Zaman Lashari

ملک میں 27ویں آئینی ترمیم لا کر صوبوں کی خودمختاری پر شب خون مارا جا رہا ہے اور ملک کو ایک بار پھر ون یونٹ کی طرف دھکیلا جا رہا ہے۔ یہ دراصل وفاق کی جانب سے صوبوں کے مالیات، تعلیم، صحت، آدمشماری اور عدلیہ پر مکمل کنٹرول حاصل کرنے کی ایک خطرناک سازش ہے، جس میں پیپلز پارٹی برابر کی شریک ہے. 27ویں آئینی ترمیم کے ذریعے سندھ کی وحدت، وسائل اور صوبائی خودمختاری پر حملہ کیا گیا تو سندھ کے عوام سخت مزاحمت کریں گے۔ یہ ترمیم اٹھارویں آئینی ترمیم کو غیر مؤثر بنانے اور صوبائی اختیارات سلب کرنے کی ایک منظم کوشش ہے. پیپلز پارٹی ہمیشہ اقتدار کی خاطر فیڈریشن میں قومی خودمختاری، وسائل کی نیلامی اور اس طرح کہ دیگر معاملات کرتی رہی ہے۔ 27 ویں آئینی ترمیم کے ذریعے پیپلز پارٹی سندھ کی قمیت پر اقتدار حاصل کر کے لوگوں کو قربانی کا بکرا بنائے گی۔ ماضی میں بھی پیپلز پارٹی اس طرح کے اقدامات کرتی رہی ہے۔ سندھ یونائیٹڈ پارٹی 27ویں آئینی ترمیم کی سخت ترین مخالفت کرتی ہے اور اس کے خلاف ہر سیاسی، قانونی اور عوامی محاذ پر جدوجہد جاری رکھے گی۔ اگر یہ ترمیم منظور کی گئی تو یہ پاکستان کے وفاقی ڈھانچے کے لیے ایک سنگین خطرہ ثابت ہوگی۔صوبائی خودمختاری اور وسائل پر صوبوں کے حق کے بغیر نہ جمہوریت مستحکم ہو سکتی ہے اور نہ ہی فیڈریشن چل سکتی ہے۔