تخيل معاي هذا المشهد، يأمر الله الملك إسرافيل -عليه السلام- أن ينفخ النفخة الأولى (وهي نفخة الفزع والصعق)، فتموت جميع الخلائق، فيأمر الله إسرافيل أن يقبض روحه ويموت فيموت. الحين احنا في حياة البزرخ، لا يوجد حي إلا سبحانه. بعد موت جميع المخلوقات ومنهم الملائكة وحملة العرش وإسرافيل وملك الموت، لا يبقى حيّ سوى الله سبحانه وتعالى الواحد القهار، فينادِي: لِمَنِ الْمُلْكَ الْيَوْمَ؟ ثلاث مرات، فلا يجيبه أحد، فيردّ على نفسه ويقول: لِلَّهِ الْوَاحِدِ الْقَهَّارِ. بعد ذلك يحيي الله الملك إسرافيل -عليه السلام-، ويأمره بالنفخة الثانية (وهي نفخة البعث والنشور). تخرج الناس في وجل، وفي خوف، وفي فزع. ﴿وَيَوْمَ يُنفَخُ فِي الصُّورِ فَفَزِعَ مَن فِي السَّمَاوَاتِ وَمَن فِي الْأَرْضِ إِلَّا مَن شَاءَ اللَّهُ وَكُلٌّ أَتَوْهُ دَاخِرِينَ﴾ يقول الشاعر: هَلَّا تَذَكَّرْتَ يَوْماً، أَنْتَ مُدْرِكُهُ يَوْماً سَتُخْرِجُ فِيهِ كُلَّ أَنْفَاسِ يَوْمَ الرَّحِيلِ عَنِ الدُّنْيَا وَزِينَتِهَا يَوْمَ الْوَدَاعِ شَدِيدَ الْبَطْشِ وَالْبَاسِ وَيَوْمَ وَضْعِكَ فِي الْقَبْرِ الْمُخِيفِ وَقَدْ رَدُّوا التُّرَابَ بِأَيْدِيهِمْ وَبِالْفَاسِ وَيَوْمَ يَبْعَثُنَا، وَالْأَرْضُ هَائِجَةٌ وَالشَّمْسُ مُحْرِقَةٌ، تَدْنُو مِنَ الرَّاسِ وَالنَّاسُ فِي مُنْتَهَى جُوعٍ، وَفِي ظَمَإٍ وَفِي شَقَاءٍ، وَفِي هَمٍّ وَإِفْلَاسِ يَفِرُّ كُلُّ امْرِئٍ مِنْ غَيْرِهِ فَرَقاً هَلْ أَنْتَ ذَاكِرُ هَذَا الْيَوْمِ أَمْ نَاسِي؟! هذا مشهد صعب، وعظيم، ومهيب. ﴿يَا أَيُّهَا النَّاسُ اتَّقُوا رَبَّكُمْ ۚ إِنَّ زَلْزَلَةَ السَّاعَةِ شَيْءٌ عَظِيمٌ﴾ ﴿يَوْمَ تَرَوْنَهَا تَذْهَلُ كُلُّ مُرْضِعَةٍ عَمَّا أَرْضَعَتْ وَتَضَعُ كُلُّ ذَاتِ حَمْلٍ حَمْلَهَا وَتَرَى النَّاسَ سُكَارَىٰ وَمَا هُم بِسُكَارَىٰ وَلَٰكِنَّ عَذَابَ اللَّهِ شَدِيدٌ﴾ الآن الناس في تيه، في وجل، في خوف، في هلع، في ذعر، في ضياع! من بين الناس، يخرج رجل شاحب، يظهر عليه آثار هذا الخوف وهذا الاضطراب. فيأتيه القرآن ويقول له: هل تعرفني؟ -تخيل المشهد يجيك شخص ما تعرفه يلمس كتفك ويناديك ويقول لك بهذا الموقف الصعب جدًا، تعرفني؟ 