Uruhukire mu mahoro mubyeyi, muvandimwe, nshuti ya benshi, Intore, Imfura y'ababyeyi Suzana Nyiranyamibwa. Utabarutse ukunzwe, wahojeje abatagira ingano amarira y’agahinda n’akababaro u Rwanda rwatewe na Jenoside yakorewe Abatutsi. Ndakwibuka nk’ejo mu minsi ijana yo kwibuka Jenoside yakorewe Abatutsi, utaramye uhoza abababaye, uririmbira abatahutse barimbuwe bazizwa uko baremwe. Tuzagukumbura Nyiranyamibwa mwiza. Ndakwibuka mu ndirimbo zawe z’imena n'urumenesha zashyuhije urugamba rwo kubohora u Rwanda. Ubwira inyangabirama uti “Turaje tuje tujya iwacu, cyo nimusase bugari, dore igihe kirageze, cyo gushyira hamwe twese tugakorera u Rwanda. Turaje muturebe mutumenye turi bene mugabo umwe. Turaje nta rwango ku mutima, nta nzika z’ibyahise. Turaje tubafitiye amakuru n’amajyambere y’ukuri, n’umurava n’ubupfura, ntabwo tuje gusahura, turaje turukumbuye cyane, turukorere buhanga.” Iyo Leta ya Habyarimana wabwiraga ikumva ntimene amaraso, u Rwanda ruba rwemye rutarira amarira y’agahinda ka Jenoside. Jenoside igihagarikwa, warebye u Rwanda urumirwa, usanze n’abari bakwiye kurengera abicwaga barabaye ibigwari, abandi benshi barahisemo inzira ya Jenoside. Urongera ukora mu nganzo urarimba uti: ”Ese mbaze nde? Ngire nte? Nkore iki? Ese mbaze nde? Ko uwo nabajije atakiriho? Kiliziya z’Imana zuzuye imirambo. Amarira y’impfubyi ntatuma usinzira. Abapfakazi benshi barwaye intimba. Bashoreye abantu boshye ibitungwa bajya kubica ba bagome. N’igisekeramwanzi nticyarokotse.” Ukarangiza utange icyizere n’ihumure uti: “Twirinde kwiheba dutsinde ishavu…” Uko imyaka yagiye ihita, waririmbye indirimbo z'ikizere zikomeza abato n’abakuru. Ikiriyo cyo kwibuka abacu kireka kuba umwanya wo gushavura no kuganya, gihinduka igitaramo cyo kurata ibigwi byaranze abatutsi bishwe n’indangagaciro zabaranze, turushaho kubabera aho batari twemye. Ni muri urwo rwego wahanitse uririmba ku ivuko ryawe uti: “Humura Nyanza ntuzazima. Ntugacike n’intege turagucigatiye. Nubwo za nkoramaraso zakoze hasi zigatema, zigamije kutumara, ntabwo Nyanza izazima. Babyeyi bacu twabuze, rwa rukundo rw’umurage rwaduteye imbaraga, tuzakora aho bwabaga mu cyimbo cyanyu tuzabaho. Ababambuye ubuzima bazakorwe n’isoni….” Nyanza y’iwanyu kwa Filipo Karahamuheto, wahitanywe n'ababisha mu Ukuboza 1963, waririmbye, ihagarariye ahantu hose mu Rwanda hamenwe amaraso y’abacu, aho buri wese yavukaga. Warakoze Nyiranyamibwa Suzana. Uri koko inyamibwa n'inkesha. Mu myaka yose uko wabishoboye, ibice byose by’u Rwanda wabizengurukaga ujya kwibuka Abatutsi bishwe muri jenoside no gukomeza abakiriho. Wateye benshi ishema, uha benshi imbaraga zo kubaho, bakibuka badashavuye, ihungabana urarihungeta. Wahojeje abashavuye i Nyanza na Nyarubuye, Nyamata na Ntarama, Gisozi n’Umujyi wose wa Kigali, Murambi na Bisesero, Mibirizi na Kabgayi, Rukumberi na Kibeho, Kiziguro na Komini Rouge, Mwulire na Musha, Kansi na Kabakobwa, Cyanika na Cyahinda, Kaduha na Gatagara, Songa na Busogo. Izi ni ingero. Iyo wabaga washatse kutujyana mu gitaramo tumaze kwibuka abacu, warahanikaga uti: “Umva inkera y’abahizi ni igitaramo cy’abasore, ni urubyiruko rw’iwacu I Rwanda. Ayo ni amarebe n’iribagiza, umva amajwi y’urusobe.…” Tukinikiza tukwigana, ibyishimo bigataha imitima, abagukurikiye bagatahana umucyo. Iyo hagiraga unanirwa, warongeraga uti “Ndakumbuye. Nkumbuye ya ngendo, nkumbuye ya ndoro, nkumbuye ya nseko ku mugoroba twicaye, tuganira duseka. Ndumva nkumbuye wa mubyeyi wampaye ururuta izindi, ururengeje benshi. Nararugwije umubiri wose, ndarwambaye ndizihiwe, ndaberewe nanjye ndagukunda, ni ukuri ndagukunda, ni impamo ndagukunda. ” Ukarangiza ugakungurira gukorera u Rwanda uti "Rubanda rwa Gasabo nimwumve. Duhagurukire rimwe twese, ingufu n'umurava, ishema n'ubutwari, intego yacu ni ukubaka u Rwanda." Mubyeyi Nyiranyambirwa Suzana, udusigiye icyuho ariko humura ugiye ukeye, ikivi cyawe tuzacyusa. Ararekwa ntashira. Utabarutse tugukunda, udusigiye icyuho, tuzagukumbura. Umurage udusigiye wo gukundana no gukunda u Rwanda mbere ya byose, tuzahora tuwuzirikana, tuwukurikize kugeza natwe buri wese ku gihe cye atabarukanye ishyaka n’ubutwari. Uruhukire mu mahoro Nyiranyamibwa wacu. Wemeraga Imana. Niyo mpamvu waririmbiye abicanyi ubahanura uti NTIMUZAMARA UBWOKO SIMWE IMANA YABAREMYE. Nitije ayo magambo yawe ngusezeraho ngira nti: Requiescat in pace Domine = Uruhukire mu mahoro y'Umuremyi.