آبےـو مےـعےـآذ

اقلب الصفحة وماتبصش وراك .. اللي يبيعك بالرخيص، ماتديلوش من وقتك ولا حتى بنُص ثانية عتاب. اللي يخرج من حياتك بناقص منه، سيب مكان الفراغ بتاعه نضيف للي يستحقه✨🚪

مع نُضجنا بنفهم إن مش مطلوب مننا نخاصم حد، ولا نسيء لحد .. لكن مطلوب نعرف مين يستاهل قُربنا، ومين يستاهل ثقتنا، ومين الأفضل نسيب بيننا وبينه مسافة 🧘🏻‍♂️🤍

🔴 الأهلي وبيراميدز .. مباراة لإثبات الشخصية واستعادة الثقة 🔴 ✍🏻 واضح إن فيه ناس كتير حسمت نتيجة ماتش الأهلي وبيراميدز قبل ما يتلعب أصلًا، مش بس بيتوقعوا خسارة الأهلي، لأ، ده فيه كمان اللي بدأ يحدد الأهلي هيخسر كام!! .. وكأن خسارة الأهلي أمر مفروغ منه!! بس أنا عندي وجهة نظر مختلفة تمامًا، وخلوني أقولكم إزاي الأهلي ممكن يدخل الماتش ده بأفضل شكل ممكن، وإيه التشكيل اللي شايف إنه يقدر يتعامل مع طبيعة المواجهة دي. في ظل الوضع الفني اللي وصل له الفريق مع عموتة، واللي للأسف لسه مش قادر يقدم شكل كروي مقنع أو هوية واضحة للأهلي، أعتقد إن الحل مش في المغامرات ولا في محاولة تقديم كرة مثالية مش موجودة حاليًا. الحل إنك تختار العناصر اللي تقدر تكسب الصراعات، وتتحمل الضغط، وتلعب بروح قتالية عالية، وتستغل إمكانياتها الفردية وخبراتها في المواقف الصعبة. وبناءً على ده، شايف إن التشكيل الأنسب للمواجهة يكون كالتالي: حراسة المرمى: مصطفى شوبير. خط الدفاع: توفيق محمد ظهير أيسر، ياسر إبراهيم وأشرف داري في قلب الدفاع، ومحمد هاني ظهير أيمن، بشرط جاهزية ياسر الفنية والبدنية. خط الوسط: مروان عطية وأكرم توفيق، وأمامهم عمر الساعي. خط الهجوم: طاهر محمد جناح أيمن، حسين الشحات جناح أيسر، وأشرف بن شرقي مهاجم صريح. التشكيل ده من وجهة نظري فيه تنوع مهم جدًا؛ عندك القوة البدنية والقدرة على الالتحامات والضغط في مروان وأكرم وطاهر، وعندك المهارة والقدرة على صناعة الفارق في عمر الساعي، والخبرة في حسين الشحات، ومعاهم بن شرقي اللي عنده ذكاء كبير في التحرك والحس التهديفي والقدرة على استغلال أنصاف الفرص. خصوصًا في ظل ابتعاد بنجديدة وبقرار عن الفاعلية التهديفية بالشكل المطلوب، واحتياج الفريق لعنصر يقدر يترجم الفرص لأهداف. أما عن الماتش نفسه، فبصراحة أنا مش قلقان منه زي ناس كتير، رغم كل تحفظاتي على عموتة من الناحية الفنية، والسبب إن مباريات بالحجم ده مش دايمًا بتتحسم بالتفاصيل الفنية وحدها. أوقات كتير شخصية اللاعبين وروحهم وإصرارهم على المكسب بيكون ليهم دور أكبر من أي حسابات تانية. وأنا هنا رهاني على لعيبة الأهلي نفسهم، على رجولتهم، وعلى معدنهم وقت الشدة، وعلى إنهم يكونوا قد المسؤولية في مباراة ممكن تكون نقطة تحول حقيقية في مشوار المنافسة على الدوري. لأن الفوز بالمواجهة دي معناه إن الفارق مع بيراميدز هيقل لنقطة واحدة، وده هيرجع الأهلي بقوة للمنافسة ويفتح الباب من جديد، لكن الخسارة هتخلي المهمة أصعب بكتير، وتبعد الفريق خطوة كبيرة عن المنافسة على اللقب. والأجمل بقى وسط كل ده، الثقة الزيادة اللي باينة في كلام بعض المتابعين وتصريحات المنافس، وكأن الأهلي خلاص خرج من الحسابات، وكأن النتيجة مضمونة قبل حتى ما الحكم يطلق صافرة البداية!! الثقة دي تحديدًا ممكن تكون أكبر دافع للاعبي الأهلي، بشرط إنهم يستغلوها صح، ويدخلوا الملعب بعقلية إن الرد مش بالكلام ولا بالتصريحات، الرد الحقيقي هيكون جوه الملعب. ياريت تكون دي المباراة اللي نشوف فيها رد فعل حقيقي من اللاعبين، ويثبتوا إن الأهلي مهما مر بظروف صعبة، عمره ما بيكون خصم سهل، وإن الحسابات والتوقعات حاجة، والملعب وقت الجد حاجة تانية خالص. وإن شاء الله الثقة الزيادة عند المنافس تكون بداية سقوط كل التوقعات دي .. ويكون للأهلي رد تاني خالص جوه الملعب 🔴🦅