🥹- فيقول الرجل: لا، لا أعرفك. فيقول له القرآن: أنا صاحبك القرآن. يَجيءُ القُرْآنُ يومَ القيامةِ كالرَّجُلِ الشَّاحبِ، فيقولُ: أنا الَّذي أسهَرْتُ ليلَكَ وأظمَأْتُ نهارَكَ. نسأل الله أن يجعلنا منهم، حقيقة هذا مشهد سنراه بأعيننا، مثل ما أنت الحين تشوف اللي قدامك، الحين أنا قدامي طاولة وعليها قهوتي وجنبي ايبادي وأشوفها الأشياء اللي قدامي، مثل ما أشوف هالأشياء هذي وهي واقعي حاليًا وواقع ملموس، هذا المشهد راح نعيشه ونشوفه، مو مشهد خيالي، مو مشهد سهل عشان تأجل توبتك! راح تُنفخ النفخة الثانية وتنشق القبور ويخرجون الناس كالسكارى من شدة الأهوال التي يرونها، ويأتي القرآن لصاحبه ويقول له: أنا صاحبك القرآن. خل القرآن يكون صديقك، واعمل في القرآن، أسهَرْتُ ليلَكَ = قوامًا في الليل. أظمَأْتُ نهارَكَ = صوامًا في النهار. يجي القرآن لصاحبه في أصعب لحظة، يطمنئه في وقت يفزع فيه الناس، يبشره في وقت يقلق فيه الناس، يريحه ويفرحه في وقت يُذعر ويهلع فيه الناس. ثم يقول: وإنَّ كُلَّ تاجِرٍ مِن وَراءِ تِجارَتِه، وإنَّك اليَومَ مِن وَراءِ كُلِّ تِجارٍة. بينما كان أهل الدنيا منشغلين في تجارتهم، ويغرقون في أموالهم، وعندهم من الأموال مالا حصر ولا عد لها، أنت كنت منشغلًا بكتاب الله. الآن أهل الدنيا لا يرون شيئًا من مكاسبهم، فمكاسبهم ذهبت وراحت وفنت، وأنت الآن يا صاحب القرآن تلقى كل المكاسب وتلقى تجارتك. تلقى الغنى، غنى ليس بعده غنى، ليس له حد من الأجور ومن الإكرام ومن الحلل ومن التيجان ومن الإنعام ومن الرفعة على رؤوس الخلائق يوم القيامة. ثم يقول: فيُعْطى المُلْكَ بيَمينِه، والخُلْدَ بشِمالِه. الناس ما زالت خائفة، وأنت تُعطى الملك. والناس ما زالت مرعوبة، وأنت تُعطى الخلد. ثم يقول: ويُوضَعُ على رَأسِه تاجُ الوَقارِ. الناس حفاة. عن النبي ﷺ: تُحشَرونَ حُفاةً عُراةً غُرلًا، قالت عائِشةُ: فقُلتُ: يا رَسولَ اللهِ، الرِّجالُ والنِّساءُ يَنظُرُ بَعضُهم إلى بَعضٍ! فقال: الأمرُ أشَدُّ مِن أن يُهمَّهم ذاكِ. فتخيل المشهد، الناس حفاة عراة غُرلًا، وصاحب القرآن يعطى الملك في يمينه، والخلد في شماله، ويوضع على رأسه تاج الوقار. أي رفعة وكرم وشرف وعزة أكثر من هذا؟ ثم لا يُكتفى بإكرام صاحب القرآن فقط، لأنه هناك أعمال في الشريعة من شرفها وعظمتها ومكانتها وجليل أجرها وثوابها لا يسع فضلها صاحبها وفقط، بل يسع فضلها صاحبها ومن حوله، كالجهاد في سبيل الله، لما عظم أجر الجهاد وشرفت مرتبة الجهاد وجل قدره، كان المجاهد مكرمًا منعمًا ويُشفع في سبعين رجلًا من أهل بيته، فالفضل والثواب عمَّ حتى وصل لأهل بيت المجاهد، وكذلك القرآن، وهل هناك أشرف وأعز وأعظم من كلام رب العالمين؟ ثم يقول: ويُكْسى والِداهُ. الآن التكريم بالغ هذا الرجل إلى والديه، إذًا القرآن يبر صاحبه في أمه وأبيه، لا ينفعه ويحميه وينجيه هو فقط، بل يُكَرَّم كذلك والداه. ثم يقول: حُلَّتينِ لا يُقوَّمُ لهما أهْلُ الدُّنيا. لو جعلنا الدنيا كلها ثمنًا لهاتين الحلتين، ما نفعتا وما قامتا مقام لئن أن تشتري شيئًا من هاتين. ثم يقول: فيقولانِ: بِمَ كُسِينا هذا؟ فيُقال: بأخْذِ وَلَدِكما القُرآنَ. فتخيل، أمك وأبوك مندهشين، يتساءلون مالذي عملوه حتى يتكرموا هذا التكريم؟ الناس عُرايا، خائفون، مذعورون، موقف عظيم، الصغير شعره أبيض من الشيب، وتذهب كل مرضعة عما ارضعت، وتضع كل ذات حمل حملها. وهم يوضع على رأسهم تاج الوقار. ثم يقول: ثم يُقالُ له: اقْرَأْ واصْعَدْ في دَرَجِ الجَنَّةِ وغُرَفِها، فهو في صُعودٍ ما دامَ يَقرَأُ؛ هذًّا كان أو تَرتيلًا. انتهى الحديث، ارجعوا اقروه مرة ثانية، وتأملوه، تأملوا المستقبل الحقيقي، هل ما زلت ستسوف وتأجل؟ ما اتخذت حتى الآن خطوة حفظ القرآن؟ وكثرة تلاوته آناء الليل وأطراف النهار؟ ما خطيت خطوتك الأولى في التدبر والتعلم والعمل بالعلم؟

تذكير: علاقتك مع الشيطان تكون بالعداوة.

ليش لما نشوف رجل يسعى إنه يلتزم، ما نقول عنه شي؟ لأنه ببساطة رجل يسعى يرضي ربه. بس لما نشوف امرأة تسعى تحسن علاقتها بربها، وتسعى بكل ما لديها جاهدة إنها ترضي ربها، على طول نشيطن علاقتها بربها ونقول إنها تدور العرس؟ وأصلًا لحظة؛ ودي أوقف بعد عند هالنقطة، ليش لما رجل يعبر عن رغبته بالزواج يكون عادي، بس البنت عيب ومنقود ونطلق عليها جميع أنواع الأحكام إذا عبرت عن رغبتها بالزواج؟ والله نعيش بازدواجية معايير؛ تويتر بس تصير الساعة ١٢ بالليل، تغريدات الشباب وهواجيسهم وخيالاتهم، كلكم تضحكون لها، مع إن فيها حيل تجاوزات وتفاصيل دقيقة وخصوصيات وأمور مو من المفترض إن الواحد يذكرها بالعلن. والبنت؟ لما تسوي أي شي زين لها، على طول نروح نفسره على إنها تدور العرس؟ تعرفون نوعية الرِجال اللي يعلقون على أي بوست فيه امرأة صالحة ومستورة، يكتبون نوع من التعليقات يحسسج إنه هو مكافأة؟ كأن هالمرأة سوت هذا الإنجاز وخذت هذه الجائزة ونجحت في هذا المشروع ولبست هذا اللباس له، أيضًا فيه بنات يفسرون كل شي تسويه البنت لأجل إرضاء الذكور، ما عندي أبسط البديهيات وهو إن الانسان انخلق لأجل عبادة ربه والطبيعي إنه يحاول يرضيه. أنا كشخصية طموحة بجميع الأصعدة، وعندي روتين صممته لنفسي يسمح لي أحقق جميع أهدافي، مركزة بتغذيتي ورياضتي وأحقق النتائج، مركزة بدراستي وأدرس ذاتيًا وما ربطت العلم بشهادة جامعة أو ما شابه، لأني أؤمن بالعلم، أطور من نفسي بتخصصي عشان أدخل سوق العمل بقوة وثقة، وعندي طموح عالي إني أحسن من شخصيتي وذاتي وأطورها من خلال إني أدرس العلم الشرعي وعلوم القرآن والحديث وإني أقرأ في سيرة الرسول