تسولف لي وأنا منك أتسقى سلوتي لاهنت
عليك الله تطوّل فالحكي لا تقول ما أمداني
تمهل بالسوالف شوفني عقب صوتك زنت
تجمل وأردف الموضوع الأول واحدٍ ثاني
وش أزين من حديثك مَابه أزين منه إلا أنت
تجمعتوا على قلبٍ خلي وصار ملياني
غديت أودّع المقفي ولا أحب أسمع التبرير
أشوف إن التفاصيل الكثيرة ما لها داعي
فأنا يا اللي تظن إني بدونك ما أحسن التدبير؟
هجرتك واشتعل نور الحياة وزانت أوضاعي
فلا شكرًا على وقتك ولا اعذرني على التقصير
أنا من يوم فارقتك تلاشت معظم أوجاعي
احبّك والشتاء موْغِل، وأحنّك والسّنين يْبَاس
أنا عينك أعَرْف إحساسها وأعشَق مطالعها
عسى ما لك ديارٍ في هواها يتعب العسّاس
يا وجهٍ في تفاصيله لقت روحي مرابعها
ذكرته ماني بناسي وانا اللي في هواه ابيح
شعوري لافرض ذكراه فرض الشرع والسنّة
مراويح السحاب ان جابته تنبت بصدري شيح
وتبهج قلب حاطنّه همومه لين صكّنّه
وانا لو زحت عن بالي طيوفه ما قويت ازيح
شعورٍ كل ما يطري يدفّ الونّة بـ ونّة
ينازعني شعوري والمشاعر ما تحشم الـ ليه
أنا وشلون أبنهي لي شعورٍ أجهل بداياته ؟
إذا صديت عنه وأقتنعت إن الجفا يرضيه
طواريه تزيد وتكثر بـ عمري علاماته
وأنا أحبّه وأحبّ اللي يجيب بغفلته طاريه
ولا حبيت ضحكةٍ في حياتي كثر ضحكاته
وأنا والله مابيعك ولو كل البشر باعوك
احفظ العهد ماخونه ومهما طال هجرانك
مادام اني تمنيتك بقول بشعري المحبوك
كلام مختصر واضح يجسد وضع ولهانك
أحبك حب لو انك بدربي تزرع الشوك
أحبك وارخص الغالي ياروح الروح من شانك
لا تلومه لو تشوف الصمت ذنبٍ من ذنوبه
وش يقول اللي يشوف احساسه اكبر من كلامه
واحدٍ مهما تضيق بعينه . . الارض الرحوبه
ما يبيّن في عيون الناس ضعفه و إنهزامه
عساني لا بكيتك من غلا ما أبكيك من فقدان
ولا أعيش الحياة اللي بدونك ما أتخيلها
أمانة لا أفقدك وينفتح لي للحزن بيبان
وأنا بيبان حزني محدٍ غيرك يقفلها
ولا غيرك يداريني ويعرف راضي أو زعلان
ويمسح دمعتي ويلعن ثوى من هو ينزلها