قد تمر الأيام، ويظن الإنسان أحيانًا أنه خسر، أو أن طيبته قد أُسيء استخدامها، لكن الله سبحانه وتعالى لا يُضيع أجر المحسنين، وعوضه دائمًا جميل ومبهج للقلوب. فمن زرع الطيبة وحصد الحب، لا بُدَّ أن يرى أثر ذلك ولو بعد حين. الخير لا يترك الطيبين يخسرون كثيرًا 🤍

🔴 معًا من أجل الأهلي .. بس إحنا محتاجين نشوف الأهلي الأول 🔴🦅 ✍🏻 "معًا من أجل الأهلي".. شعار جميل طبعًا، ومفيش أهلاوي واحد ممكن يختلف مع معناه، لكن السؤال هنا.. هو إحنا مختلفين أصلًا على حب الأهلي أو الوقوف في ضهره؟! إحنا عمرنا ما كنا محتاجين دعوة عشان نكون مع الأهلي، ولا محتاجين صورة أو بوست يفكرنا بانتمائنا للنادي. إحنا جمهور الأهلي، والوقوف وراه مش اختيار مرتبط بمكسب أو خسارة، ولا شعار بنرفعه وقت ما نحتاج نتكاتف. لكن في المقابل، إحنا محتاجين نشوف حاجة حقيقية على أرض الواقع. محتاجين نشوف فريق عنده شخصية، عنده روح، عنده رغبة في الفوز، عنده شكل وهوية. فريق ينزل الملعب وهو عارف قيمة التيشيرت اللي لابسه، ويقدر يخلّي جماهيره تحس بالفخر والاطمئنان عليه. محتاجين نشوف إدارة عندها رؤية واضحة، واختيارات فنية تليق باسم الأهلي وإمكانياته وطموحات جماهيره. ومحتاجين نشوف قرارات حقيقية تعالج أسباب التراجع، مش مجرد كلام جميل وشعارات بتتكرر من غير ما نشوف تغيير ملموس. لأن الحقيقة إن الجمهور مش مقصر في حق الأهلي، ومش هو اللي محتاج يتقال له كل شوية اتحدوا وساندوا وكونوا مع الفريق. الجمهور مستعد يعمل كل ده وزيادة، لكن من حقه في المقابل يشوف فريق يستحق الدعم، ومنظومة تقدر حجم المسؤولية اللي عليها. إحنا مش ضد شعار «معًا من أجل الأهلي» .. بالعكس، ده المفروض يكون مبدأ ثابت عند كل أهلاوي. لكن قبل ما تطلبوا من الجمهور يكون معاكم .. لازم نشوف إنكم فعلًا بتعملوا كل اللي عليكم من أجل الأهلي. رجعوا لنا الأهلي اللي نعرفه .. الأهلي اللي بنشجعه ونفتخر بيه. رجعوا لنا الأهلي اللي كان مجرد اسمه كفاية يخلي أي منافس يحسب له ألف حساب. وقتها مش هتحتاجوا ترفعوا شعار «معًا من أجل الأهلي»، لأنكم هتلاقوا الجمهور كله وراكم من غير ما تطلبوا. إحنا مش عاوزين كلام يحمسنا يوم .. إحنا عاوزين أفعال تطمّنا إن الأهلي راجع. لأن الأهلي أكبر من أي بوست، وأكبر من أي شعار .. ومش هيرجع بالكلام، هيرجع بالشغل والقرارات الصح والروح اللي غابت عن الفريق. الأهلي يستحق مننا كل الدعم .. لكنه كمان يستحق من مسؤوليه ولاعبيه إنهم يكونوا على قدر اسمه وتاريخه وجماهيره ❤️🦅

