدت اشتهيها
وين أولّي وأنت ساكن فالصورّ و فالرسايل
هي بقت سكة ما تطرقها طواريك وأجيها
اتحايل لأجل أصد من العرب وإن جيت احايل
نظرة النشاد و دموعٍ عسى الله يهديها
للغرام أغلال والناجين من حبسه قلايل
من دخل سجن الهوى حرّيته لا يحتريها
خلةٍ ماهي تلم الشمل مذمومة شمايل
ليه أخلي راحة فوادي تحت رحمة يديها
ليه أعود لك مدام إن ما ورى المعواد طايل
وش يرد اللهفة لنفسي على أشياء كنت ابيها
لو تساومني بكل الطرق وبشتى الوسايل
الكرامة جوهرة ما ساوم القناي فيها
يوجع إني في سبيل رضاك سويت الهوايل
وأنت مستكثر علي اسف ومستكبر عليها
مرت سنة كاملة والشعر مدة بخيل
يالله بعصماً تهز الساحه أبياتها
كم لي وانا في رجا ليلة هواها عليل
اعيش باقي حياتي من بركاتها
مع ملهمة كل عصر وفاتنة كل جيل
بنتٍ تغيض الوضيحي ب التفاتاتها
عريبة الساس قلبي من جفاها قتيل
اثر الولا ماهوب ضمن أولوياتها
ما فاتها الزين فيها الزين ماله مثيل
ما فاتها غير شيٍ ما بعد فاتها
حتى لو ان الكلام احيان من سلسبيل
اللي مزود حلاها كثرة سكاتها
من حرفنتها الحروف الابجدية تسيل
ما تعرف الابجديات ابجدياتها
عادي لو اخلي الدنيا تحط وتشيل
واملا فراغات عمري من فراغاتها
تحايلتني على الفرقا ولا في حيل
احبها كل مازادت حيالاتها
لو سوت المستحيل أعيفها مستحيل
القلب راضي بها في كل حالاتها
من يوم ما شفت رغبتها الغياب الطويل
صرت احترم كل حاجه غير رغباتها
عن كل دعجا نواظر عسجدية جديل
اصارع النفس لين ارد مشهاتها
مع اني اشوف زينٍ منتثر كل ليل
ل الحين ماشفت لي ذاتٍ مثل ذاتها
من بعدها كيف ابلقى للمشاعر بديل
ما عاد تغريني الفاتن ب نظراتها
ما نيب خايف من جروح الزمان الثقيل
خايف لو احبها وتسوي سواتها
المسا قاد الظلام وفيّة الشمس معزوله
في شفق ليلٍ يبادلني نسيمه وانشراحه
الهبايب تطرق أبواب القصيد الي ميوله
بين طيات الشعور وبين لذات الفصاحه
يا رفيقي كل ما قمت أردع النفس الملوله
تصغر الدنيا بعيني لا مكان ولا مساحه
شرهة العاقل على الجاهل بدايه في نزوله
وشرهة الجاهل على العاقل تعد اكبر بجاحه
من حفظ حق الرفاقه والمبادي والرجوله
تجتمع فيه الرحابه والبشاشة والسماحه
وان خابت ظنون الرفيق ولا بقى عذرٍ يطوله
التغافل عن هوانه ل العقول اكبر رجاحه
يختلف ظن الخبيث الي يدور الشك حوله
لكن الحر يتسامى كل مارف ب جناحه
فيه وقفه من هوان وفيه وقفه من بطوله
شد فالخيل العنان ولّبس الفارس وشاحه
ان تمثل بالجناب الدمث ما ينقض مثوله
وان رما ما يرمي الا من هواه ومن سلاحه
والله لن يستطيع العبد أن يسبّح تسبيحة، ولا يركع ركعة ، ولا يقرأ آية إلا بعونٍ من اللّٰه.
قال ابن القيم رحمه اللّٰه:
لا تحسب أن نفسك هي التي ساقتك إلى فعل الخيرات، بل إنك عبد أحبك اللّه، فلا تفرط في هذه المحبة فينساك.