وأتعلم منها، وعندي طموح إني أترك أثر طيّب بالناس والحمد لله اللي يسر لي هذا، واجد رسايل توصلني لناس قالوا إنهم تأثروا من التغريدات اللي أكتبها وصار عندهم رغبة في تحسين علاقتهم بخالقهم -هذا السبب الوحيد اللي يخليني للحين بتويتر، لأني حيل مشغولة فأفكر واجد إني أهده وما يصبرني غير هالسبب- كشخصية طموحة مثل الاخطبوط كأن عندي عشر أيادي أتخبط فيهم وأركض من كل صوب، ليش بالذات الاجتهاد بالدين يتفسر على إنه رغبة في الزواج؟ ليش الطالبة اللي تدرس وتتفوق ومعدلها عالي ما يتفسر جهدها وسعيها جذي؟ ليش الرياضية ما يتفسر تعبها وجهدها وسعيها بهذه الرغبة؟ ليش أي هدف بالحياة يكون عادي! وحدة تدرس للقدرات عشان تدخل التخصص اللي تبيه. رجال يسوي دراسة جدوى لأن بيدخل مشروع. رياضي يجهز حق بطولة. كل أنواع الأهداف الدنيوية عادي، بس ليش تشيطنون الأهداف الأخروية؟ إذا كنتوا مسلمين فيعني تؤمنون بالآخرة، جم بتعيش بالدنيا؟ ستين سنة؟ سبعين؟ ثمانين؟ مية؟ وبالعكس، مو ميزة إنك تتقدم بالعمر، بترجع إلى أرذل العمر وتكون مثل الطفل عالة، حتى الحمام تكرمون ما تقدر تروح له، يلبسونك حفاظة وتنسى نفسك ومن تكون وواجد أمراض أخرى، عمر محد يبي يعيشه. بالمقابل جم سنة بعيش بالبرزخ؟ متى مات الرسول -صلى الله عليه وسلم-؟ سنة ١١ هجري، واحنا الحين بأي سنة؟ ١٤٤٨، يعني الرسول الحين بقبره صار له ١٤٣٧ سنة، والله أعلم شكثر بيقعد بعد، ما ندري متى قيام الساعة، يمكن بعد ألف سنة؟ ألفين سنة؟ تخيل هذا هو عمرك في البرزخ، والبرزخ راح نعيش فيه إما في نعيم أو في عذاب. طيّب، جم سنة بعيش بالآخرة؟ خلود أبدي سرمدي، عقولنا البشرية المحدودة تعجز عن تخيل الخلود الأبدي. كل واحد فينا لازم يراجع نفسه، يعني تدرس ٨ ساعات باليوم عادي، تشتغل ٨ ساعات باليوم عادي، راتبك من ينزل بس ينصرف على أمور الدنيا، ومحد فينا خالي من الذنوب، كلنا غرقانين ومبتلين. ما تفكر شنو سويت لنفسي لآخرتي؟ ترى هذا كله منك ولك، أنت تسوي الحين، حق نفسك بعدين، تبي أوضحها لك أكثر وأختصر؟ الانسان اللي يشتغل على آخرته أكثر من دنيته: انسان فضّل نفسه (المستقبلية) على نفسه (الحالية). والانسان اللي يشتغل على دنيته أكثر من آخرته: انسان فضّل نفسه (الحالية) على نفسه (المستقبلية). ما تقدر تكون الأول؟ وما تبي تكون الثاني؟ خلاص يا أخي، توازن، عليك بأوامره واجتناب نواهيه. اللهم صل على محمد، وعلى آل محمد، كما صليت على إبراهيم، وعلى آل إبراهيم، إنك حميد مجيد، اللهم بارك على محمد، وعلى آل محمد، كما باركت على إبراهيم، وعلى آل إبراهيم، إنك حميد مجيد.