🔴 محمود الخطيب .. أسطورة صنعت تاريخ، وحكاية عشق وانتماء لا تنتهي ❤️🦅 ✍🏻 فيه أسماء في تاريخ الأهلي مش مجرد أسماء عدّت على النادي، ولا مجرد لاعيبة لبست التيشيرت الأحمر وحققت بطولات. فيه أسماء بقت جزء من روح الكيان، وعاشت في وجدان جماهيره، وارتبطت بأجمل ذكرياته وحكاياته .. والكابتن محمود الخطيب واحد من أهم الأسماء دي. بيبو مش مجرد لاعب موهوب، ولا أسطورة صنعتها الأهداف والبطولات. بيبو حكاية عشق وانتماء، بدأت من جوه الملعب، وكبرت في قلوب الملايين، وفضلت مستمرة حتى بعد ما انتهت رحلته كلاعب. اسم ارتبط بواحدة من أجمل فترات تاريخ الأهلي، وقدم لجماهيره لحظات من المتعة والفرحة عمرها ما تتنسي، وكان واحد من النجوم اللي قدروا يخلّوا حب الأهلي حكاية بتتنقل من جيل لجيل. فيه أجيال اتعلقت بالأهلي من خلاله، وأجيال تانية ورثت حبه من حكايات أهلها .. لأن الأساطير الحقيقية مش بتختفي بمرور السنين، ولا قيمتها بتتغير بتغير الأجيال. السنين ممكن تعدّي، والأجيال تتغير، والنجوم تيجي وتمشي .. لكن فيه أسماء بتفضل محفورة في ذاكرة التاريخ، ومكانتها بتفضل محفوظة في قلوب الناس مهما طال الزمن. وبعيدًا عن أي اختلاف في وجهات النظر أو تقييم لأي مرحلة إدارية، يفضل محمود الخطيب قيمة كبيرة في تاريخ النادي الأهلي، وأحد أبرز رموزه اللي ارتبط اسمهم بالكيان وتاريخه وجماهيره. وفي يوم ميلاده، إحنا مش بنحتفل بمجرد ذكرى ميلاد لاعب سابق أو رئيس للنادي .. إحنا بنحتفل بتاريخ ورمز وواحد من أصحاب البصمات اللي صعب تتكرر في حكاية الأهلي، وبإنسان ارتبط اسمه بذكريات ومشاعر أجيال كاملة من الأهلاوية. كل سنة وأنت طيب يا بيبو، كل سنة وأنت بخير وصحة وسعادة، وربنا يديك على قد ما أسعدت الملايين، ويكتب لك الخير والتوفيق في كل خطوة. 🔴 الأهــلــي هــو الــتــاريــخ .. وبــيــبــو واحــد مــن أجــمــل حــكــايــاتــه ❤️🦅