11
1,137
لا يبدي الرجل عند الناس مكنونه
ما دام الاضلاع جند و وراسه الحاكم
من بث سره على العربان يشنونه
لله وحده يبث السر و عفاكم
10
1,313
تنجذب لي قسوة الايام وتشوف انجذابي
مثل ما يجذب عروق الصاعقه راس المناره
من كثر ما عشت ف الضيقه وعايشت اكتئابي
صرت اذوق اللي يسمى مر ماحس بمراره
ما سلم من ضيق بقعا لارسول ولا صحابي
خل عاد اللي يجدد توبته تاره وتاره
كل ماصور خيالي حلم في مشهد ضبابي
شوش الواقع على التصوير وانقطعت لشاره
في رجا اللّه ما ترجيت المجاند والجنابي
كل جهد الادمي من غير عون اللّٰه خساره
جعل ربي ما يبدي ذنبي ويترك ثوابي
كثر ما ابدي على نفسي ونفسي ف الصداره
كم قضينا حاجة المحتاج واللي فالمخابي
ما يطفي لمبة البنزين ويولع زقاره
مزهوّة الروح النجيبه من مَلل
مرّت سحابتها تبلّ اطلولها
في رابيتها يوم عرّاها البلل
كنّه على راسي نزل هملولها
كانت نِحل محافل اسمار ومِلل
ومشاربٍ شتّى طلايع لولها
شفت بعيوني في معاهيد الطلل
رمسيسها يلثم يد ابو هولها
حديث فمها انعم حياه من الفلل
لا وسّدتني المشكله وحلولها
وفي معرض الحجه وميزان الزلل
صحيحها اخفت ضوّ من منحولها
مراتع غنّا واكاليل وظلل
والمستجير من الهجير ينولها
اشعر بشيٍ فيه من وحيه شلل
يوم يغمرني شيّ من معسولها
يا سوق من لا به ريال ولا هلل
خذني ليمنىٍ ماقدرت اطولها
دام السبل مفروشةٍ قدمك زلل
استنطق الاقدار عن معلولها
علّ الدريك معامل السبع العلل
بعدك ورثت من الحياه فلولها
على رحاب ايديك لا حقني كلل
وان جيت ابا انزع عن يداي سمولها
توشّحت بأجلّة الأمر الجلل
تبيعةٍ عجزت اسدّ خْلولها
مدري الخلل فاللغز ولا فالحلل
ولا الصدور المغلقه وقفولها
قل لا تلوذ بصمت قل وين الخلل
قل هذي اللي ما قدرت اقولها
30
2,929
فضح ضلام الليل حزنٍ ساتره نور الصباح
ليت الحزن لا جاد من ماجوده يصير اجودي
ينتاب عقلي قلبي الطايش وهو ماله صلاح
وأنا مهدي قلبي الطايش بعقلِ مهتدي
راحة يدي ما يرتبط فيها شعور الارتياح
محتاج لي راحة صدر مليت من راحة يدي
أحاضي زناد الكلام أكثر من زناد السلاح
ما ودي انه يثور في صاحب ولا في معتدي
صار الكلام يطير بلسان الردي خل الجناح
مغنيه ربي عن جناح الطير بلسان الردي
كم كلمة ما تطلق محيّا ولا تطلق سراح
ما ودي اسمعها من المغتاب لو عشت وحدي
من ينهش لحوم البشر لا يحسب ان ذنبه مباح
حتى لو ان عمره مدي ذنبه بعد عمره مدي
ترى الكلام اغلظ على الرجال من عقد النكاح
لولاه مازبّن رسول اللّٰه مطعم بن عدي
يمكن يطيب الجرح لامن صار من طعن الرماح
لكن كيف يطيب لامن صار من حرف ابجدي
الواقع يحرّض على الغيبه وهي سمٍ ذحاح
وانا لا زلت اجاهد الواقع ولا زل اجهدي
ما ودي اسمع غير صوتك يابلال ابن رباح
وماودي اقعد في مكان الا مكانك يالجدي
ما عاد ل الدنيا طعم ولا الحياة ألها طراه
الواضح أن فقد الشغف يطغى مع فرط الوعي
أما أن ماني مثل خلق اللّٰه على وجه الحياه
ولا أن خلق اللّٰه ما عاد تميّز العلم وتعي