لا حبيبتي مضيعه بيني وبينج، هذي أنتِ اللي ما بقى نداء تزاوج وتلميح ما قلتيه ومع ذلك للحين ما رجع، شدي حيلج باقي على أكتوبر ثلاث أيام كملي تلميحات لعل وعسى يشفق عليج ويرجع 😂

أمس قبل ما أنام؛ شفت مقطع للشيخ عثمان خميس، يقول إن أحدهم رأى رؤية وشاف الشيخ بن عثيمين -رحمه الله-، فسأله: ما صنع الله بك؟ فقال: أنعم الله علي وادخلني جنات النعيم. فقال له: والشيخ عبدالعزيز بن باز؟ فقال: لا ذاك فوق فوق ما نشوفه. قشعر جسمي والله! بن عثيمين يقول عن بن باز فوق ما نشوفه، هذا وهو بن عثيمين! كم درس شرح؟ كم كتاب ألف؟ كم فتوى أفتى؟ كم ساعة لخدمة الدين أفنى من عمره؟ فقعدت أفكر بنفسي وبأعمالي وتقصيري، وأقول: طموحي أدخل الفردوس الأعلى، بس شلون أدخلها؟ أنا مو من الناس اللي انحرموا في الدنيا، يعني مثلًا بن باز الله يرحمه انحرم من نعمة البصر. وقعدت أدعي: يا ربي أنا مقصرة وضعيفة وقليلة علم؛ ما عندي علم بن عثيمين ولا بن باز، وما عندي من الابتلاءات ويا رب لا تختبرني وتبتليني فأنا ضعيفة، وما عندي المال اللي أكبه كب لنشر الدين وخدمته مثل عبدالرحمن السميط -الله يرحمه-، قعدت أفكر فعلًا بكل ما أملك، من علم من مال من قدرات، ما عندي شي أملكه! وفوق هذا مقصرة، وذنوبي مغرقتني، ويا ربي أنا ضعيفة لا أطيق الابتلاءات، فيا رب أكرمني الفردوس الأعلى من الجنة، ساعدني أوصل لها بدون إبتلاءات ومصاعب ومشقة، لا أسألك أن توهبني شيئًا معين بحد ذاته؛ أسألك أن توهبني اللي يناسبني اللي تشوف إنه يقدر يوصلني للفردوس الأعلى. وبس؛ نمت وقمت على الكنسله 😂 والحمد لله على كل كلمة كتبتها أثرت على شخص وكانت سبب في هدايته، وكانت حجة على شخص آخر؛ خذته العزة بالاثم. بالعكس أنا حيل مستانسة، ما فضيت أدش تويتر إلا قبل جم ساعة، والتعليقات جدًا جميلة ومثلجة للصدر ما بين ناس تسأل لي الثبات، وما بين ناس تثني وتشهد بالخير، وبين اللي شافوني قريبة لهم وارتاحوا لي وصاروا يعبرون عن اللي يضايقهم بنفس الموضوع ويبون مني نصيحة وتوجيه، الحمد لله على كل شي ربي يحطه بطريقي؛ مؤمنة إن لما أدعي ربي إنه راح يستجيب لي، إن شاء الله أكون أنا وياكم وأهلنا كلنا من أهل الفردوس الأعلى، وطبعًا ما راح ندخلها بأعمالنا واجتهادنا؛ إن كنا بندخلها فراح ندخلها بفضل الله ورحمته.

الناس تتكلم عن كنسلتي وأنا ما دريت عن كنسلتي إلا من رفيجاتي، فوائد الميوت 👍🏼 شاريه راحة بالي، أي تغريدة أحس إن هذولاك راح يجونها، على طول أصكها ميوت وأخليهم يصايحون كثر ما يبون.

أنت كمستهلك لازم تكون على وعي ودراية، نعيش بزمن رأسمالي. بطلب منك طلب صغير: تأمل إعلانات الشركات هذه اللي تقدم خدمة تقسيط، حيل يبهرجون من التفاهات والثانويات، يبونك تكون ساخط وغير راضي عن حياتك، وتعيش بمستوى أعلى من مستواك، وبعدها هم يستفيدون، وأنت تتضرر. مثل ما هم يدورون مصلحتهم؛ دور أنت على مصلحتك واتبعها. ولازم تعرف النصيحة والرأي السديد تاخذه من منو، يعني مثلًا بالاستثمار، لما شخص ينصح بأسهم شركات الذكاء الاصطناعي، اقعد مع نفسك وشوي فكّر، اسال نفسك: هل له مصلحة من هذا الراي؟ أكثر الشخصيات اللي تنصح هم أصحاب الشركات هذه، له مصلحة ولا لا؟ إذا إي؛ فرأيه غير محايد وغير موضوعي ولا يؤخذ به، لأن عنده هدف وغاية يبي يوصل لها. كذلك مع موضوع الأقساط، كثر ما يقدرون راح يطبعونه، وبالعكس مفيد وينقذ ويفك أزمة وما إلى ذلك، لكن خلك ذكي وواعي لحيلهم وتسويقهم. مرة ثانية: لا تسلم رقبتك للأقساط.