🔴 من ريبيرو لتوروب لعموتة .. ولسه الأهلي بلا روح ولا هوية!! 🔴 ✍🏻 من ريبيرو لتوروب لعموتة .. تلاتة مدربين مختلفين، ومعظم القوام الأساسي للفريق زي ما هو، مع بعض التدعيمات اللي للأسف ما كانتش على مستوى طموحات الأهلي وجماهيره.. والنتيجة؟ الأهلي لسه غايب .. لا شكل واضح، ولا أداء يطمن، ولا فريق يخوّف منافسيه زي ما اتعودنا نشوفه! مع ريبيرو كانت فيه مشاكل، ومشي.. وجه بعده توروب، والمشاكل فضلت موجودة!! ودلوقتي مع عموتة، لسه نفس المعاناة ونفس الأسئلة، وكأننا بنعيد نفس التجربة من الأول، مع اختلاف الأسماء على الخط! وهنا لازم نقف ونسأل نفسنا: هو الخلل فين بالظبط؟! هل المشكلة في اللعيبة اللي مش قادرة تقدم المستوى المنتظر منها؟ ولا في اختيارات الإدارة للمدربين؟! ولا إحنا قدام أزمة أكبر من مجرد مدرب أو لاعب؟ لو المشكلة في اختيار المدرب، يبقى لازم نسأل: هل الإدارة بتختار المدرب المناسب لطبيعة الأهلي وإمكانيات لاعيبته واحتياجات الفريق، ولا بتختار اسم وبعدين تحاول تكيّف الفريق على طريقته؟ لأن مش أي مدرب عنده سيرة ذاتية كويسة يبقى بالضرورة مناسب للأهلي، اللي ليه طبيعة خاصة وشخصية وتاريخ وطموحات، ومحتاج مدرب يقدر يتعامل مع حجم النادي وضغط جماهيره، ويقدم كورة تليق بإمكانياته واسمه. ولو المشكلة في اللعيبة، يبقى لازم نسأل: هل العناصر الموجودة فعلًا على مستوى طموحات الأهلي وقادرة على تنفيذ أفكار أكتر من مدرب؟ ولا فيه قصور في جودة بعض العناصر، ومراكز محتاجة تدعيم بلاعيبة تقدر تعمل الفارق وتضيف للفريق؟ الأهم من كل ده، إننا بقينا نشوف فريق ممكن يكسب ماتش، لكن من غير ما يقدّم الأداء اللي يخلي الجمهور يطمن عليه. مكسب من غير إقناع، ومن غير شخصية واضحة، ومن غير ما نحس إن فيه فكرة أو طريقة لعب الفريق ماشي عليها! طبعًا، المكسب مهم، والبطولات هي الهدف الأساسي، لكن هل معنى إن الأهلي كسب إنه كده بقى تمام؟! وهل المفروض نتجاهل تراجع الأداء وغياب الروح لمجرد إننا خرجنا بالنقط التلاتة؟ الأهلي اللي إحنا نعرفه فريق بيضغط، بيهاجم، بيحارب على كل كورة، وبيفرض شخصيته على منافسيه فريق عنده شراسة ورغبة في الفوز، ولما ينزل الملعب تحس إن عنده هدف وفكرة، وإن كل لاعب عارف هو مطلوب منه إيه! إنما لما تبقى الروح غايبة، والأداء متراجع، ومفيش تطور واضح من ماتش للتاني، يبقى لازم نقلق ونسأل نفسنا: إحنا رايحين على فين؟ إحنا من حقنا نشوف فريق بيتطور، ومدرب عنده رؤية واضحة، ولعيبة عندها الرغبة في الفوز، ومنظومة بتتعلم من أخطائها بدل ما تفضل تكررها. وهنا بقى تيجي مسؤولية الإدارة؛ لأن تغيير المدربين من غير ما نراجع أسباب فشل التجارب السابقة، معناه إننا ممكن نفضل نلف في نفس الدايرة. مدرب يمشي، ومدرب ييجي، ونفس المشاكل تفضل موجودة، وفي الآخر الفريق هو اللي بيدفع الثمن، والجمهور هو اللي بيعيش حالة القلق والإحباط! ولو المشكلة في المنظومة كلها، فالأزمة أكبر وأخطر؛ لأن الحل مش هيكون في تغيير مدرب جديد، ولا الاستغناء عن كام لاعب وخلاص! لكن في مراجعة حقيقية لطريقة إدارة الملف الكروي داخل النادي، بداية من التخطيط واختيار المدربين، مرورًا بالتعاقدات وتحديد الاحتياجات الفنية، وصولًا للمحاسبة على النتائج والأداء. إحنا بنتكلم عن نادي بحجم الأهلي وتاريخه، نادي المفروض يكون عنده رؤية واضحة وهوية كروية ثابتة، ومعايير محددة لاختيار المدرب واللاعب، بحيث أي تغيير يحصل يكون هدفه تطوير الفريق، مش مجرد محاولة للخروج من أزمة مؤقتة. والأخطر إن الأهلي جاي من موسم خسر فيه كتير، وكان المفروض ده يكون دافع لبناء فريق أقوى وأكثر شراسة، لكن بدل ما نشوف رد فعل يليق بحجم النادي وطموحات جماهيره، لسه بنطرح نفس الأسئلة، ولسه بندور على أسباب غياب الفريق، ولسه مستنيين نشوف الأهلي اللي نعرفه! عشان كده، قبل ما نحمل المدربين وحدهم المسؤولية، أو نحكم إن اللعيبة مش نافعة، لازم نسأل السؤال الأهم: مين المسؤول عن وصول الأهلي للحالة دي؟ هل الخلل في اختيارات النادي للمدربين؟ ولا في مستوى اللعيبة والتدعيمات؟ ولا في غياب الرؤية والتخطيط والمحاسبة؟ والإجابة المنطقية إن الأهلي محتاج مراجعة حقيقية وشجاعة، من غير تبرير للأخطاء، ومن غير قرارات عشوائية، ومن غير ما كل طرف يهرب من مسؤوليته على حساب الطرف التاني. إحنا مستعدين ندعم، ومستعدين نصبر، ومستعدين نقف ورا الفريق في أصعب الظروف .. بس في المقابل، لازم نشوف حاجة تستحق الدعم والصبر ده! لازم نشوف تطور، وروح، ورغبة حقيقية في الفوز، ولازم نحس إن فيه شغل بيتعمل عشان الأهلي يرجع لمكانته الطبيعية. لأن المشكلة مش مين يمشي ومين يفضل وبس .. المشكلة إزاي نرجع الأهلي فريق له شكل وهوية وشخصية، فريق يخوّف منافسيه قبل ما ينزل الملعب، ويليق باسمه وتاريخه وجماهيره 🤚🔴🦅

مستعدين ندعم، ومستعدين نصبر .. بس نشوف منك أي حاجة، تستحق الدعم والصبر ده 🤚 @AlAhly

