Stephen O'Brien

بص يا صديقي لو مش متابع اللي بيحصل في العالم في آخر 24 ساعة فاتك كتير أوي . حرفيا 4 ضربات ورا بعض لأمريكا وإسرائيل في نفس اليوم، والنتيجة ممكن تغير خريطة السياسة كلها! تعالى ناخدها بالعكس، من التقيلة للأخف 👇 1- من كام ساعة بس 3 طيارات عسكرية سعودية وتركية وباكستانية نزلت في مطار مهرآباد في طهران. اللي قاعدين دلوقتي على ترابيزة واحدة: وزير الدفاع السعودي الأمير خالد بن سلمان، وقائد الجيش الباكستاني عاصم منير، ورئيس المخابرات التركية إبراهيم قالن، مع الرئيس الإيراني مسعود بزشكيان وأمين الأمن القومي محسن رضائي. الاجتماع تحت اسم "اتفاقية مكة للدفاع المشترك" وإيران بتقول عايزين نعمل منظومة أمن إقليمي داخلية من غير تدخل أجنبي، والسعودية بتقول هدفنا تهدئة وخفض تصعيد. يعني اللي كان مستحيل من سنة بقى بيحصل دلوقتي قدام عنينا. 2 - تمرد داخل جيش الاحتلال نفسه القناة 12 الإسرائيلية نفسها وبموافقة الرقابة العسكرية قالت قنبلة، قبل انتخابات الكنيست بـ 24 ساعة بس. رئيس الأركان إيال زامير جاله أمر مباشر من نتنياهو ينفذ ضربة كبيرة كانت هتولع مواجهة شاملة مع إيران ودولة عربية تانية. اللي حصل إن زامير رفض! وقاله بالنص مش هورط الجيش في حرب عشان تكسب انتخابات أو تهرب من المحاكمات، ولو عايز الضربة دي هاتلي تفويض مكتوب وموقع من الحكومة كلها تتحمل المسئولية. في إسرائيل دي مش خناقة عادية، ده زلزال. الجيش هو مصدر الشرعية هناك، ولما رئيس الأركان يطلع يتهم رئيس الوزرا انه بيستغل الدم لمصلحته الشخصية، فدي ضربة سياسية قاتلة لنتنياهو قبل الصناديق ما تفتح بساعات. 3 - صربيا.. الطلبة أسقطوا أهم حليف لنتنياهو في أوروبا القصة بدأت من سنتين بعد انهيار سقف محطة قطر في مدينة نوفي ساد ومات 16 واحد بسبب الفساد. شوية طلبة وشباب نزلوا الشارع وعملوا حاجة اسمها "قائمة الطلاب"، مفيهاش سياسيين محترفين، كلها دكاترة جامعة وممثلين ومزارعين، لفوا صربيا كلها على رجلهم وبالعجل. امبارح بالليل ألكسندر فوتشيتش اللي حاكم صربيا من 12 سنة بيد من حديد طلع بعد قفل الصناديق بساعة ونص وقال: "من الواضح أننا خسرنا هذه الانتخابات". الطلبة جابوا أكتر من 135 مقعد من 250! ليه دي ضربة لإسرائيل؟ لأن فوتشيتش ده كان من أكبر الداعمين لنتنياهو في أوروبا، ولسه في أبريل اللي فات كان عامل مشروع مشترك مع إسرائيل لتصنيع درونز عسكرية، ده غير مشاريعه مع ترامب. كله طار في ليلة واحدة. 1- البرازيل .. الجون اللي جه في الدقيقة 90 نيجي بقى للضربة الأكبر، في البرازيل أكبر دولة في أمريكا اللاتينية. من 2023 أمريكا وإسرائيل شغالين على خطة لتغيير وش القارة كلها ودعم صعود اليمين المتطرف عشان يبقوا حلفاء لهم، والعين كانت على البرازيل. السباق كان بين اتنين: لولا دا سيلفا 80 سنة، اللي بيسموه بطل الفقراء، اللي بدأ حياته مساح جزم وعامل مصنع واتسجن واتبهدل لحد ما بقى رئيس، ومعروف بعدائه الشديد للصهيونية وترامب ولبس الكوفية وقال على اللي بيحصل في غزة إبادة جماعية وسحب سفيره. وقدامه فلافيو بولسونارو ابن الرئيس السابق وأكبر حليف لترامب وإسرائيل هناك، واللي كسب أول جولة في أكتوبر اللي فات 47% مقابل 45% للولا، وكل الناس قالت خلاص لولا انتهى. ده غير إن إدارة ترامب كانت بتضغط اقتصاديا وتهدد بعقوبات لو لولا كسب، وميتا نفسها قللت وصول بوستاته لدرجة المحكمة العليا اتدخلت، وحتى في آخر ساعات الانتخابات عطلوا المواصلات العامة عشان الناس البسيطة متعرفش تنزل تصوت! اللي حصل كان معجزة بكل المقاييس. الناس نزلت تمشي على رجلها عشان تصوت. ولأول مرة في تاريخ البرازيل الحديث، اللي يخسر أول جولة يكسب الإعادة. لولا كسب 51.8% بفارق أكتر من 4 مليون صوت ورجع في ولاية رابعة. يعني في 24 ساعة بس: البرازيل قلبت على ترامب، صربيا وقعت حليف نتنياهو، جيش الاحتلال اتمرد على نتنياهو، وإيران قاعدة مع السعودية وتركيا وباكستان على ترابيزة واحدة! اللي جاي شكله مختلف تماما، وربنا يجعلها بداية نهاية الغطرسة !