لوگ تو لوگ ہمارے حکومتی اراکین اس کو سیلیبریٹ کر رہے ہیں - بہت سے حکومتی سوشل میڈیا ایکٹوسٹس اس کو "انصاف " کہتے نظر آتے ہیں - یعنی حنا پرویز بٹ جس کا کام پنجاب اسمبلی میں قانون سازی ہے ' وہ اس قانون شکنی پر یہ ٹویٹ کرتی ہے کہ "مریم نواز کے پنجاب میں ایسے ہی انصاف ہوتا ہے " - بعد میں اس کے اس بیان کو اعظمی بخاری شاہزیب خان زادہ کے پروگرام میں رد کردیتی ہے اور ڈیفنڈ نہیں کرپاتی - سچ کہتے ہیں کہ نادان دوست سے دانا دشمن بہتر ہے - ہمارے قانونی نظام کے بارے میں اکثر میں یہ کہتا ہوں - ہماری عدالتیں "جرگوں " کی طرح کام کرتی ہیں کہ انصاف کرنے کی بجاے "صلح کرلو ' کچھ لو کچھ دو " والا کام - اور ہماری پولیس "ڈیرے کے وڈیرے " کی طرح کام کرتی ہے - یا رشوت لے کر چھوڑ دیتی ہے یا پھر سیدھا پار لگادیتی ہے - یعنی وڈیرہ خوش تو "انعام " ورنہ " بھیانک انجام " اور اس سب میں ہماری عوام ؟ وہ اتنی ناعاقبت اندیش ہے کہ ایسے ماوراے عدالت قتل کو سلیبریٹ کرتی ہے - مجھے حیرت ہے کہ ملتان میں یتیم بچے والا کیس تو بہت سیدھا تھا - کوئی وکیل تک اس کا کیس لینے کو تیار نہیں تھا - عدالت محض ایک ہفتے میں اس کو سزاے موت دے سکتی تھی اور یوں عوام میں اپنا کھویا ہوا اعتبار اور مقام کچھ بحال کرسکتی تھی - لیکن اس کے باوجود عدالت نے اپنا مقام بحال کرنے کی بجاے پولیس نے یہاں نمبر بنانے کے چکر میں ایک قاتل کو قتل کرکے مقتول بناڈالا - جی ہاں ! قاتل اور مجرم کو جب آپ ماوراے عدالت قتل کرتے ہیں تو وہ "مقتول" بن جاتا ہے - جس کو "سزا یافتہ اور پھانسی زدہ " بنانا تھا اس کو آپ "مقتول اور مفعول " بنا دیتے ہیں - جس کو پھانسی دینا تھی اس کو آپ گولی کا نشانہ بنا کر پولیس کو عدالت سے بالا تر کر دیتے ہیں - اس کا نقصان کیا ہوتا ہے ؟ 1. یہی پولیس جو کبھی رشوت لیکر چھوڑ دیتی ہے ' جب کوئی رشوت نہ دے یا کسی ذاتی عناد میں کسی کو بھی "مبینہ پولیس مقابلے " میں پار کرادیتی ہے - یعنی پولیس کے اختیارات حد سے تجاوز کر جاتے ہیں اور ان اختیارات کے زعم میں وہ معاشرے میں "جگا " بن کر پھرتے ہیں اور سوسایٹی ان سے ڈرتی ہے - 2. اس کا دوسرا نقصان یہ ہوتا ہے کہ کبھی بھی جرم سے متعلق سب کردار سامنے نہیں آتے - ایک کو قتل کرکے چار کو روپوشی مل جاتی ہے - لائبہ اعجاز کیس میں ایک پورا گینگ شامل ہوگا ؛ پر اب کبھی اس کے باقی ارکان سامنے نہیں آئینگے اور نہ یہ پتا چلے گا کہ لائبہ سے پہلے کتنے سٹوڈنٹس کو یوں فراڈ کا نشانہ بنایا گیا - 3. ان پولیس مقابلوں کا ایک تیسرا نقصان جو بہت بھیانک ہوتا ہے وہ یہ ہوتا ہے کہ کبھی کبھی کوئی معصوم بھی ان کی زد میں آجاتا ہے جس کی واضح مثال کچھ سال پہلے ساہیوال کے ایک خاندان کا قتل تھا اور ابھی کچھ ماہ پہلے ایک آسٹریلیا کی پاکستانی فیملی کی ایک معصوم بیٹی نو سالہ ہانیہ احمد کا سی ٹی ڈی کے ہاتھ قتل تھا - 4. اس کا چوتھا منفی اثر یہ ہوتا ہے کہ ان مقابلوں سے معاشرہ یہ تاثر لے لیتا ہے کہ اگر کسی نے اس کی نظر میں جرم کیا ہے تو اس کو وہی ان کے طریقے سے انجام تک پہنچانا جایز عمل ہے - ایسا کرتے ہویے کبھی کوئی مشعال توہین رسالت کے جرم میں سڑک پر ہی سٹوڈنٹس کے "انصاف" کا نشانہ بن جاتا ہے اور کبھی کوئی سری لنکن مینجر سیالکوٹ کی کسی فیکٹری میں کسی جتھے کے ذریے زندہ جلادیا جاتا ہے - یہ سوچ بھی ایسے مقابلوں کی تحسین کرنے سے جنم لیتی ہے کہ گناہ اگر کہی ہوا بھی ھو تو اس کو وہی پر سزا دینا ہر کسی کا اختیار ہے - 5. اسی سوچ کے تحت اس ملک کی ایجنسیاں جس کو چاہیں ماوراے عدالت اٹھا کر غائب بھی کردیتی ہیں اور معاشرہ وہاں بھی یہی کہتا ہے کہ کچھ کیا ہوگا ' جو اٹھایا ہے - یاد رکھیں ! مجرم سے کسی کو ہمدردی نہیں - لیکن اس کو سزا دینے کا طریقہ خود ایک جرم نہیں ہونا چاہیے کیوں کہ اس کے لانگ ٹرم منفی اثرات مرتب ہوتے ہیں جو میں نے اوپر بیان کیے - پولیس اور قاضی کے اختیارات ایک نہیں ہوسکتے قتل چاہے کتنا ہی واضح کیوں نہ ہو - کیا کسی فراڈیے کے گھر میں ڈاکہ ڈال کر آپ اس کی لوٹی ہوئی دولت کسی یتیم خانے کو ڈونیٹ کرسکتے ہیں ؟ کیا ایسا ڈاکہ ڈالنا جایز ہوگا ؟ اگر نہیں تو کوئی بھی ماوراےعدالت قتل چاہے وہ کسی غلیظ مجرم کا بھی کیوں نہ ہو ' وہ غیر قانونی اور قتل ہی گنا جائیگا - پچھلے ایک سال میں سی ٹی ڈی نے نو سو زیادہ بندے ماوراے عدالت قتل کیے ہیں - اگر ہمیں یہی نظام منظور ہے تو پھر ہمیں یہ عدالتیں ' یہ سینکڑوں جج اور ہزاروں وکیل فارغ کرکے ہر شہر میں ایک سی ٹی ڈی کھول دینا چاہیے اور پھر ان کی جو مرضی وہ کریں ' عوام کا کام بس "واہ واہ " کرنا ہے - اگر آپ کو ایسا نظام قبول ہے تو پھر اس ملک کا نام پاکستان نہیں "پولیس کا اڈہ اور وڈیرے کا ڈیرہ " رکھدیں - شکریہ قلم کی جسارت وقاص نواز