الــحــظ .. زمــلــكــاوي 🧿🏹

🔴 مصلحة الأهلي أولًا .. والنقد للإصلاح، مش للهدم! 🔴 ✍🏻 إحنا دلوقتي في مرحلة مهمة من المنافسة على بطولة الدوري، وبطولة الكونفدرالية، وده وقت محتاج مننا كلنا نفكر بعقل ووعي، ونبقى حريصين على مصلحة الأهلي قبل أي حاجة تانية. طبعًا، من حق أي أهلاوي ينتقد ويعترض ويشير لأي تقصير شايفه، وده حق أصيل ومحدش يقدر ينكره. لكن النقد لازم يكون بموضوعية وإنصاف، بعيدًا عن المبالغة والتجريح وتحويل بعض اللاعبين لأعداء للنادي، وكأننا في معركة معاهم مش بنحاول نصلح أوضاع فريقنا!! إحنا محتاجين نضغط بكل قوة عشان أي لاعب يلبس قميص الأهلي ويدخل الملعب يكون عنده الجوع الكروي والرغبة في الفوز، ويقاتل على كل كرة، ويلعب بالروح والجدية اللي تليق باسم النادي وتاريخه. لأن الحقيقة إن فيه لاعيبة ممكن توصل لمرحلة من الشبع الكروي، وتفقد جزء من الدافع والحماس، وده أمر لازم يتعالج. وعلشان كده كانت فيه ضرورة لتدخل إداري وفني يعيد حالة الاستنفار والانضباط لمنظومة الفريق. لكن فيه فرق كبير بين إنك تطالب بمحاسبة المقصر، وبين إنك تشيطنه وتحوّله لهدف لحملة هجوم مستمرة!! اللي بيحصل على السوشيال ميديا محتاج وقفة، لأننا بقينا نشوف موجات هجوم بتزيد يوم بعد يوم، وأحيانًا من غير ما نفكر في توقيتها ولا في تأثيرها على الفريق. وبقينا ننساق ورا كلام بعض صناع المحتوى، واللي بيدوروا على الترند والتفاعل، وبرامج كل همها نسب المشاهدة، من غير ما نحسب إحنا كجمهور بنساعد فريقنا ولا بنحط عليه ضغوط إضافية في توقيت حساس. يا جماعة، مش كل كلام بيتقال يستحق إننا نصدقه، ومش كل رأي بيتصدر المشهد يبقى بالضرورة هدفه مصلحة الأهلي. لازم نسمع ونفكر ونحلل، ونفرق بين النقد اللي هدفه الإصلاح، والهجوم اللي بيزود الاحتقان ويضر استقرار الفريق!! والأهم إننا نفهم إن أي تغيير في قوام الفريق، أو تحديد مين يستمر ومين يرحل، مش قرار هيتحسم بمجرد موجة غضب على مواقع التواصل. دي أمور ليها حساباتها وتوقيتها، وبتحتاج تقييم فني وإداري شامل، مش أحكام متسرعة تحت ضغط الجماهير أو تأثير بعض الأصوات اللي بتعرف إزاي تحرك المشاعر!! إحنا مش مطالبين نتجاهل الأخطاء .. لكن مطالبين نتعامل معاها بوعي ومسؤولية. ننتقد الأداء، ونطالب بالمحاسبة، ونضغط عشان نشوف الأهلي بالشكل اللي يليق بيه .. لكن من غير ما نحوّل المدرجات والسوشيال ميديا لساحة تصفية حسابات مع لاعب هنا أو لاعب هناك. لأن في النهاية، أي ضرر يصيب استقرار الفريق إحنا أول ناس هنتأثر بيه، ومش من المنطقي إننا نكون سبب في زيادة معاناة فريقنا وإحنا فاكرين إننا كده بنخدمه!! خلّوا بوصلتنا دايمًا مصلحة الأهلي، مش الترند، ولا الانفعال اللحظي، ولا كلام الناس اللي بتتغير مواقفها حسب النتيجة والموجة السائدة!! انتقدوا، حاسبوا، وطالبوا بالأفضل .. لكن بإنصاف ومن غير شيطنة. الفريق محتاج مننا وعي ودعم وضغط إيجابي يساعده يستعيد قوته وشخصيته، وفي نفس الوقت محتاجين نحافظ على وحدة المنظومة واستقرارها لحد ما نعدي المرحلة دي ونحقق هدفنا. الأهلي أكبر من أي شخص بيحاول يوجّه الجمهور ناحية معينة. ومصلحة النادي لازم تفضل فوق الجميع، وده معناه إننا نفكر كويس قبل ما نشارك في أي حملة أو نردد أي كلام!! مش كل هجوم اسمه نقد، ومش كل دعم معناه تبرير للأخطاء .. الفارق الحقيقي هو إنك تكون عارف إمتى تنتقد، وإزاي تنتقد، ولمصلحة مين بتتكلم. ✍🏻 أتمنى الرسالة تكون وصلت، ونفكر كلنا بعقلية المشجع اللي عايز الأهلي يكسب ويستقر ويرجع للمكانة اللي يستحقها، مش بعقلية اللي بيدور على لاعب يعلّق عليه كل الأخطاء 🤚🔴🦅

😂😂😂😂😂😂😂 نادي الزمالك قرر تقديم بلاغات إلى النيابة العامة ضد من اتهمهم بالإساءة إلى لاعب الفريق شيكوبانزا، وكتابة تصريحات وصفها بالكاذبة والمفبركة .. وتأتي هذه الخطوة في إطار تحرك الزمالك للرد على ما يُثار بشأن شيكوبانزا، من خلال المسار القانوني 😂😂😂😂😂😂😂

