Sheikh Usman Zaheer (سرگودھا)

سیاسی کارٹون، پیراشوٹرز کے ہاتھوں مخلص اور حقیقی ورکرز کا استحصال تحریر شیخ اعجاز انور سیاست عوامی خدمت، نظریے اور مسلسل جدوجہد کا نام ہے۔ کسی بھی سیاسی جماعت کی اصل طاقت اس کے وہ حقیقی ورکرز ہوتے ہیں جو دھوپ، چھاؤں، گرمی اور سردی کی پروا کیے بغیر، چٹان کی طرح اپنی قیادت اور نظریے کے ساتھ کھڑے رہتے ہیں۔ یہ وہ لوگ ہیں جو تنظیمی ڈھانچے کی آبیاری اپنے خون پسینے سے کرتے ہیں، لیکن بدقسمتی سے معاصر سیاست میں ایک ایسا منفی رجحان پروان چڑھ چکا ہے جس نے مخلص کارکنوں کو پسِ پشت ڈال دیا آج مخلص سیاسی کارکنوں کی جگہ چاپلوس سیاسی کارٹونز اور پیراشوٹرز نے لے لی ہے جو ساون کے موسم میں نکلنے والے کیڑے مکوڑوں کی طرح اچانک نمودار ہوتے ہیں اور جماعت پر قابض ہو جاتے ہیں یہ پیراشوٹرز اور مفاد پرست عناصر کسی نظریاتی تربیت یا عوامی جدوجہد کے ذریعے اوپر نہیں آتے، بلکہ ان کا زادِ راہ صرف دو چیزیں ہوتی ہیں(1) پیسہ (2) اثر و رسوخ۔ یہ دولت کے بل بوتے پر پارٹی میں انٹر ہوکر اپنے خاندانی یا کاروباری تعلقات کو استعمال کر کے قیادت کے قریبی حلقوں میں جگہ بناتے ہیں اور پھر اپنی چکنی چپڑی باتوں اور بے جا خوشامد کے ذریعے دیکھتے ہی دیکھتے رہنماؤں کے "بغل بچے" بن جاتے ہیں۔ ان کا مقصد سیاست کے ذریعے عوام کی خدمت کرنا نہیں، بلکہ اپنے ذاتی مفادات کا تحفظ اور طاقت کا حصول ہوتا ہے تاکہ اسٹیج پر کھڑے ہوکر لوگوں کو دکھا سکوں کہ میں کوئی بہت بڑا تیس مار خان سیاسی رہنما ہوں سب سے بڑا المیہ یہ ہے کہ جیسے ہی ان پیراشوٹرز کو جماعت یا حکومت میں کوئی عہدہ یا مقام ملتا ہے، ان کے اندر کا فرعون جاگ اٹھتا ہے۔ یہ ان عام مخلص ورکرز پر حکم چلانا شروع کر دیتے ہیں جنہوں نے اپنی پوری زندگیاں پارٹی کے لیے وقف کر دی ہوتی ہیں۔ یہ چاپلوس طبقہ قیادت کے گرد ایک ایسا حصار قائم کر دیتا ہے کہ مخلص کارکن کی آواز کبھی رہنما کے کانوں تک پہنچ ہی نہیں پاتی۔ یہ حقیقی ورکرز کا حق مارتے ہیں، ان کی قربانیوں کا سودا کرتے ہیں اور ان کی سالہا سال کی محنت پر پانی پھیر دیتے ہیں۔ اس سنگین صورتحال کا سب سے بھیانک رخ یہ ہے کہ یہ پیراشوٹرز حکومتی حلقوں اور پارٹی لیڈران کے نام کا بے دریغ اور ناجائز استعمال کرتے ہیں۔ یہ اقتدار کے گلیاروں میں بیٹھ کر لیڈران کا نام بیچتے ہیں، ان کے نام پر دھونس جماتے ہیں، اور مختلف محکموں کے افسران پر دباؤ ڈال کر مال بناتے ہیں۔ ان کا اوڑھنا بچھونا صرف کرپشن، کک بیکس اور کمیشن کا حصول بن جاتا ہے۔ یہ بدمست عناصر نہ صرف ترقیاتی منصوبوں میں خرد برد کرتے ہیں، بلکہ اپنے اثر و رسوخ کا رعب جما کر عام شہریوں اور تاجروں کو ڈرانے اور دھمکانے سے بھی گریز نہیں کرتے۔ چاپلوسوں کی اس اندھی لوٹ مار اور کرپشن کا خمیازہ آخر کار پارٹی اور اس کی اعلیٰ قیادت کو بھگتنا پڑتا ہے۔ جب یہ عناصر لیڈر کا نام استعمال کر کے اپنے بینک اکاؤنٹس بھرتے ہیں، تو انگلی براہِ راست سیاسی قیادت پر اٹھتی ہے۔ میڈیا اور عوامی حلقوں میں سیاسی قیادت پر بدعنوانی، اقربا پروری اور چور بازاری کے سنگین الزامات لگتے ہیں، جس سے برسوں میں کمائی گئی سیاسی ساکھ خاک میں مل جاتی ہے۔ قیادت معصومیت کے دعوے کرتی رہ جاتی ہے، لیکن بدنامی کا جو داغ یہ پیراشوٹرز لگاتے ہیں، وہ آسانی سے نہیں دھلتا۔ تاریخ گواہ ہے کہ کسی بھی سیاسی جماعت اور رہنما کا بیڑا غرق کرنے کے اصل ذمہ دار یہی مفاد پرست اور چاپلوس عناصر ہوتے ہیں۔ یہ وہ موسمی پرندے ہیں جو صرف اقتدار کے ہما کے سائے میں جینا جانتے ہیں اس وقت پھر وہی مخلص اور نظریاتی ورکرز پیچھے رہ جاتے ہیں جو لاٹھیاں اور جیلیں کاٹ کر پارٹی کو زندہ رکھتے ہیں سیاسی رہنماؤں کو اب یہ بات گہرائی سے سمجھنی ہوگی کہ خوشامد کی لت جماعتوں کو اندر سے کھوکھلا کر دیتی ہے۔ اگر سیاسی جماعتوں کو حقیقی معنوں میں عوامی بننا ہے اور اپنا مستقبل محفوظ کرنا ہے، تو ان سیاسی کارٹونز اور پیراشوٹرز کا راستہ روکنا ہوگا۔ وقت کا تقاضا ہے کہ مخلص، باکردار اور نظریاتی ورکرز کو ان کا جائز حق دیا جائے، کیونکہ جماعتیں پیسے سے نہیں، بلکہ کارکنوں کے جذبے اور نظریے سے چلتی ہیں۔ جو قیادت اپنے حقیقی ورکرز کو روند کر پیراشوٹرز کو گلے لگاتی ہے، زوال اس کا مقدر بن جاتا ہے "ورکر کو عزت دو"