Toka Khaled

ايه الصورة اللي هيشوفها الشباب والناس والعالم على حبس مقدم محتوى سنتين؟ بيقدم محتوى كوميدي بيتكلم فيه لغة الشارع وبيخبي الألفاظ - اللي برضه بتتقال في الشارع - بصوت بطة؟ على مدار أكثر من عشر سنين دلوقتي، الدولة كانت محتاجة تتدخل في أمور كثير بسبب ظروف صعبة، بناء دولة جديدة وتثبيتها ومحاربة الإرهاب وغيره. مش جه الوقت الدولة تصدر صورة جديدة؟ فيها حريات سياسية وحريات التعبير وحريات الإبداع ويكون صدرها أوسع تجاه الشباب والفن والإختلاف؟ أه عملنا متحف مصري مبهر للعالم كله، بس العالم برضه لازم ينبهر بإن عندنا مناخ ديموقراطي وحرية تعبير ودولة تعرف تستوعب أكثر شريحة محافظة وأكثر شريحة متحررة زي أي دولة منفتحة في العالم. القضية مش قضية شاب إسمه محمد عبد العاطي هيقضي سنتين في السجن علشان شوية فيدوهات كوميدية على يوتيوب، ويتساوى مع واحد سرق أو تحرش أو ممسوك بمخدرات… القضية قضية شباب حاسين بفجوة بينهم وبين الدولة، فجوة بين بلدهم وبين العالم، فجوة بين الطموح والمتاح… وفجوة بين جناحاتهم اللي ممكن تخليهم يطيروا وديناصورات مصممة تاكلهم وهي حتى مش جعانة. الحرية لعبد العاطي.