بطلب لي عشا، ولما جيت بدفع؛ لقيت من ضمن الخيارات خدمة أقساط. استنكرت! ليش ممكن يكون فيه خيار دفع لأكل بالأقساط؟ إذا ما عندك تدفع، اكل من البيت. نصيحة: لا تسلم رقبتك للأقساط، ولا تجعلها عادة وثقافة، تعلم على الحرمان، مو لازم دايمًا تلبي رغباتك، خالف هوى نفسك، وإلا ستعيش معيشة ضنكا، تشتغل وتكد وبس ينزل الراتب كله يروح، لأنك عشت على السالب، تعودت على عيشة الديون.

نعم، الله غفور رحيم، ولكنه أيضًا شديد العقاب. فينبغي أن يكون قلب المؤمن بين الخوف والرجاء؛ فيرجو رحمة الله ومغفرته، ويخاف عقابه، فلا يأمن مكره، ولا يقنط من رحمته. قال الله تعالى: ﴿نَبِّئ عِبادي أَنّي أَنَا الغَفورُ الرَّحيمُ ۝ وَأَنَّ عَذابي هُوَ العَذابُ الأَليمُ﴾ [الحجر: 49-50] وقال في وصف عباده الصالحين: ﴿يَدعونَ رَبَّهُم خَوفًا وَطَمَعًا﴾ [السجدة: 16] وقال تعالى: ﴿إِنَّهُم كانوا يُسارِعونَ فِي الخَيراتِ وَيَدعونَنا رَغَبًا وَرَهَبًا وَكانوا لَنا خاشِعينَ﴾ [الأنبياء: 90] وقال تعالى: ﴿وَادعوهُ خَوفًا وَطَمَعًا إِنَّ رَحمَتَ اللَّهِ قَريبٌ مِنَ المُحسِنينَ﴾ [الأعراف: 56] وقال شيخ الإسلام ابن تيمية -رحمه الله-: والعبادة تتضمن كمال الحب، وكمال التعظيم، وكمال الرجاء والخشية والإجلال والإكرام. وقال ابن رجب في جامع العلوم والحكم -رحمه الله-: لا صلاح للقلوب حتى يستقر فيها معرفة الله وعظمته ومحبته، وخشيته ومهابته، ورجاؤه والتوكل عليه، وتمتلئ من ذلك، وهذا هو حقيقة التوحيد، وهو معنى قول: لا إله إلا الله، فلا صلاح للقلوب حتى يكون إلهها الذي تألهه وتعرفه وتحبه وتخشاه هو الله وحده لا شريك له. وقال ابن القيم في مدارج السالكين -رحمه الله-: القلب في سيره إلى الله عز وجل بمنزلة الطائر؛ فالمحبة رأسه، والخوف والرجاء جناحاه، فمتى سلم الرأس والجناحان فالطائر جيد الطيران، وإذا قطع الرأس مات الطائر، وإذا فقد الجناحان فهو عرضة لكل صائد وكاسر. فالمؤمن يسير إلى الله بجناحي الخوف والرجاء؛ فلا يغلب عليه الخوف حتى يقنط، ولا الرجاء حتى يأمن العقوبة. فالرجاء يستلزم الخوف، ولولا ذلك لكان أمنا، والخوف يستلزم الرجاء، ولولا ذلك لكان قنوطًا ويأسًا. وكل أحد إذا خفته هربت منه، إلا الله تعالى، فإنك إذا خفته هربت إليه، فالخائف هارب من ربه إلى ربه.

في حادثة الإسراء والمعراج، لما التقى الرسول -صلى الله عليه وسلم- بخليل الرحمن إبراهيم -عليه السلام-. شنو تتوقعون قال له إبراهيم؟ شنو المعلومة اللي وصى النبي عليها عشان يبلغنا اياها ويوصلها لنا؟ قال رسول الله ﷺ: لقيت إبراهيم ليلة أسري بي، فقال: يا محمد، أقرئ أمتك مني السلام، وأخبرهم أن الجنة طيبة التربة، عذبة الماء، وأنها قيعان، وأن غراسها: سبحان الله، والحمد لله، ولا إله إلا الله، والله أكبر.

