يمكن هي أول مرة بنزل فيها صورة للرئيس أحمد الشرع, الجولاني, أبو محمد, الشيخ.. سَمّوه متل ما بدكن. بس خلّوني وضّح موقفي من البداية: أنا شايف إنو الشرع اليوم هو الشخص الأقدر على إدارة المرحلة الحالية واحتواء تناقضاتها, وإنو سقوط السلطة بهالوقت ممكن يجرّ سوريا نحو سقوط الدولة نفسها. ولأ, هاد البوست مو هربان من تشبيح الأسديين, وكمان لأ, ما رح جيبلكم مثال مرسي والانقلاب العسكري اللي صار بمصر, لأنو تشبيه الحالتين ببعض تشبيه غير دقيق سياسياً, واستخدامه كأنو الحالتين نسخة عن بعض يا إما ناتج عن جهل بالفوارق السياسية, يا إما محاولة لتخويف الناس من أي نقاش مختلف. و كمان لأ, هاد الحساب أبعد ما يكون عن التطبيل, واللي متابعني بيعرف إنو انتقادي للسلطة ما كان يوماً غايب. لذلك, خليك معي شوي, واعذروني على العامية بهالبوست, لأنو الموضوع لازم يؤخذ ببساطة اللغة العامية على خطورته و مسؤوليّاته. خلّونا نحكي بصراحة عن واقع سورية اليوم: عنا مشاكل اقتصادية واجتماعية كتيرة, بس في ثلاث ملفات برأيي أخطر من غيرها: - الكيان اللي ناطر أي لحظة ضعف كبيرة, وعم يواصل انتهاك أراضينا بالجنوب. - الضعف العسكري واللوجستي اللي بتعاني منه سورية حالياً. - شبه انعدام الموارد والإيرادات الاقتصادية العامة الكافية لقيام دولة قادرة على النهوض بواجباتها. - وفوق هاد كله, عنا فساد كبير, ومحسوبيات, واحتكار, ومجلس شعب مغيّب عن دوره الرقابي والمحاسبي, وإعلان دستوري بحاجة لتعديلات جوهرية وعاجلة, وفقر, وضعف كفاءة عند عدد من الوزراء والمسؤولين. في مشاكل كتيرة حكيت عنها سابقاً, ورح ضل انتقدها وأحكي عنها حتى موت. بس في فرق كبير بين إنك تنتقد السلطة, وبين إنك تتجاهل حجم المخاطر اللي ممكن تنتج عن سقوطها. لما نقارن مشاكل اليوم بمشاكل البارحة, مو معناته إننا عم نقلل من أخطاء الحاضر, بل معناته إننا لازم نفهم الفرق بين دولة عم تحاول تتعافى من إرث مدمر, ودولة كانت أجهزتها الأمنية قادرة تخوّفك حتى من كلمة بتحكيها. يا رجل, قبل سنتين بالضبط, ما كنت أقدر أحكي بكلمة. وبفضل الله, أنا من أوائل الناس اللي كان عندها موقف معارض للنظام الأسدي, متل ما بتعرفوا, بس كنت ساكت خوفاً على أمي وأخواتي وأخي وخالاتي بدمشق من بطش النظام. اليوم كل هالمعادلة تغيرت, و صرنا نحكي, و صار في نشطاء و إعلاميين و صحفيين كب,, كب متل ما عم قلك. منرجع للموضوع: من حسن حظنا انو في اتفاقيات و معادلات اقتصادية و جيو سياسية بالمنطقة أدت للتوافق مع السلطة السورية حالياً و ما صار فينا متل أفغانستان و طالبان, الله وكيلك, و هي نقطة كبيرة و هائلة للسلم الدولي, إلا انو المشاكل الداخلية و بالاخص الاقتصادية و تسليم المناصب و سوء إدارة ارث الاسد و غياب قوة مجلس الشعب كرقيب و محاسب هي حالياً ما يضعف الدولة و السلطة على حد سواء, فكلاهما راكب واحد في سفينة اسمها مستقبل سورية نأمل لها النجاة. مين اللي قادر بمعية ربّك يحل كل هالمشاكل؟ و مين اللي سقوطه رح يعمل فتنة متل الفتنة اللي صارت ببلاد المسلمين وقت معاوية بن يزيد بن معاوية بن أبي سفيان تخلى عن الحكم؟ في ناس شايفة الرئيس أساس المشكلة, او تم وضعه لادارة سورية من قبل جهات خارجية, و في ناس شايفته الشيخ المحرر الفاتح, و صور كتير نحنا بغنى عن ذكرها, أمّا أنا فأنا شايفه بغير صورة: شايف انو المسؤولية عليه كبيرة, و الضغوط الدولية اكبر, و ارضاء (معارضوا البارحة, موالوا اليوم للهيئة) أمر ماله سهل و بيحتاج تنازلات و مناصب و تقسيم حصص, و هاد كله ما رح يقدر عليه اي حدا بهاد الوقت الا السيد الشرع بخبرته و علاقاته مع الاطراف جميعا, أنا ما عم دافع عن كرسي, ولا عم راهن على شخص لذاته. أنا عم راهن على فرصة سورية للخروج من تاريخ طويل من الاستبداد والدمار, من دون ما نضيّع هالفرصة بصراعات على السلطة أو بحسابات الانتقام أو بتكرار أخطاء الماضي. يا سيادة الرئيس: التاريخ ما رح يحاسبك على قدرتك على توحيد الفصائل و إدارة سورية بعد التحرير فقط, رح يحاسبك على الدولة اللي رح تتركها للسوريين. إذا قدرت تحوّل هالمرحلة من إلى دولة قائمة على مؤسسات مستقلة ومن تسويات الحصص إلى العدالة والكفاءة, رح تحمي هالسفينة من الغرق عاجلاً لا آجلاً, أما إذا ضل الفساد موجود, والمحاسبة غائبة, والكفاءة آخر الاعتبارات, فلا تطلبوا من الناس أن تعتبر صبرها واجباً وطنياً إلى ما لا نهاية و كل من يتكلّم رح يكون خائن و عميل و مندس. اخي ابو محمد انا بعرف انو المسؤولية كبيرة, وهي اول بوست يمكن بنزله برسالة لحضرتكم بعد ما وصلني مبارح كلام انو كلامي واصل لعندكم, الله وكيلك بعرف انو المشكلة كبيرة, و المسؤولية كبيرة, بس انت اللي قبلتها, و ارجوك يا سيادة الرئيس انقذ هالسفينة من الغرق. لا لبردى و لا للعاصي و لا الفرات و لا الأرض و لا للهواء, بل لأنه اهلها عانوا كتير و بيستاهلوا النجاة -------- عبد الرحمن تقي الصغير صحفي سوري ...