The 30-day detention period is over. Imran Khan’s sister Aleema Khan was detained under the MPO arbitrarily and unlawfully, and that period has now expired. Aleema Khan must be released immediately! #ReleaseAleemaKhan

پریس ریلیز پاکستان تحریک انصاف کی سیاسی کمیٹی اور کور کمیٹی کے دو روزہ مشترکہ اجلاس کا متفقہ اعلامیہ خیبرپختونخوا میں ایمرجنسی اور گورنر راج کا نفاذ، منتخب حکومت کے خلاف اقدامات، سیاسی رہنماؤں کے اغوا اور ملک گیر گرفتاریوں کی شدید مذمت؛ تمام آئینی، قانونی، پارلیمانی اور عوامی محاذوں پر بھرپور طریقے سے آواز اٹھانے کا فیصلہ اسلام آباد: پاکستان تحریک انصاف کی سیاسی کمیٹی اور کور کمیٹی کا دو روزہ مشترکہ اجلاس منعقد ہوا، جس میں ملک کی مجموعی سیاسی و آئینی صورتحال، خیبرپختونخوا میں ایمرجنسی اور گورنر راج کے نفاذ، منتخب صوبائی حکومت کے خلاف اقدامات، پارٹی قیادت اور کارکنوں کی گرفتاریوں، سیاسی انتقامی کارروائیوں، دہشت گردی کے حوالے سے حکومتی الزامات اور پی ٹی آئی چیئرمین عمران خان سمیت دیگر سیاسی اسیران کے بنیادی حقوق کا تفصیلی جائزہ لیا گیا۔ اجلاس میں متفقہ طور پر 11 اکتوبر کے اقدامات، بالخصوص خیبرپختونخوا میں ایمرجنسی اور گورنر راج کے نفاذ، کونسل کے قیام اور عوام کی منتخب کردہ صوبائی حکومت کو غیر فعال یا تحلیل کرنے کے اقدامات کو یکسر مسترد کرتے ہوئے انہیں غیر آئینی، غیر جمہوری اور عوامی مینڈیٹ پر سنگین حملہ قرار دیا گیا۔ اجلاس میں مؤقف اختیار کیا گیا کہ ایک منتخب صوبائی حکومت کو سیاسی بنیادوں پر غیر فعال یا تحلیل کرنا ماضی کے آمرانہ طرزِ حکمرانی اور آئین کے منسوخ شدہ آرٹیکل 58(2)(b) کی طرز کے اختیارات کو دوبارہ زندہ کرنے کے مترادف ہے۔ ایسے اقدامات آئین کی بالادستی، وفاقی نظام، صوبائی خودمختاری اور جمہوری اصولوں کے منافی ہیں۔ اجلاس میں دوٹوک مؤقف اختیار کیا گیا کہ پاکستان تحریک انصاف ایمرجنسی، گورنر راج اور منتخب صوبائی حکومت کے خلاف کیے گئے ان اقدامات کو کسی صورت قبول نہیں کرے گی اور ان کے خلاف تمام آئینی، قانونی، پارلیمانی اور پُرامن عوامی فورمز پر بھرپور طریقے سے آواز اٹھائی جائے گی۔ وزیراعلیٰ، اسپیکر اور منتخب نمائندوں کے اغوا کی شدید مذمت اجلاس میں وزیراعلیٰ خیبرپختونخوا، اسپیکر صوبائی اسمبلی، صوبائی وزراء، اراکین اسمبلی اور دیگر منتخب نمائندوں کے اغوا، غیر قانونی حراست اور گرفتاریوں کی شدید مذمت کی گئی اور ان کی فوری بازیابی، قانونی حقوق کے تحفظ اور ذمہ داران کے خلاف کارروائی کا مطالبہ کیا گیا۔ اجلاس میں اس امر پر شدید تشویش کا اظہار کیا گیا کہ منتخب نمائندوں کو سیاسی اختلافات کی بنیاد پر نشانہ بنانا جمہوری اداروں، صوبائی خودمختاری اور عوامی نمائندگی کے اصولوں کی سنگین خلاف ورزی ہے۔ اجلاس میں علیمہ خان اور ان کی بہنوں سے متعلق جاری معاملے پر بھی شدید تشویش کا اظہار کیا گیا۔ ایک ماہ گزرنے کے باوجود ان کے حوالے سے پیدا ہونے والی صورتحال اور شکایات کا ازالہ نہ ہونے کی مذمت کرتے ہوئے ان کے بنیادی، آئینی اور قانونی حقوق کے مکمل تحفظ کا مطالبہ کیا گیا۔ ملک بھر میں سیاسی کارکنوں کی گرفتاریوں، ایم پی او کے تحت نظر بندیوں اور سیاسی انتقامی کارروائیوں کی شدید مذمت اجلاس میں ملک بھر میں پاکستان تحریک انصاف کے رہنماؤں، عہدیداروں، کارکنوں اور حامیوں کے خلاف جاری کریک ڈاؤن، گھروں پر چھاپوں، گرفتاریوں، نظر بندیوں، ہراسانی اور سیاسی انتقامی کارروائیوں کی شدید ترین الفاظ میں مذمت کی گئی۔ اجلاس میں پیش کی گئی تفصیلات کے مطابق پنجاب میں اسٹریٹ موومنٹ کے دوران پاکستان تحریک انصاف کے پندرہ سو سے زائد کارکنوں کو گرفتار کیا گیا، جن میں سے سینکڑوں کے خلاف مینٹیننس آف پبلک آرڈر، بالخصوص تھری ایم پی او، کے تحت نظر بندی کے احکامات جاری کیے گئے اور متعدد کارکن تاحال جیلوں میں قید ہیں۔ اجلاس میں اس امر کی بھی شدید مذمت کی گئی کہ پنجاب میں جن کارکنوں کی ایم پی او کے تحت نظر بندی کی مدت ختم ہو رہی ہے، انہیں رہا کرنے کے بجائے دوبارہ گرفتار کرکے نئے ایم پی او احکامات کے تحت جیلوں میں بھیجا جا رہا ہے۔ اس طرزِ عمل کو قانون کے غلط استعمال، بنیادی شہری آزادیوں کی پامالی اور سیاسی انتقام کی ایک منظم کوشش قرار دیا گیا۔ اسی طرح سندھ میں اسٹریٹ موومنٹ کے دوران گرفتار کیے گئے کارکنوں اور حامیوں کی مسلسل قید، ایم پی او کے تحت نظر بندیوں اور سیاسی بنیادوں پر کی جانے والی کارروائیوں کی بھی سخت مذمت کی گئی۔ اجلاس میں سندھ کی جیلوں میں تاحال قید سیاسی کارکنوں کی صورتحال پر بھی تشویش کا اظہار کیا گیا۔ اجلاس میں پنجاب، سندھ، خیبرپختونخوا، بلوچستان اور اسلام آباد میں اسٹریٹ موومنٹ کے دوران ہونے والی گرفتاریوں کی شدید مذمت کی گئی۔ اسی طرح ایمرجنسی اور گورنر راج کے نفاذ کے بعد ملک بھر میں پارٹی کارکنوں، رہنماؤں اور ان کے اہلِ خانہ کے گھروں پر مارے گئے چھاپوں، ہراسانی، غیر قانونی حراست اور نئی گرفتاریوں کو سیاسی انتقام کی کارروائیاں قرار دیا گیا۔