🔴 المجري مصطفى عبده .. ووجهة نظر غير موفقة!! 🔴 ✍🏻 مع كامل احترامي وتقديري للكابتن مصطفى عبده، باعتباره واحد من أساطير الأهلي وأحد الأسماء اللي ليها مكانتها في تاريخ النادي، لكن تصريحه الأخير مع إبراهيم فايق، لما قال إن الأهلي مش هينصلح حاله غير لما يبيع إمام عاشور وزيزو، أنا مختلف معاه تمامًا .. مش دفاعًا عن مستوى اللاعبين، لكن اعتراضًا على الفكرة نفسها وطريقة طرحها. خلينا نكون واضحين، مفيش أهلاوي راضي عن مستوى إمام وزيزو في الفترة الأخيرة، وخصوصًا إمام اللي مفيش مبرر مقنع لاستمرار تراجع مستواه بالشكل ده. أما زيزو، فبجانب تراجع مستواه، اتعرض لضغوط كبيرة من أول ما جه الأهلي، ومعاها أخطاء في توظيفه جوه الملعب أثرت على ظهوره بالشكل اللي كنا منتظرينه منه. لكن هل معنى كده إن الحل هو بيع الاتنين، وإن الأهلي مش هيرجع لطبيعته غير برحيلهم؟! هنا بقى نقطة اختلافي الحقيقية. أولًا، فيه فرق بين إنك تنتقد لاعب وتواجهه بأخطائه، وبين إنك تطلع على شاشة التلفزيون، وأمام ملايين المشاهدين، وتطالب برحيله وكأنك أصدرت حكم نهائي عليه. لأن الكلام لما يطلع بالشكل ده للإعلام، ممكن يتحول لضغط إضافي على اللاعب، ويفتح الباب قدام حملات هجوم عليه من كل اتجاه، خصوصًا لما يكون الكلام صادر من واحد من أبناء الأهلي وأساطيره، المفروض إنه حريص على مصلحة النادي ولاعبيه. آه، اللاعب المقصر لازم يتحاسب، لكن مش كل لاعب يتراجع مستواه يبقى الحل إننا نتخلص منه. كرة القدم مليانة أمثلة للاعبين مروا بفترات تراجع كبيرة، وبعدها رجعوا أقوى واستعادوا مستواهم. وإمام وزيزو، مهما اختلفنا على مستواهم الحالي، عندهم إمكانيات فنية شفناها قبل كده، وده اللي يخلينا نطالب باستعادة مستواهم بدل ما نستسهل فكرة الاستغناء عنهم. وخلينا نسأل نفسنا: لو الاتنين رجعوا لمستواهم المعهود، يا ترى وقتها هيبقى موقفنا إيه من المطالبة برحيلهم؟! وهل هنعترف إن القرار ده كان متسرع، ولا هنعتبر رجوعهم لمستواهم حاجة طبيعية وننسى إننا كنا بنطالب برحيلهم؟! ثانيًا، ليه التركيز على إمام وزيزو بالذات، وكأن الأزمة كلها متعلقة بالاتنين دول؟! ما هو الواقع بيقول إن أغلب لاعيبة الفريق مستواهم مش بالشكل المطلوب، وحتى الصفقات الأجنبية اللي الأهلي دفع فيها مبالغ ضخمة وصلت لـ ملايين الدولارات، لسه ماقدمتش المستوى اللي كنا مستنيينه منها. طيب، لو هنمشي بنفس المنطق ده مع كل لاعب تراجع مستواه أو ماقدمش المنتظر منه، يبقى هنمشي كام لاعب من الفريق؟! وهل بيع اللاعبين هو الحل السحري اللي هيرجع للأهلي شخصيته وهيبته، ولا إحنا كده بنختزل أزمة فريق كامل في اسمين ونتجاهل باقي الأسباب اللي محتاجة تتعالج؟! ثالثًا، أنا هنا مش بدافع عن إمام عاشور ولا زيزو، ولا ببرر تراجع مستواهم، وكنت هقول نفس الكلام لو التصريح اتقال على أي لاعب تاني في الأهلي. لأن مصلحة النادي عندي فوق أي اعتبار، ومش معنى إني رافض طريقة انتقاد معينة إني بدافع عن اللاعب أو بدي له حصانة من الحساب. لكن لما واحد من رموز الأهلي يطالب برحيل لاعبين لسه موجودين في الفريق، إيه اللي يمنع إعلام المنافسين ومحلليهم من استغلال التصريح وتضخيمه؟! وإزاي نلوم أي حد بره النادي لما يهاجم لاعبينا، وإحنا أحيانًا بنقدم له المادة اللي يشتغل عليها بإيدينا؟! وده مش معناه إن أبناء الأهلي وأساطيره ممنوعين من النقد، بالعكس، كل واحد من حقه يقول رأيه، لكن فيه فرق بين نقد هدفه الإصلاح، وكلام ممكن يزود الأزمة تعقيدًا من غير ما يقدم حل حقيقي!! النقد نفسه ليه أصول، وليه طريقة، وليه هدف المفروض يكون واضح. كان ممكن الكابتن مصطفى عبده يقول إن مستوى إمام وزيزو حاليًا ميأهلهمش للمشاركة أساسيين، وإن الأفضل يقعدوا على الدكة لحد ما يستعيدوا مستواهم. وكان ممكن يطالب الجهاز الفني ومدير الكرة إنهم يقعدوا مع اللاعبين، ويفهموا أسباب التراجع ويشتغلوا على علاجها، مع توضيح إن استمرار الأداء بالشكل ده ممكن يكلفهم مكانهم في تشكيل الأهلي، وكمان فرصهم في المنتخب. أهو كده انتقدت، ووضحت وجهة نظرك، وحددت المشكلة، وطرحت حلول ممكن تساعد في علاجها، بدل ما تكتفي بالمطالبة برحيل اللاعبين. الأهلي مش ناقصه يخسر عناصر عندها إمكانيات فنية، لكنه محتاج يعرف إزاي يستفيد من إمكانيات لاعيبته، ويعالج أسباب تراجعهم، ويحاسب كل مقصر بالشكل المناسب. لأن فيه فرق كبير بين إنك تنتقد لاعب عشان تفوقه، وإنك تنتقده بطريقة ممكن تخسره نهائيًا. والفرق أكبر بين إنك تطالب بإصلاح منظومة كاملة، وإنك تختزل كل مشاكلها في اسمين. مصلحة الأهلي مش في المجاملة، ولا في الهجوم لمجرد الهجوم .. مصلحة الأهلي في النقد الواعي، والمحاسبة العادلة، وإننا نختار الحل الصح في الوقت الصح 🤚🔴🦅