ليه أبدي الشرهه على اللي ما تعلّم من خطاه
اللي تقول أنه تحت تأثير بنجٍ موضعي
الناس ماهي ضان وآدوّر لها رعي ورعاه
ولانيب ملزومٍ بمن يحتاج ل رعاة ورعي
اللي ما ودّه يلتقي بي ف آنا ما ودي ب لقاه
واللي يبى لقياي ف آنا ما تغيّر موقعي
أطيب واليمنى البخيله كنها رسوم الفلاه
وأشح ب لساني عن العوجا وأحشم مسمعي
الرجل يستره الكرم والبنت تسرها العباه
والوقت يكشف من علي وأن مال يكشف من معي
وكلٍ ليا الأيّام دارت به تبى تبحث خفاه
واللي مًا يسعى يسترح والله لا يشكر له سعي
الاش منت ب موحي أسمه غير لا اخذت بعزاه
ولا الكفو ذكره ما يركد لين يشعانا شعي
كم حيّ تصدر به علوم الطيب شهادة وفاه
وكم ميتٍ كن المراجل عقبه ف حالة نعي
تعابير الوجيه الصامته تستنطق اللمّاح
عيونك صارحتني في كلامٍ قد تحقّقته
ما تحملْه المشاعر في الخفا تشعر به الارواح
وانا احساسي ماهوب يخونني لا قال صدّقته
تغانمني ترى ما عاد باقي لي كثر ما راح
ذبل غصنٍ رطيب وجف ماه وحتّت اورقته
على كيفك تبي تشقى معي والا تبي ترتاح
انا حلمٍ لغيرك ما تحقق في ملاحَقته
ترى وجيه الليالي وانت داري شاحبه وشحاح
كم اغتالت لها ضحكه ويا كم شمل فرّقته
هقيتك تعتذر وتجي تراضيني وانا دمّاح
يا زين العذر لا من جاء من الغالين في وقته
ولا أكبر من ضياع الهقوه وقدر الكبير ان طاح
سوى اللي ما هقيت آفارقه يا لين فارقته
من يقفّي لا يرجي من وراي استعطفه بـ إلحاح
من يقفّي يقفّي والسلامه في مرافقته
على ذكرىً تزايفها الهبوب وسافية الارياح
سلام السامح اللي معتق جروحه ومعتقته
ما عاد يشوقني ضوح المزون وبرقها اللوّاح
لو انه باقيٍ في خاطري حلمٍ ما حققته
آسر القلب فيك مْن الدلال الغرايب
معك قلبي عرف معنى الحياة السعيدة
كل ما أسبلت بين الزاميات الذوايب
فاح نسناس عطر ولاح مطلع قصيدة
لا أنسدل فرعك الغربيب فوق الترايب
ألتقى في وصوفك كل ضد وضديدة
أنت لا جيت ما يبقى من الناس غايب
في مساء الغايبين أنت الوحيد الفقيدة
عطيت السماء حلم ووهبت الثرى محراب
ونهلت المعارف كلها من مشاربها
صعدت السماء فرد وبياض النجوم اسراب
وعلى كبدها يوم اكشفت عن مأربها
كتبت آهي اللي ماعرف لحنها زرياب
وعلى كف جرهد بيدها قمت اجاذبها
انا الصادق اللي ناسه اسموه ب الكذاب
وانا اللي يموت وجملة الناس مغضبها
غيَابات الانفس تلبس الليل لبس ثياب
وانا شعاعها اللي ينبعث من غياهبها
انا شعاعها اللي دونه الغي صار حجاب
وانا شمسها اللي كوكب الارض يحجبها
لو ادّل دربي نهنهت عني الحجّاب
وعطتني ب إياديها مقاليد كوكبها
ولكنّها من غيّها تجهل الاسباب
بقيت الوحيد الحاظر اللي مغيّبها
غريبٍ عن الاقراب واقرب من الاغراب
متى ما تعود اغرابها جيت اقاربها
لها العزله اللي بابها من وراه ابواب
ولي الراحه اللي خلوة الروح تجلبها
ولا يقتحمها غير خمرية الاهداب
هي اسباب دافعها ودافع سبايبها
من السر الأوحد لبستني مية جلباب
ودفنت الزمان السرمدي في ترايبها
