فيه موضوع ودي أتكلم عنه من فترة أول شيء، أنا ما أشوف إن تشجيعك لكلان تحبه أو فرحتك بنجاحه شيء غلط، بالعكس من الطبيعي إنك تتحمس لمحتوى تحبه وتفرح إذا شفت الأشخاص اللي تتابعهم يحققون أرقام عالية أو ينجحون في شيء، ومن الطبيعي بعد إنك تتحمس للمنافسة وتبي تشوف كلانك المفضل بالمقدمة، وهذا كله جزء من المتعة اللي تخلينا نتابع المحتوى من الأساس. لكن المشكلة تبدأ لما يتحول التشجيع إلى تعصب، والمنافسة إلى عداوة، وتصير مشاكل بين أشخاص ما يعرفون بعض بالواقع. خلونا نسأل نفسنا سؤال: ليه نتابع صناع المحتوى من الأساس؟ بسيطة، عشان نستمتع بمقاطعهم ونضحك ونعيش أجواء المنافسات والتحديات. طيب، كيف وصلنا لمرحلة إن بعضنا صار يتابع الأرقام أكثر من المحتوى نفسه؟ وصار اهتمامه مو بالمقطع اللي نزل، بل بمين جاب مشاهدات أكثر، ومين تفوق على الثاني، ومين المفروض يفرح ومين المفروض يحزن؟ المفروض إن الأرقام تزيد حماسنا للمنافسة، مو إنها تتحكم بمزاجنا وتحدد علاقتنا بالناس، والمفروض إن نجاح كلانك المفضل يفرحك، مو إن نجاح الكلان المنافس يصير سبب في البحث عن عيوبه. إذا نزل الكلان A مقطع وحقق أرقام عالية، وش المشكلة؟ وإذا نزل الكلان B مقطع وحقق أرقام أعلى، وش المشكلة؟ بالنهاية كلهم يقدمون محتوى، وكلهم عندهم جمهور يتابعهم ويحبهم، ونجاح أحدهم ما يعني فشل الثاني. مو لازم إذا فرح جمهور الكلان A بإنجاز يجي جمهور الكلان B ويقلل منه، ولا إذا فرح جمهور الكلان B برقم حققوه يصير لازم أحد يشكك فيه أو ينتقص من الإنجاز. تقدر تفرح بإنجاز كلانك من دون ما تقلل من غيرك، وتقدر تعتز بالكلان اللي تشجعه من دون ما تحوّل الكلان المنافس إلى عدو لك. طيب، هل يعقل إنك تبني مشاعرك ومزاجك على شيء متغير؟ هل يعقل إنك تزعل وتدخل بنقاشات طويلة بسبب رقم في منصة تواصل اجتماعي؟ وبعد فترة تتغير الأرقام وتنتهي السالفة، وش بيبقى من كل هذي الهوشات؟ أنا أشوف إن فيه فرق كبير بين إنك تكون محب ومتحمس لكلانك، وبين إنك تصير متعصب لدرجة إنك ما عاد تقدر تستمتع بالمحتوى إلا إذا كان كلانك هو الأفضل، لأنك بهالحالة ما عدت تتابع عشان تستمتع، صرت تتابع عشان تقارن وتراقب وتنتظر أي فرصة تثبت فيها إن الطرف الثاني أقل من كلانك. وبكذا أنت بنفسك تحرم نفسك من متعة أشياء كثيرة، يمكن يفوتك مقطع رهيب لأنك رافض تشوف محتوى الكلان المنافس، ويمكن تدخل بهوشة طويلة بسبب تغريدة ما تستاهل، ويمكن تقضي ساعات من يومك بالردود والنقاشات بدل ما تستمتع بوقتك. والسؤال هنا: من المستفيد؟ صانع المحتوى مستمر بحياته، ينزل مقاطعه ويشتغل على مشاريعه، والأرقام ترتفع وتنزل والمنافسة مستمرة. لكن أنت، هل تستفيد فعلًا من كل هالزعل؟ هل تغير شيء بحياتك لأنك أثبت لشخص بتويتر إن كلانك حقق مشاهدات أكثر؟ وهل الموضوع يستاهل أصلًا كل هالتفكير؟ أنا ما أقول لا تتحمسون ولا تتنافسون ولا تمزحون مع بعض، بالعكس، استمتعوا بالمنافسة واحتفلوا بإنجازات الأشخاص اللي تحبونهم، لكن فيه فرق بين المنافسة وبين إن الموضوع يوصل للتجريح والاستنقاص والعداوة. ولا تنسون إن جمهور الكلان الثاني عندهم أشخاص يحبون محتواهم ويفرحون بنجاحهم مثل ما أنتم تفرحون بنجاح اللي تتابعونهم، مو لأن شخص يشجع كلان مختلف عنك يعني إنه ضدك، ولا لأن ذوقه يختلف عن ذوقك يعني إنك لازم تثبت له إنه غلطان. في النهاية، الكلانات وصناع المحتوى موجودين عشان يقدمون لكم محتوى تستمتعون فيه، خذوا من المحتوى متعته، ومن المنافسة حماسها، ومن الأرقام متعة متابعة الإنجازات، لكن لا تخلونها تتحول إلى مصدر للمشاكل. ترى بالنهاية كلنا نتابع هالمحتوى عشان ننبسط، والحياة الواقعية فيها من الهموم والمسؤوليات ما يكفي، فما يحتاج نضيف لأنفسنا مشاكل جديدة بسبب مشاهدات أو أرقام أو مقطع نزل باليوتيوب. استمتعوا بالمحتوى ولا تخلون التعصب يضيع عليكم المتعة اللي تتابعون الكلانات عشانها من الأساس 🙏🤍

رغم الكواليس وفلوق صليح عن اصابه للي، كنت متخوف إن أداءه يتأثر، لكن تواجده وذباته كانت ممتعة والله شكرًا للابد يا للي، استمتعت بحضورك كالعادة والله MVP الحلقه 🫡