🔴 الأهلي محتاج لعيبة جعانة كورة .. مش جعانة فلوس! 🔴🦅 ✍🏻 بعيدًا عن سهولة فريق كيتارا، وضعف مستواه، وإن المباراة مش المقياس الحقيقي اللي نحكم بيه على مستوى الأهلي .. لكن اللي يستحق الإشادة فعلًا هو الروح والرغبة اللي ظهر بيهم اللعيبة، والإصرار على الفوز وتقديم أداء كويس، لأن دي الروح اللي إحنا محتاجين نشوفها باستمرار، مش في ماتش واحد أو قدام منافس إمكانياته أقل مننا. لما بنلعب بلاعيبة عندها روح ورغبة حقيقية في المكسب، حتى لو الفريق في أسوأ حالاته، بنشوف أداء مختلف، وبنشوف الأهلي اللي نعرفه، الأهلي اللي بيقاتل، واللي بيضغط على منافسه، واللي بيحسسك إن كل لاعب في الملعب عنده استعداد يحارب عشان يكسب الماتش. وده بيأكد إن المشكلة مش دايمًا في الإمكانيات، ولا في الأسماء، ولا حتى في المدرب لوحده .. لأن الروح والرغبة ممكن يغيّروا شكل فريق بالكامل، ويخلّوا لعيبة إمكانياتها أقل تقدم كل اللي عندها، وتظهر بشكل أفضل من لعيبة عندها إمكانيات أكبر، لكن من غير نفس الرغبة ولا نفس الدافع. إحنا محتاجين لعيبة جعانة كورة .. جعانة بطولات، جعانة انتصارات، جعانة إنها تثبت نفسها، وعندها رغبة حقيقية إنها تفرّح جمهور الأهلي. مش محتاجين لعيبة كل اللي يهمها عقدها ومستحقاتها ومكاسبها الشخصية، من غير ما نشوف المقابل الحقيقي في الملعب .. لأن الفلوس مهما كانت مهمة، عمرها ما كانت بديل للروح، والاسم مهما كان كبير، مش كفاية لوحده عشان يصنع الفارق. قميص الأهلي مش مجرد وظيفة بتقبض عليها آخر الشهر، ولا اسم كبير تعيش على تاريخه .. قميص الأهلي مسؤولية، وضغط، وتضحيات، ورغبة مستمرة في الفوز، لأنك بتلعب لنادي جمهوره مش بيقبل بأقل من إن فريقه ينافس على كل بطولة، ويكون دايمًا مصدر خوف وقلق لأي منافس. واللي مش قادر يستوعب حجم المسؤولية دي، لازم يراجع نفسه كويس .. لأن الأهلي أكبر من أي لاعب، ومصلحة النادي لازم تكون فوق مصلحة أي فرد مهما كان اسمه أو تاريخه. إحنا مش بنطلب المستحيل .. إحنا بنطلب نشوف لعيبة عندها نفس تكسب، وقلبها على الفريق، وبتقاتل من أول دقيقة لآخر دقيقة .. لعيبة تحسسنا إن خسارة الأهلي بتوجعها، وإن الفوز عندها مش مجرد تلات نقط، لكنه واجب تجاه نادي وجمهور عظيم. 🔴 الأهلي مش ناقصه لعيبة بتقبض .. الأهلي محتاج لعيبة تستاهل اللي بتقبضه، وتكون قد الشعار اللي على صدرها. لأن الأهلي طول عمره كان أكبر من مجرد أسماء، وقوته الحقيقية كانت في روح اللعيبة، وشخصيتهم، وإصرارهم على المكسب مهما كانت الظروف. الأهلي محتاج لعيبة جعانة كورة .. لأن اللي شبعان من غير ما يكون عنده طموح، عمره ما هيقدر يشبع جمهور الأهلي بطولات 🔴🦅

شكرًا من القلب لكل حد عزاني وواساني بكلمة طيبة أو دعوة صادقة، ربنا يجازيكم كل خير، ولا يوريكم حزن في عزيز عليكم