يوم جديد، وبداية جديدة، وتغيير حقيقي، يلا نبني جنتنا ♥️ السنن الرواتب = قصر في الجنة سبحان الله وبحمده = نخلة في الجنة لا حول ولا قوة إلا بالله = كنز من كنوز الجنة سبحان الله والحمد لله ولا إله إلا الله والله أكبر = غراس الجنة اللهم صل وسلم وبارك على محمد وآله وصحبة = ارتفاع عشر درجات في الجنة ترك المراء والكذب وحسن الخلق = بيت في ربض ووسط وأعلى الجنة

فجأة تذكرت موقف حيل عشوائي 😂 وصار ودي أسألكم: شنو أكثر موقف عشوائي صار لكم مع الغرباء؟ أنا مرة كنت بسيارتي أنطر أمي عند باب المستشفى؛ فعلى ما تجي وقاعد أنطرها، إلا تركب وحدة يمي، حسبالي غلطانة، جان تقول: بجرب صعدة سيارتج إذا مرتفعة ولا لا، أمي عندها مشاكل بالصابونة وما تقدر على الصعدة المرتفعة. ما عطتني مجال أستوعب وأرد، إلا تقوم وقبل ما تسكر باب السيارة، قالت لي: سيارتج مرتفعة لا ما ينفع. وراحت، بس جذي انتهت القصة 😂 على إنه موقف عشوائي إلا إنها أثرت فيني، مراعية وتدقق في التفاصيل لخدمة أمها، بس صدمتني ميانتها 😂😂😂 طول الموقف هي تتكلم وأنا ساكتة متنحة، الله يشفي أمها ويرزقها برها ويشفي جميع مرضى المسلمين ♥️

اليوم وحدة من البنات تسولف لي؛ هي اللهم بارك شعرها كان طويل، وقصته، فعمرها ما ركبت اكستنشن، فتقول لي: اليوم ركبت أمي ما خلتني قالت روحي الصالون وركبي لا تجين جذي العرس بشعرج القصير. طبعًا أنا ساكتة، لأن ما أحب أطلع الأم بشكل خطأ وتصير صورتها غلط، لكن ما جاريتها بالحديث، فهي شافتني ساكتة، فتقول لي: أدري إنج بعد تستحرمين. شفتوا؟ انكرت بس بسكوتي وبقلبي، أنا مع رفيجاتي ما أنصح بشكل مباشر، ما عمري قلت لأي وحدة منهم: طولي قميصج، دخلي شعرج، لا تحطين ميكب، لا تحطين عطور. ما أحب، خلاص هذه الأمور واضحة للكل والكل يعرفها، أنا متعودة أنصح نصيحة علنية للكل غير موجهة لشخص معين مثل إني أكتب تغريدة، أما واقعيًا؟ ما كنت أنصح إلا لما تُطلب مني النصيحة، هم بنفسهم يجوني ويستشيروني، ولاحظت إني أثرت عليهم كلهم إيجابًا بدون ما أتكلم وأنطق حرف واحد، لكن للأسف نرجع للواقع: إذا تأثروا من رفيجة وحدة، أيضًا هم يتأثرون من الأهل دبلات وخصوصًا لو كانوا الأهل ما يساعدون. يعني رفيجتي العروس كان ودها دخلتها تكون بدون موسيقى، وسعت لي آخر لحظة، بس أمها وخواتها ما يبون ويبون مطرب معين. كل رفيجاتي والله ألاحظهم تجي طلعات يدخلون شعورهم؛ ما يسمعون موسيقى، هم من نفسهم يدزون لي مجلس ذكر ويبون نروح، يهبون بحلقات التحفيظ، وبعدها يردون على اللي كانوا عليه، وبعدها يعدلون من نفسهم، وهكذا، والصراحة؟ حيل حيل حيل أحترم كل وحدة منهم لأن أدري هم بمجاهدة مع النفس ومع المجتمع، ولأني حيل أحبهم ما أنساهم من الدعاء، ادعي لأهلهم بالهداية لأن أدري أهاليهم سبب كبير يساعد في ثباتهم.