#WasifAliWasifOfficial #Maikada_e_Hazrat_Wasif_Ali_Wasif

سوال : کہتے ہیں کہ سنگت نہیں بدلنی چاہیے، یہ بات سمجھ نہیں آئی! جواب : جو علم جس جگہ اور جس حوالے سے آپ پر آشکار ہو اس جگہ کو تبدیل نہ کرنا - مثلاً جنگل میں یا پہاڑ پر جو واقعہ ہوا ہے وہ مکمل ہو گا - جہاں سے ابتداء ہوئی وہاں پر ہی اس کی انتہا ہو گی - جن دوستوں میں بیٹھ کر آپ پر خیال آشکار ہوں ، انہیں دوستوں کے اندر ہی خیال مکمل ہوا کرتا ہے - جس دوست سے آپ کو محبت کا سبق ملا، اس دوست کو نہ چھوڑنا - جس ماحول میں جس بات کا شعور پیدا ہو، اس ماحول کو Maintain کرو - اس سنگت کو بقا دو اور قائم رکھو_________سنگت بدلی تو مضمون بدل جائے گا اور آپ کا فیض بند ہو جائے گا - آپ جس حساب سے جہاں بھی جا رہے ہو وہ سنگت قائم رہنی چاہیے، پھر مضمون آشکار ہو جائے گا - کسی انعام یافتہ شخص کے قریب رہو تو انعام مل جائے گا - انعام میں حاصل کی ہوئی چیز کو انعام دینے والے کی رضا کے مطابق استعمال کرنا - اس کے علاوہ استعمال کرو گے تو انعام سے محروم ہو جاوء گے - عطا کو اپنی مرضی سے استعمال کرنے والا عام طور پر خطا کر جاتا ہے - اس لیے عطا کی ہوئی شے کو عطا کرنے والے کی رضا کے مطابق استعمال کرو ورنہ عطا سے الگ ہو جاوء گے گفتگو 2 حضرت واصف علی واصف رحمتہ اللہ علیہ #WasifAliWasifOfficial #Maikada_e_Hazrat_Wasif_Ali_Wasif

زندگی گزارنے کے جواز تلاش نہیں کئے جاتے، صرف زندہ رہا جاتا ہے زندگی گزارتے چلے جاوء، جواز مل جائے گا اگر آپ کو کسی طرف سے کوئی محبت نہیں ملی، تو مایوس نہ ہوں آپ خود ہی کسی سے محبت کرو - کوئی با وفا نہ ملے، تو کسی بے وفا سے ہی سہی محبت کرنے والا زندگی کو جواز عطا فرماتا ہے زندگی نے آپ کو اپنا جواز نہیں دینا بلکہ آپ نے زندگی کو زندہ رہنے کے لئے جواز دینا ہے -آپ کو کوئی انسان نہ نظر آئے تو کسی پودے سے پیار کرو، اس کی پرورش کرو، اسے آندھیوں سے بچاؤ، طوفانوں سے بچاؤ، وحوش و طیور سے بچاؤ، تیز دھوپ سے بچاؤ، زیادہ بارشوں سے بچاؤ - اس کو پا لو پروان چڑھاو پھل کھانے والے کوئی اور ہوں، تب بھی فکر کی کوئی بات نہیں کچھ بھی نہیں تو یہی درخت کسی مسافر کو دو گھڑی سایہ ہی عطا کرے گا کچھ نہیں تو اس کی لکڑی کسی غریب کی سردی گزارنے کے کام آئے گی آپ کی محنت رائیگاں نہیں جائے گی -آپ کو زندہ رہنے کا جواز اور ثواب مل جائے گا - کچھ نہ ہو سکے تو کسی پتھر کو صیقل کرو، پالش کرو، اس پر محنت کرو،پتھر کا آئینہ بن جائے گا - اس آئینے کے اندر زندگی کا جواز لکھا ہو گا ________ اگر آپ کی نگاہ بلند ہونے سے قاصر ہے، تو اپنے پاؤں کے پاس دیکھو - کوئی نہ کوئی چیز آپ کی توجہ کی محتاج ہو گی -کچھ نہیں تو محبت کا مارا ہوا کتا ہی آپ کے لئے زندہ رہنے کا جواز مہیا کرے گا___________ یہ کائنات آپ کی توجہ کی محتاج ہے - کائنات سے توجہ طلب کرنا اتنا اہم نہیں جتنا اس کو توجہ دینا اور یہی جینے کا جواز ہے - دنیا مایوس ہو کر زندگی کے جواز سے، زندگی کے جواز کی رائیگاں تلاش میں ہے - آپ لوگوں کی اس تلاش کو اپنی توجہ سے سرفراز کرو - دنیا توجہ مانگ رہی ہے - اپنا گردو پیش آپ کی اپنی نگاہ _توجہ کا طلب گار ہے ______ کتاب:- حرف حرف حقیقت مضمون:- جواز_ہستی مصنف:- حضرت واصف علی واصف رحمتہ اللہ علیہ #WasifAliWasifOfficial #Maikada_e_Hazrat_Wasif_Ali_Wasif