وفقًا لـ شبكة "أون تايم سبورتس" 🚨🚨 3 قرارت عاجلة في الأهلي بعد التعادل مع القناة: 🔥 📌 التفكير جديًا في إيقاف مستحقات اللاعبين لحين تحسن النتائج 📌 عقد جلسة تجمع اللاعبين مع الحسين عموتة المدير الفني و وائل جمعة مدير الكرة 📌 تجديد الثقة في الحسين عموتة مديرًا فنيًّا بالنادي الأهلي، ولا مساس بالحسين عموتة، ومستمر حتى نهاية عقده، وحتى نهاية الارتباط الرسمي!! 🔴🦅

🔴 الأهلي لازم يلحق نفسه قبل فوات الأوان! 🔴🦅 ✍🏻 رغم إني دايمًا من الناس اللي بتطالب بدعم الأهلي والوقوف ورا الفريق، لكن للأسف اللي بيحصل من بداية الموسم أجبرني إني أقول كلام كنت أتمنى ما أضطرش أقوله! يا ريت صوتنا كجماهير يوصل لمجلس إدارة النادي الأهلي، لأن اللي بيحصل مينفعش يستمر بالشكل ده! من أول الموسم، الأهلي مفيش له شكل واضح، ولا أداء يطمن، ولا طريقة لعب تفرض شخصيته على المنافسين وتخلي أي فريق يحسب له ألف حساب! إحنا بنتكلم عن الأهلي يا جماعة، النادي اللي المفروض بعد اللي حصل الموسم اللي فات يكون داخل الموسم الجديد برغبة شرسة في التعويض، وبشخصية البطل اللي عاوز يرجع يفرض سيطرته على الجميع.. لكن للأسف، اللي بنشوفه عكس كده تمامًا! الأهلي بدل ما يكون الفريق اللي المنافسين بيخافوا منه، بقى فريق سهل على أي منافس إنه يطمع فيه ويضغط عليه ويخرج قدامه بنتيجة إيجابية! وده مش الأهلي اللي نعرفه، ولا دي الشخصية اللي اتعودنا نشوفها من فريقنا. ومباراة القناة الأخيرة جرس إنذار جديد، بيأكد إن المشكلة مش مجرد مباراة سيئة أو تعثر عابر، لكن فيه خلل واضح لازم يتعالج قبل ما الأمور تخرج عن السيطرة. والأخطر من كل ده إن الأهلي بالشكل ده بيفرّط في فرصته في المنافسة على الدوري، وبيمنح بيراميدز فرصة إنه يستفيد من تعثراته ويقرب أكتر من اللقب، من غير ما الأهلي يضغط عليه بالشكل اللي يليق باسمه وإمكانياته! والسؤال اللي لازم يتسأل دلوقتي: لو الأهلي استمر بنفس الأداء ده، هنواجه بيراميدز إزاي؟! مباراة بيراميدز مش مجرد ثلاث نقاط، دي مواجهة ممكن يكون ليها تأثير كبير على شكل المنافسة، ولو الأهلي دخلها بنفس الحالة اللي بنشوفها من بداية الموسم، فإحنا قدام احتمالات صعبة جدًا، وأي خسارة كبيرة هتكون كارثة بكل المقاييس، خصوصًا في ظل الظروف الحالية. وساعتها هنرجع لنفس الدوامة المعتادة: هل المدرب هيمشي؟ هل الإدارة هتتمسك بيه؟ وهل هنضطر نبدأ من جديد ونضحي بجزء أكبر من الموسم بسبب قرارات اتأخرنا في اتخاذها؟! إحنا مش عاوزين نستنى الكارثة عشان نتحرك، ولا نستنى ضياع الدوري عشان نبدأ نحاسب ونعالج الأخطاء! مجلس إدارة الأهلي لازم يتحمل مسؤوليته ويتدخل دلوقتي، ويقيّم الوضع الفني بوضوح، ويحدد أسباب التراجع .. وهل الجهاز الفني قادر فعلًا على تصحيح المسار ولا لأ؟! لأن استمرار الوضع بالشكل ده مش في مصلحة الأهلي، ومش من المنطقي إننا نفضل نستهلك الوقت والمباريات في انتظار تحسن مش شايفين له ملامح واضحة لحد دلوقتي. الدعم عمره ما كان معناه السكوت عن الأخطاء، والصبر مش معناه إننا نسيب الموسم يضيع قدام عينينا! إحنا بندعم الأهلي لأنه نادينا، ولأن مصلحته فوق أي اعتبار، وعشان كده لازم نتكلم ونطالب بالتحرك قبل ما نوصل لنقطة يبقى فيها الإصلاح أصعب والخسائر أكبر. لسه فيه وقت لإنقاذ الموسم، لكن الوقت مش مفتوح بلا نهاية .. اتحركوا قبل فوات الأوان، لأن الأهلي أكبر من إنه يدخل كل مباراة وهو مش عارف يفرض شخصيته، وأكبر من إنه يتحول لفريق المنافسين يطمعوا فيه بدل ما يخافوا منه 🤚🔴🦅 @AlAhly